ИҢ ЧАЙААЧЫ ПАЗА ИҢ МАҢНАНЫСТЫҒ ОЛҒАННАР
05.06.2019
Хабарлар
Виктория САГАТАЕВА іҷе-пабазынаң паза туңмаӌаанаң хада
Чидіг. Ағбандағы чайаачы оолағас-хызыҷахтар город пазының сыйиина турысханнар. Ол сыйых ӱгредіг чылының салтары полча
ИҢ ЧАЙААЧЫ ПАЗА ИҢ МАҢНАНЫСТЫҒ ОЛҒАННАР
Таныхтирға кирек, Ағбан город пазының сыйии 1999 чылдаң ала чыл сай чахсы чидіглер кӧзіткен олғаннарға пирілче. Пӱӱл ол кибір узарадылды. Ағбан город пазы Николай Булакин чайаачы ӱгренҷілернең паза оларның ӱгретчілерінең тоғасхан.
- Город пазының сыйиин піс иң чайаачы паза иң маңнаныстығ олғаннарға пирчебіс. Ол аарласты таныхтапча, тӧлібістің аннаң андар ӧзеріне паза чуртас чолынӌа ізестіг парарына кӧстег пирче. Чонда аарлас тоғынып аларға оой ла нимес, че улам на сидік ол чидігні тударға паза аннаң андар ӧзерге. Сірер городтың ізенізі полчазар. Піс сірерге киртінчебіс! - олғаннарзар айланған Николай Булакин.
Іди 15 олған алты номинацияҷа аның холынаң сыйых алған. Ол - чайаачы музыканттар, хоосчылар, спортсменнер, олған-саарбах чӧрімнерінің ӧткін араласчылары, искусствода паза культурада чахсы хаалағлар итчеткеннер. Сыйыхха турысханнарның полғаны ла айғасчатхан киреенде пӧзік чидіглерге читкен.
Іди сыйыхха турысханнарның санынаң А.А.Кенельнің адынаң музыка школазының ӱгренҷізі Анастасия Кольчикова «Музыка тилізі» номинацияның лауреады полыбысхан. Хайди аның ӱгретчізі таныхтаан, Анастасия виолончельнең айдас ойнапча, ол аймах марығларда, фестивальларда тӧреміл араласча паза чахсы чидіглер кӧзітче.
Ағбандағы гимназия ӱгренҷізі Галина Тараканова, тізең, литература саринаң чайаачы кізі. 10-ӌы класстағы хызыҷахха тіллер ӱгредии ниик пирілче. Ол ӱс тее тілнең чоохтар пасча.
- Минің ибде улуғ библиотека, сӧбіремде прайзы хығырарға хынча. Аны хоостыра тіллерге хыныс тӧреен полар. Мин орыс, англия паза япон тіллерінең чоохтар пасчам. Япон тілін пос алынӌа ибде ӱгренчем, улуғ нимес произведениелер пас полчам.
Ідӧк школада франция тілін хоза ӱгренчем, - чоохтаан Галина.
Виктория Сагатаева Ағбан город пазының сыйиина 2017 чылда турысханох Виктория САГАТАЕВА іҷе-пабазынаң паза туңмаӌаанаң хада полған, пӱӱл ол ікінҷізін таныхталды. Ус холлығ хызыҷах 11 чыл нинҷінең хоости палғирынаң айғасча.
- Пос холынаң аймах ниме-ноолар чайирга хынчам. Пасхазына тӧӧй нимес нимелер киліс парча. Поғо чайирға сіренгемӧк, че аны хоостыра кӧп кибірлер, хайзына тудынарға кирек. Мин тізең, пос кӧңнімнең чайирға хынчам, - тіпче Виктория.
Чоох чоғыл, мындағ чайаачы олғаннарның чидии - іҷе-пабаларға улуғ ӧрініс. Пу кӱнде Викторияны іҷе-пабазы Татьяна Юрьевнанаң Афанасий Гаврилович кічіг туңмазы Янанаң хада алғыстирға килгеннер.
Таныхтирға кирек, Сагатаевтер сӧбірезінде тӧрт пала. Оларның полғаны ла чуртаста хынчатхан киреен таап алған. Татьяна Юрьевнаның чооғынаң, тун оолғы КВН-да тӧреміл араласчаң, ікінҷізі спортта чахсы салтарлар кӧзіткен, ол спорт туризмінҷе спорт узына кандидат полча. Виктория чайаачызын нинҷінең палғалыстырған. Амды кӧглеп чӧрчеткен кічіг хызыҷаанзар кӧріп, іҷе-паба аны музыка саринаң тилир тіп ухаанңылапча.
- Палаларны нименең-де айғазарға кӱстирге кирек чоғыл. Олар прай нимені постары сынап кӧрерге киректер. Ӧӧні - палаларға кӧңніне кірчеткен кирек таап аларына ондай пирері. Андада оларның прай ниме килізер, - тіпче Татьяна Юрьевна.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде