ЖКХ СУРЫҒЛАРЫН - АЙМАХТАРҒА
07.02.2020
Хабарлар
Оӧркі Чӧп. Хакасияның Ӧӧркі Чоп президиумы теестегі чыылығда чағынғы сессияа сығарылҷаң закон проекттерін ӱзӱрген. Чыылығның иң ӱзӱрігліг сурии ЖКХ полномочиелерінең палғалыстығ закон проекті полған
Ӧӧркі Чӧп кнезі Владимир Штыгашев, чыылығның тоғызын азып, «Хакас Республикада орындағы кирексіністіг алынҷа сурығларны аалларның холына пирердеңер» Хакас Республика Законының 2 статьязының 1 пункты кӱзін чідірген тіп санирдаңар» закон проекті ӱзӱріге сығарылча тіп искірген. Хакасияның пазы кирген закон проектінең таныстырарға сӧс республиканың пӱдіріг паза ЖКХ министрі Сергей Новиковха пирілген.
Че мында Ӧӧркі Чӧптің орындағы пос устанысча, халых пірігістерінҷе паза нациялар аразындағы хайызығларҷа комитедінің кнезі Роман Челтыгмашев пу сурығны пӱӱнгі чыылығда ӱзӱрбеске, аның ӱзӱриин президиумның теестегі чыылиина чылдырыбызарға чӧпнең сыххан. Оӧн сылтағ - закон проекті комитет (ол сурығ пу комитеттің хайиина юрче) чыылиинда ӱзӱрілбеені. Роман Челтыгмашевтің кӧрізінең, мында регламент сайбалған. Че Владимир Штыгашев ол чӧпті чағын албаан.
- Піс пу сурығны ідӧк тее сӧӧ тарт парирбыс, - таныхтаан ол.
- 4 чыл соона ла салдырчабыс.
Таныхтирға кирек, пу закон проекті хоостыра ЖКХ сурығларынҷа полномочиелерні ааллардаң нандыра аймахтарның холына пирібізері кӧрілче. Депутаттар закон проектінең таныстар даа тиирге чарир. Ирткен чылда Ӧӧркі Чӧптің сессиязында ол пастағы хығырығда алылған полған. Че кӱскӱдегі сессияда ікінҷі хығырығда алылбин халған, закон проектін аларына киректелчеткен ӱн чидіспеен. Ол кирек аймахтар пастары тоғырланчатханынаң палғалыстығ.
Республиканың пӱдіріг паза ЖКХ министрі, закон проектінең таныстырып, ноға ЖКХ сурығлары аймахтарның холында поларға кирек полчатханын чарытхан. Иң пастап, анзы килкім муниципальнай казеннай предприятиелер (МКП) тӧстирге оңдай пирер. Аның чооғынаң, килкім предприятиелер тӧстелзе ле, отрасльзар инвестициялар кір сығар. Инвесторлар, хара тас ағылчатханнар паза энергетиктер дее анзын кирексіпчелер осхас. Тарифтерні арачылаҷаң тоғыс таа чахсы пар сығар тіп таныхтаан Сергей Новиков. Чахсы кӧзідімге ол Ағбан пилтірі аймаан ағылған, анда наа тӧстелген МКП тӱзімніг тоғынчаттыр.
- Сидіксіністер сығысса, республика ӱлгӱлері хаҷан даа полызыға килерге тимделер, - ізендірген министр.
Аның искіриинең, 2020 чылға муниципалитеттерге ЖКХ хорадығларынҷа чідірчеткен парыстарын айландырарына 300 миллион салковай кӧріл парған паза чарғы чарадығларын толдырарынҷа - 700 миллион салковай. Іди республика бюджедінде 2020 чылға тиксі пір миллиард салковай салыл парған тіп таныхтаан Новиков.
Мында аал хонии политиказынҷа, ас-тамахча паза чирнең тузаланарынҷа комитеттің кнезі Пётр Воронин министрні тӱзеткен: «Ол 700 миллион салковай 2019 чылның алымнары нооза, пу чылға, тізең, миллиардча салковай киректелер. Ахча чидіспес». Паза аның таниинаң, федеральнай законодательствоҷа Россияда ЖКХ сферазында 2025 чылға теере пір дее муниципальнай паза казеннай предприятиелер халбасха кирек.
Че Ӧӧркі Чӧп кнезі Владимир Штыгашев талазығларны тохтатхан.
- Піс пазох сидіксіністі пӧгерінең хыйа парирбыс, - таныхтаан ол.
Салтарында Оӧркі Чӧп президиумы закон проекті кирілгенге санирға паза аны чағынғы сессияның ӱзӱриине сығарарға чарат салған. Сессия 26 февральда иртер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде