ГИПНОТИЗЁР КӦРІЗІНЕ АНГЕЛА МЕРКНЕТ
04.04.2018
Хабарлар
Культура. Хакасия театрларының ӧмелері, Чоннар аразындағы театр кӱнін таныхтап, «Актёрлар хормачыланчалар» ойын турғыстылар.
Чоннар аразындағы театр кӱні 27 мартта таныхталча. Хакас театрларының актёрлары 1 апрельде чон алнынзар «Актёрлар хормачыланчалар» ойыннаң сыхханнар. Артисттер кӧглееннер, теелбектенгеннер, хормачыланғаннар, кӱрленгеннер. Сценадаң пародиялар, клоунада, фокустар кӧзіділген. Пір сӧснең чоохтаза, театрның аймах кӧстеглерінең алылған номерлер тимнелтір. Кӧрігҷілер сценада турғызылчатхан ойыннарның кӱлкістіг хормачыланыстарын ізіг айа сабызынаң удурлап турғаннар.
Хайди пілчебіс, пістің республикада тӧрт театр: А.М.Топановтың адынаң Хакас драма театры, М.Ю.Лермонтовтың адынаң Орыс драма театры, «Читіген» хакас драма паза этническай кӧглер театры, «Нымах» кӧклӧлер театры. Пӱӱлгі «Актёрлар хормачыланчалар» программаны «Читіген» театр тимнеен. Полған на театрның чайаачы ӧмезі алғыстастығ ойыннаң чон алнынзар сыххан. Чалахай иирні режиссер, «Читіген» театрның хоос устағҷызы Андрей Асочаков апарған.
Хаҷан-да илбек Шекспир теен: «Тиксі тилекей - ол театр, кізілер анда актёрлар». Пу хап-орта сӧстер хаҷанға даа таңмалал парғаннар, неке. Театрларның ӧмелері кӱлкістіг ойыннар, драмалар турғызадыр, классика авторларының паза амғы драматургтарның пьесаларын кӧрігҷее читіредір. Актёрларның чайаачы ис-пайын паалап таа полбас. Олар теелбектенчелер, ырлапчалар, тахпахтапчалар, аймах омаларға хубулчалар.
«Актёрлар хормачыланчалар» иирде артисттер постарының устарын аймах саринаң кӧзіт пирерге кӱстенгеннер, сцена кӱрленіс теелбегіне айлан парған тиирге чарир. Прай театрларда сіліг ӱнніг, кӧге чайалған кізілер поладыр. Олар сарыннарынаң ойынны чазапчалар. Чон алнынзар «Читіген» театрның чиит актрисазы Алина Майнашева «Нанҷымнаңар сарын» кӧгнең сыххан. Поэт Валерий Майнашевтің сӧстеріне пазылған тирең сағыстығ иптіг сарын кӧп кізінің чӱреен тибіретче полар. Ильбекхан Асочаков ідӧк кӧглирге чайалған, хойығ ӱнніг чиит актёр. Ол «Ангел» лирика композициязын толдырған.
Пародиялар чардыхта «Читігеннің» актёрлары Россия ырҷылары Лолита Милявскаяа (Эльмира Аманбаева), Алла Пугачеваа (Клавдия Топоева) хубулғаннар. Евгения Костякова, тізең, Мирей Матьеге хубулып алтыр.
«Нымах» театрның актёрлары Капуста аттығ табан ибіре хормачы паза кӧглернең чазалған ойын
тимнептірлер. «Чахсы квартет» адалған музыканттар аймах кӧг тиріглерінең «ойнааннар». Сценаҷа чӱгӱр чӧрчеткен актёрлар, кӧклӧлерге хубулып, аннаң андар уламох хынығ ойыннаң кӧрігҷіні чапсытханнар.
Хакас драма театрының артисттері «Алаахтыртхан Хорхло» пьесадаң аймах чыллардағы Ӧҷеңні паза Порчоны кӧзіткеннер.. Иң кирі Ӧҷең охчаалығ сыххан полза, сала чиит Ӧҷең, мылтығына махтанып, учух париған ӧртекті тӱзіре атыбысча. Порчолар, тізең, пірсі-пірсінең сіліг паза абахай поларға сіренгеннер.
Актёрлар ӧӧнінде клоунада, пародиялар, кӧглер паза хыймыраныстар пастыра кӱлкістіг киректерні читіргеннер. Ойнапчатхан матырларның кӧңні-хылии алысчатханын чахсы кӧзітчеткен актёрлар пістің илееде. Мындағ туста чоох таа чох прай ниме пілдістіг поладыр. Анзы артисттернің узын кӧзітчеткен оңдайларның пірсі полча тиирге чарир.
Театрда режиссер нимее кирек полчатханын прайзы даа пілче. Хыйғаларның пірсі Жарко Петанның кӧрізінең, режиссер - ол Худай, че хомзынысха, актёрлар - атеисттер. Ідӧк ікі пасха режиссёр кӧрімі полчаттыр: пастағылары постарын Худайға санапчатсалар, ікінҷілері анзын пілчелер. Хыйғаларның чооғы хоостыра, режиссернаң театрның тыны палғалыстығ полчатханын оңарып аларға чарир.
Нимее мин пу чоохты апарчам? Театрлар кӧзідиинде «Режиссёрның атызы» ойын полған. Аны «Читігеннің» артисттері тимнептірлер. Репетицияа килген актёрлар сценазар сірлезіп ала сыхчатханнар. Оларның соонҷа режиссер (Хакасияның саблығ артизі Валерий Топоев) сыхча. «Нимедір ол театр?» - хатығ ӱннең сурча ол. Нандырығ пілбинчеткен актёрны сах андох «ат салча». Кем-де «Муму!» ла тиирге маңнанча, че олох ла атырт салча. Парасхан актёрлар пірсі-пірсінің соонҷа чирзер аңдара тӱсчеткеннер. Режиссер, тізең, пистоледін не сығара тартарға маңнанминча. Паза полбаанда, актёрларның пірсі, пистоледін сығарып, атыныбызарға сіренгенӧк, че ухтары чох пол партыр. «Сині дее, атын таа полбинчазың!» - аахти тӱзіп, режиссер аны «ат салча».
- Театр - ол вешалка! - холында ілгіс тудына, халғанҷы актёр ылғап-алданып чоохтан тур. Че ағаа даа хазых халарға киліспеен. Мылтых кӱзӱреп ле турған. Залдағы чон, пу ойынны кӧре, чоо ээрескен.
«Чылтыстарнаң гипноз» ойында гипнотизер Чучумаков Исаа Кашпир-оолович (Алексей Сагатаев), илбек хазналарның устағҷыларын узудып, оларның чазыт сағыстарын ілезіне сығарча. Германияның канцелярийі Ангела Меркнет рок-музыкаа хынчатханы пілдістіг пол парча. Американың президентін, Кореяның пастағы кізізін ойында танып аларға чарир. Россия устағҷызы орнына, тізең, Иван Грозный сыға салча.
Пу чалахай иирде ветераннарны алғыстааннар, порчолар читіргеннер. Россияның театрлар деятельлері пірігізінің Хакасиядағы пӧлиинің кнезі, Хакасияның чон артизі Светлана Чаптыкова театрлар ӧмелерін Чоннар аразындағы театр кӱнінең чылығ алғыстаан.
Хакасияның культура министрі Татьяна Чаптыкова прай хакас театрларның пос оңдайлығ махтағлығ сарин таныхтаан. «Театрларыбыс піске сыбыра ӱлӱкӱн сыйлазыннар, «Алтын маскалар» утсыннар, залға тығырама чон пол турзын хаҷан даа!» - алғыстаан министр. Чайаачы тоғыста пӧзік чидіглерге читчеткеннерге турыстығ сыйыхтар читірілген. Хакасия правительствозының Аарластығ пічиин А.М.Топановтың адынаң Хакас драма театрының чайаачы устары Максим Султреков, Людмила Чертыкова, «Читігеннің» артисттері Эльмира Аманбаева, Ирина Чугунекова алғаннар. Хакасия правительствозының алғыстазы паза Хакасияның культура министерствозының алғыстас пічии кӧп кізее читірілген.
Театрның ізии кӧрігҷілерге хаҷан даа азых. Кӧрігҷее толдыра заллар, ізіг айа сабызы, чӱректерні тибіретчеткен ойыннар - паза ниме кирек пістің актёрларыбысха. Тӱрчедең театрлар сезоны тоозылар, аннаңар ойыннарны кӧріп аларға маңзыраңар.
Автор :
Елена ЧЕЗЫБАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде