ТУЗАЛЫҒ ПІЛІСТЕР АЛАР ОҢДАЙ
23.08.2019
Хабарлар
Хакасияның идінҷектері Москвадағы эксперттернің семинарларында араласханнар
Форум. 21-22 августта республиканың музей-культура кінінде «Кічіг нимес бизнес» форум ирткен. Анда пос киреенең айғасчатханнарға ӱгредiглiг площадкалар тоғынған
Иртен иртӧк музейнің пастағы хадылында чон тығырама полған.
Форумда аралазарға килген идінҷектер аккредитацияны табырах иртіп аларға маңзырааннар. Пӱӱл форумда аралазардаңар 500 азыра идінҷек кӧңнін искірген, ол, ирткен чылнаң тиңнестірзе, 100 кізее кӧп. Араласчыларның саны хозылчатханы бизнес-форум улуғ кирексіністе полчатханын киречілепче. Форум пайрамни азылғанда, чыылған чонзар Хакасия пазы Валентин Коноваловтың адынаң айланған аның орынҷызы, республиканың финанстар министрі Ирина Войнова.
- Республиканың бюджедіне ахча ӧӧнiнде алюминий паза хара тас аныпчатхан улуғ предприятиелердең чӧрче. Че ікі чыл пазынаң Хакасия экономиказын кічіг паза ортын бизнес тилідерге кирек. Ӏди 2021 чылдаң пасти оларның бюджетке хозымнары 30 процентке ӧс парзын. Піс, тізең, сірернің тоғыстарың иптіг парзын тіп, прай оңдай лар тимнирбіс. Пӱӱнгі кӱнде кічіг паза ортын бизнеске улуғ хайығ салылча. Тиктең нимес Россия президенті «Кічіг паза ортын бизнес паза идінҷектің пастаана хабазары» национальнай проектті алынӌа таныхтаан. Анда идінҷектерге хабасчаң аймах программалар кӧріл парған, - таныхтаан чооғында Ирина Ивановна.
«Кічіг нимес бизнес» форумда спикерлер, модераторлар, орындағы министрлер, Ӧӧркі Чӧп депутаттары, комитеттер устағҷылары, халых пірігістерінің пастыхтары полғаннар. Эксперттер, тізең, прайзы Москвадаң хығыртылғаннар. Тиксі сигіс кізі Хакасиязар килген.
Иң кӧп араласчы «Моментальная оценка человека» мастер-класста полған. Аны Владимир Малешин иртірген. Ол, Россияның аймах пірігістерінде 40 азыра чыл істеніп, кізілерні тоғысха алар сурығнаң айғасхан. Улуғ опыттығ эксперт, кізіні кӧріп ле, анын хылиинаңар, тоғынар кӧңнінеңер чоохтап пирерге тимде.
Хайди ол чарытча, кізіні тонанчатханынаң, чоохтасчатханынаң піліп аларға чарир.
Эксперт Анна Бочарова Хакасиязар ікінҷі хати килді. Ол ирткен чылдағы бизнес-форумда араласханох. Пӱӱл ол пос киреенең айғасчатханнарға «Мотивация персонала» семинар иртірген. Ол идінҷектерні тоғынҷыларынаң орта чоох алызарға ӱгреткен.
Идінҷектернің иң ағырсымнығ сурии - пос товарын орта садары. Ол-пу ниме-нооларны сығарчатхан улуғ нимес предприятиелер, организациялар товарларын орта сат полбинчатхан сылтаанда, кӧбізі тилібинче алай ба чабыл парча. Эксперттернің кӧрізінең, Хакасиядаң хырығ озаринзар ағас, алюминий, хара тас апарылча. Ол кирекнең республиканың 98 процент килкім предприятиезі айғасча. Амды, тізең, андағ тус чит килді, хаҷан кічіг паза ортын бизнеске дее товарларын пасха регионнарзар алай ба хырығ озаринзар сығарарға кирек. Че андағ рыноксар кірер алнында, мында пос товарын иптеп аларға кирек.
- Иң пастап, Хакасияда пос товарын сабландырып аларға кирек, анаң на аны республикадаң сығарарға чарир, - сағызынаң ӱлескен Хакасияныц садығ-промышленность палатазының президенті Серж Адамян.
Товарны пасха регионнарзар алай ба хазназар сығарарына чарыдылған семинарда Ширадаң килген Трошкиннер ирепчі араласхан. Олар Орловскай рысак аттарны ӧскірчелер.
- Аттар ӧскірері - ол уғаа хорадығлығ бизнес.
Піс хаҷан даа парыстан полбинчабыс. Ағаа хоза, пос киреен хайди тилідерге паза палғалыстарны орта тілирге пілбинчебіс. Аннаңар «Кічіг нимес бизнес» форумда хынып араластыбыс, кӧп наа паза тузалығ ниме піліп алдыбыс, - чоохтапча Любовь Трошкина.
Пу форум идінҷектерге удур-тӧдір танызып аларға, наа палғалыстығ поларға паза пос киреенде пастағы хаалағлар идерге полысча. Че аның ӧӧн пӧгіні - регионда пос киреен иптіг апарар оңдайлар тимнирі. Республиканың идінҷектерінің кӧңнілерін паза сидіксіністерін піліп алар ӱчӱн, форумның пастағы кӱнінде Хакасияның ӱлгӱзі орындағы идінҷектернең тоғасхан. Ниме бизнеске тилирге харығ полча? Мына пу тоғазығның ӧӧн сурии.
Пос киреенең айғасчатханнарзар сыныхтағ органнары удаа «ааллап» килчелер. Ол ӧрт ӱзірҷең службаның, прокуратураның, налоговай службаның, істеніс инспекциязының паза даа пасха органнарның специалисттері. Олар бизнестің тоғызына харығ полчалар, паза, килкім предприятиелерге чіли, 100 - 500-ер муң штраф сал пирчелер:
- тарифтер сыбыра ӧсчелер. Идінҷектернің ӱс ӧӧн хорадығ - тоғын чыларға чал ахчазын, налогтар паза чарытхы ӱчӱн тӧлирі! Постарына, тізең, парыс халбинча;
- налоговай органда санға алылбин тоғынчатханнар пос киреенең закон хоостыра айғасчатханнарға илееде ӱрег ағылчалар. Кӧзідімге, ағас узырҷаң бизнесте. Хайди тоғазығда таныхтаан ағаснаң айғасчатхан идінҷек, кӱҷӱрлер ағаа айда 100 муң азыра салковайға ӱрег ағылчалар;
- банктар пос киреенең айғасчатханнарға пӧзік ставкалығ кредит пирчелер.
Пу паза даа пасха ағырсымнығ сурығларны кӧдіргеннер орындағы идінҷектер. Оларның сурығларын ӱлгӱдегілер пӧк пирерге молҷааннар, че олох туста, кӧдірілген сурығларның кӧбізін федеральнай синзер сығарарға киректееннер.
Министрлер паза Хакасияның Ӧӧркі Чӧп комитеттерінің устағҷылары идінҷектердең ӱндезіглер сахтапчалар. Хайдағ?
- Идінҷектернің тоғыстарын нииктебізер ӱчӱн, 2020 чылда ӱс закон проекті кӱзіне кірер. Оларның иң кӧп хайығ тартчатханы налог тӧлиріне теелче. Килчеткен чылда пос киреенең айғасчатханнарға налог ставказы, 2,5 хати хызырылып, 7,5 % тиңнелер. Налог тӧбін пол парза, хай пірее идінҷектер «харасхыдаң» сығарларына ізенчебіс, ағаа хоза сірер наа тоғыс орыннарын азарын сахтапчабыс. Ідӧк пасха регионнарзар кӧс парыбысхан Хакасияның идінҷектері республиказар айланарға киректер, - салтар иткен Хакасия пазының орынчызы Ирина Войнова.
Форумның ікінҷі кӱнінде пос киреенең айғасчатханнар Александр Левитастың «Принципы партизанского маркетинга 2.0» семинарында араласханнар.
- Мин 25 чыл идінҷектерге бизнестерін алғыдарға полысчам. Оларны пос товарын орта садарға, клиенттернің санын хозарға паза парыстанарға ӱгретчем. Идінҷектерге хаҷан даа чоохтапчам, бизнес андада парыс ағылар, хаҷан садығ маңат парар паза клиенттер кӧп полар. «Принципы партизанского маркетинга 2.0» семинарда мин пу тоғысты хайди апарарға ӱгреткем, - тіпче Москвадағы эксперт Александр Левитас.
Хакасияның идінҷектері сағыс-кӧрістерінең ӱлескеннер.
Владимир БОНДАРЕВ:
- Форумның пастағы кӱнінде араласпаам, Александр Левитастың ӱгредігліг семинарына, тізең, ӧнетін килгем. Аның программазы Россияда ла нимес, тиксі хазнада сабланча. Аннаңар мындағ саблығ экспертті Хакасиязар хығыртханы уғаа чахсы. Позым мин Харатаста мебель идіп айғасчам.
Андрей АРТЫКОВ:
- Мин алты чыл мының алнында сомнарнаң айғазып пастаам. Амды Ағбанда позымның студиязы пар. Пастап республикада сомнарнаң асхынах кізі айғасхан, амды пу сфера чахсы тиліпче, конкуренция улуғ. Аннаңар мағаа сыбыра наа пілістер аларға кирек. Пу бизнес-форумда пос киреен хайди тилідерге, сабландырарға піліп аларға кӱстенгем. Сағынчам, ол мағаа тузалығ полар.
Ульяна ГРИШАЕВА:
- Піс Ағбанда паза Харатаста улуғ частығ кинек чуртағҷыларға иб істін арығлирға полысчабыс. Организацияда 50 азыра кізі істенче. Тоғыста кізі кӧпте, оларнаң тоғыс орта апарарға кирек. Аннаңар Москвадағы эксперт Анна Бочарованын «Мотивация персонала» семинарында араласхам.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде