МУНИЦИПАЛИТЕТТЕРНІҢ ПОЛНОМОЧИЕЛЕРІН АЛҒЫДАРҒА
23.06.2017
Хабарлар
Республиканың правительство туразында Хакасияның Ӧӧркі Чӧп президиумының чыылии ирткен.
Аның тоғызын республика парламентінің кнезі Владимир Штыгашев апарған. Чыылығның ӱзӱриине сигіс сурығ сығарылған. Пастағы сурығҷа чоох тутхан Хакасияның прокуроры Денис Попов. Ол «Хакас Республиканың Сыныхтағ-сананыс палатазынаңар» Хакас Республиканың законының 7 паза 12 статьяларына алызығлар кирердеңер» законның проекты президиумның ӱзӱриине сығарған. Законның проектінде «Коррупцияа тоғырланардаңар» закон хоостыра хазна служащайларына ниме идерге чарадылбинчатханынаңар чоохталча. Кӧзідімге, оларға пасха ханнарның банктарында ахча тударға чарадылбинча. Андағ сайбағлар иткен тоғынҷылар хазна службазынаң сығарыларға киректер. Президиум араласчылары законопроектті Ӧӧркі Чӧптің чыылиинда аларға чаратханнар.
Ікінҷі сурығҷа Хакасияның пӱдіріг паза ЖКХ министрінің тоғызын толдырчатхан Сергей Можаров чоох тударға кирек полған. Че Хакасияның пазы аның орнына министрге пасха кізіні турғыс салғанда, чыылығда пӱдіріг паза ЖКХ министрінің пастағы орынҷызы Анатолий Безлепкин чоох тутхан. Мында этиловай спиртті, арағалығ паза спирттіг продукцияны хайда паза хаҷан садарға чарадардаңар чоох парған. Іди законопроект хоостыра кӧп кізіліг мероприятиелерде, аның хыриндағы орыннарда араға паза спирттіг продукция садарға чарадылбас. Владимир Штыгашевтің чооғынаң, законопроектте хайдағ ӱлӱкӱннердегі мероприятиелер тузында араға алай пиво садарға чарадылбинчатханы кӧзіділбеен. Иркутск облазында, спирттіг имнерні ізіп, 80 кізі оох парғанын ундубасха кирек. Прай садығны чаратпиныбызарға кирек чоғыл, че аны хызырарға чарир. Аннаңар садығ апарчатхан объекттернің ээлеріне тузында искірерге кирек. Ідӧк пу сферада муниципалитеттернің полномочиелерін алғыдыбызарға киректелче.
Ӧӧркі Чӧптің орындағы пос устанысча, халыхтар пірігістерінҷе паза нациялар аразындағы хайызығларҷа комитедінің кнезі Михаил Саражаков «Хакас Республикадағы муниципальнай службадаңар» законның 6 паза 8 статьяларына алызығлар кирердеңер» законның проектінеңер чоох тутхан. Пу законны федеральнай законодательстваа килістіре ит саларға кирек. Анда чоох парча муниципальнай служащайларға чыл сай хоза отпуск кӱннерін пирердеңер паза оларға аймах партияларның тоғызында тӧлег чох аралазарға чарадылчатханынаңар. Хайди таныхтаан Владимир Николаевич, федеральнай кінде ам сын хаалағ итчелер. Мының алнында чарадылбинчатхан киректерні ам чаратчалар. Муниципальнай служащайларға аймах халых пірігістерінің тоғызында аралазарға чарадылар, ӧӧні - оларға аның ӱчӱн ахча тӧлелбезін.
Хакасияның прокуроры аалларда тоғынчатхан имнег тоғынҷыларына социальнай полызығ пирердеңер законға тоғырланыс киртір. Республиканың пу законы хоостыра ЖКХ полызығлары ӱчӱн тӧлеглерге имнег тоғынҷыларына 485 салковай компенсация пирері кӧрілчеттір. Че прокурор ол ахча ЖКХ полызығлары ӱчӱн тӧлирге читпинче тіп санапча. Ӧӧркі Чӧптің культураҷа, ӱгредігҷе паза наукаҷа комитедінің кнезі Лариса Карпова аалларда тоғынчатхан ӱгретчілерге, имнег паза культура тоғынҷыларына тиң компенсация пирерге кирек теен. Таластар полған соонда чарадығның проектін эксперттер кӧрізіне ызарға чаратханнар.
Президиум араласчылары «Ӱгредіг паза наука организацияларын инновация паза наука-технология саринҷа тилідердеңер» федеральнай законның проектіне чахсы ӱндезіг пиргеннер. Ідӧк Лариса Карамчакованы паза Сергей Ивачевті (Абаканскай рудниктің ӧӧн экономизі) Ӧӧркі Чӧптің Аарластығ пічіктерінең сыйыхтирға чаратханнар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде