ӦӦНІ - ХОМАЙ ИТ САЛБАСХА
12.03.2019
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиум чыылиин иртірген. Ӧӧн сурығлар ӧкістерге чурт пирерінең палғалыстығ законнарзар алызығлар кирердеңер паза республиканың идінҷектер праволарын арачылирынҷа уполномоченнайының сан пирізі полған.
Ӧкістерге чурт пирерінең палғалыстығ законнарзар алызығлар кирілер. Хакасияның ӱгредіг паза наука министрінің орынңызы Елена Конева, пу сурығҷа чоох тудып, алызығлар федеральнай законодательство алыс парғанынаң палғалыстығ полчатханын чарытхан. Алызығларның пірсі - чурт алҷаң ӧкіс палаларның, паза андағларның санына кірчеткеннернің, теес пічиин тимнеҷең оңдайны, айланыстығ пічіктер пазар оңдайны, хайдағ пічіктер киректелерін, тееске турғызар (турғыспас) тусты паза сылтағларны Россия правительствозы чарадыға ал турар, амғы законда ол полномочиелер Россия субъектінің холында.
Ӧӧркі Чӧп кнезі Владимир Штыгашев, закон проекті социальнай кирексіністіг полчатханын таныхтап, олох туста республикада чурт кирексіпчеткен ӧкістернің саны хызырылбинчатханы хоостыра сағыссыразын искірген.
- Пістің 4 муңҷа ӧкіс пала теесте турча, - чоохтаан ол. - Хакасия пу кӧстегҷе теесті хызыр полбинчатхан регионнарның санына кірче.
Ӱзӱріг тузында законзар кирілчеткен хайзы алызығлар президиумдағыларны ікінҷілендірген. Кӧзідімге, оларны муниципальнай пӱдістернің иңніне пазох ла хоза полномочиелер артылары сағыссыратхан. Аннаңар конституционнай законодательство комитеттің кнезі Светлана Могилина пу закон проектінҷе хоза тоғыныбызарға чӧпнең сыххан.
- Орта, - чарасхан Владимир Штыгашев. - Пірее нимелер мині ідӧк ікінҷілендірче. Закон проекті правительство пастаа хоостыра тимнелген, че іди дее полза... Ӧӧні - хомай ит салбасха.
Ӧӧркі Чӧп президиумы ідӧк Хакасияның идінҷектер праволарын арачылирынҷа уполномоченнайның 2018 чылда хайдағ тоғыс иділгенінеңер сан пирізінең танызып алған. Уполномоченнай Василий Кудашкин сан пиріс толдырығлығ паза закон сығарҷаң ӱлгӱлернің хайиина азынадох ызылғанын, ідӧк Хакасия правительствозының порталында сығарылғанын таныхтап, сан пирізінең хысхаҷахти таныстырған.
Кудашкиннің таниинаң, 5 чыл аразына андар идінҷектердең 500 артиинаң хоп кірген. Олар прай кӧрілгеннер, пар кӱсче полызығ пирілген. Уполномоченнай, тоғызында ағаа Ӧӧркі Чӧп чахсы хабасханын таныхтап, депутаттар корпузына алғызын читірген. Олох туста республика правительствозы саринаң хайығ уйан салылчатханын таныхтаан: 5 чыл аразына Хакасия пазынаң пір хати даа тоғас полбаанын паза правительство чыылиинда пір хати даа чоох тударға пирілбеенін.
Президиум идінҷектер праволарын арачылирынҷа уполномоченнайның сан пирізінеңер чарадығ аларға паза андар толдырығлығ ӱлгӱлернең палғалыс тударынҷа чӧптерні кирерге чарат салған. Уполномоченнайның 2018 чылдағы тоғыс салтарларынаңар сан пирізі чағынғы сессияда депутаттарның ӱзӱриине сығарылар тіп кӧріл парған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде