САҒЫНҒАН САҒЫСТАРЫ ТОЛДЫ
03.04.2019
Хабарлар
Піліңер пістіңнерні. Ирткен неделяда «Час ханат» олған эстрада студиязы Казахстаннаң Гран-приліг паза 9 пастағы орыннығ айланған.
Казахстанның ӧӧн городы Нур-султанда (Астана) аймах жанр-ларҷа «Art Premium» IV чоннар аразындағы искусство марығ-фестивальы 23 - 26 мартта ирткен. Пӧзік синде иртчеткен марығда Россияның паза Казах чирінің чайаачы ӧмелері араласханнар. Пістің республиканың саблығ ӧмезінең тиксі 39 олған анда араласхан. 6 - 16 частығ олғаннар аймах группаларда частары хоостыра постарынаң тиң араласчыларнаң устарынаң сынасханнар. Хайди чоохтаан балетмейстер Алёна Тимофеева, палалар, читі час иртен турып, иирге теере марығда араласханнар. Прай-зы майых парған. Че гала-концертте аралазарға пісті хығырғаннарында, палалар, костюмнарын пазох кизіп, сценада теелбектерін чалтырама толдырыбысханнар тіп таныхтаан ол.
Ыраххы чирзер марыға олғаннар поездтіг парғаннар. Оларнаң хада балетмейстерлер Анна Тинникова паза Алёна Тимофеева чорыхха сыхханнар. Поездте парчадып, «Час ханат» араласчылары Казах чирінзер чидіп аларын чидікпин сахтааннар. Марығ соонаң пістіңнер, городча чӧріп, андағы чирнің сілиине ӧкерсінгеннер. Олғаннар Нур-султандағы орамаларның кӧрімі Ағбаннаң пасхалалча тіп таныхтааннар. Казахтар, чир-суғҷыларыбысты казахтарох сағынып, оларзар аймах сурығларнаң айлан турҷаңнар тіп олғаннар сағысха киргеннер. Андада олар піс Хакасиядаңмыс тіп оларға нандырҷаңнар. Чоохтирға кирек, казахстандағылар пістің республика хайда орныхчатханын пілбинчелер. Че андағ даа полза, олар постарынина тӧӧй культуралығ чонны чылығ удурлааннар. Марығ тузында даа кӧрігҷілер паза жюри пістіңнерні айа саап удурлаҷаңнар.
Балетмейстер Анна Тинникованың 13 - 15 частығ олғаннары хореография, этно-фолк номинацияда «Тағ ээзі» паза «Ах пӱӱр» теелбектерні толдырғаннар. Чир-суғҷыларыбыстың хайхастығ теелбектері орындағы чуртағҷыларның паза жюринің чӱреен аптаан. Аннаңар «Час ханат» студияның улуғ частығ группазы теелбектенген соонаң Гран-при оларның холында полар тіп ізен-ген. Андағ сағыстар тиктең полбааннар, пістің саблығ ӧмебіс марығда узын пӧзік синде кӧзіткен. «Час ханаттың» пасха даа группалары теелбектерні пір дее алҷаас чох, чалахай кӧңніліг толдырғаннар. Аннаңар айдас олғаннарыбыс, аймах номинацияларда чиңіс тудып, тӧреен чир-суунзар 9 пастағы орыннығ паза марығның ӧӧн сыйии Гран-приліг айланғаннар.
Сағысха кирчем, январьда «Час ханат» олған эстрада студиязы Сочидең дипломнарнаң сыйыхтадып айланған. Че андада палаҷахтар Гран-при оларның холына кірбееніне хомзынғаннар. Ур дее полбаанда олғаннар, ыраххы чирзер чорыхха парып, андағы чонны аптап, чоннар аразындағы марығ-фестивальның ӧӧн сыйиин холға киргеннер. Амды олғаннарның сағынған сағызы ікінҷілес чох толды тиирге чарир.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде