ХАДА-ПӀРГЕ ТОҒЫНЗА, НИИК ПОЛАДЫР
27.02.2018
Хабарлар
Чыылығ. Хакасияда хакас тілі паза литература ӱгретчілерінің халых пірігізі тӧстел парды.
Пу кӱннерде Ағбанда Хакасияның ӱгредігні тилітчең паза ӱгретчілер узын кӧдірҷең институтта (ХакИРО паза ПК) наа халых пірігізінің тӧстелгені хоостыра чыылығ иртірілген. Ол пірігіс «Хакас Республиканың хакас тілі паза литература ӱгретчілерінің ассоциациязы» адалча.
Ол чыылығда, аралазып, чоох тутханнар Хакасияның ӱгредіг паза наука министрінің орынҷызы Юрий Сагалаков, республиканың ӱгредіг паза наука министерствозындағы национальнай ӱгредіг пӧлиинің пастығы Ольга Доможакова, ХакИРО-ның ректоры Светлана Дмитриева паза даа пасхазы.
Чыылығ тоғынып пастир алнында, Россияның саблығ артизі, хайҷы Евгений Улугбашев тӧреен чирібістеңер, чатхан хағып, хайлап пирген. Чыылығны апарған пу наа тӧстелген пірігістің координаторы, ХакИРО-ның хакас тілінҷе паза литератураҷа методизі Надежда Мамышева.
Чоох тутхан кізілер таныхтааннар, хакас тілі халғанҷы чылларда тиліпчеткен дее полза, ам даа чоныбыс пос тілінең чахсы чоохтанминча. Аннаңар хакас тілін, хайраллап, тилідеріне наа кӱс хозылчатханы уғаа ӧріністіг. Пу халых пірігізінде, хакас тілі паза литература уроктарын апарып, пӧзік чидіглерге читкен ӱгретчілер пар. Кӧзідімге алза, Асхыс аймаандағы Калининдегі ортымах школаның ӱгретчізі Рустам Канзычаков, Асхыстағы лицей-интернаттың ӱгретчізі Ирина Идимешева, Хызыл хара суғдағы школаның ӱгретчізі Светлана Кочелакова, Куйбышевтегі ортымах школаның ӱгретчізі Клавдия Чебодаева паза даа пасхазы.
Мындағ пірігісті хаҷанох тӧстирге сағынтырлар. Кӧзідім полған, хаҷан Тиксі Россиядағы орыс тілі паза литература ӱгретчілерінің ассоциациязының Хакасиядағы пӧлии тӧстел парған. Мындағы региональнай пӧліктің кнезі полча ХакИРО-ның доценті Татьяна Кравченко. Ол, пу чыылығда аралазып, республикада олғаннарның филология культуразын тилідерінде хада-пірге тоғынарға молҷаан.
Ӧменең хада-пірге тоғынза, хайдағ даа тоғыс ниик парча. Аннаңар хакас ӱгретчілерінің пу пірігізі республикадағы пасха даа халых организацияларынаң, орындағы ӱлгӱ органнарынаң палғалыс тударға пӧгінче.
Пу наа пірігістің ӧӧн пӧгіннері паза тоғынар кӧстеглері - хакас тілін хайраллап тилідерге, хакас тілі паза литература ӱгретчілерін хада-пірге тоғынарына кӧстирге, пу тоғыста наа оңдайлар кирерге, пілістернең ӱлезерге паза пасхазы даа.
Чыылығның ікінҷі чардығында улуғ нимес концерт иртірілген. Ӱгретчілер Рустам Канзычаков чатханнаң хайлаан, Клавдия Чебодаева паза Ирина Идимешева сарыннар сарнааннар, Лариса Чебодаева паза Светлана Чебодаева тілдеңер кибелістер хығырғаннар. Хак-ИРО -ның методизі, педагогика наукаларының кандидады Мария Арчимаева тахпахтар сарнап пирген.
Чыылығ пір тыныснаң на табырах ирт парыбысхан. Тус ирткені дее пілдіртпин парған. Амды наа пірігістің тоғыс салтарларын сағирбыс. Оортахтаң кӧр турбин, ағаа чоннаң полызарбыс. Чолыңар азых ползын!
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде