ОЛИМП МАТЫРЛАРЫ - ХАКАСИЯДА
13.03.2020
Хабарлар
Тоғазығ.10 мартта Хакасия пазы Валентин Коновалов правительство туразында Олимп ойыннары чемпионнарынаң тоғасхан
Регион пазы Валентин Коновалов, республиканың спорт министрі Владимир Кретов паза аның орынҷызы Олег Данчук «Олимп матырлары - Россияның олғаннарына, чииттеріне паза олған спортына» тиксі Россиядағы полызығлығ программаның устағҷызы Наталья Боярскаяны, баскетболча олимп чемпионы Ирина Сумникованы, волейболҷа олимп чемпионы Людмила Жигилийні, каноэнең суғҷа чӱзерінҷе олимп чемпионы Максим Опалёвты, Олимп ойыннарында ниик атлетикада хола медальға турысхан Денис Капустинні, академическай оңдайнаң кименең суғҷа чӱзерінде олимп чемпионы Анна Алёшинаны чылығ удурлааннар. Валентин Коновалов, аалҷыларзар айланып, оларға чахсы тоғыс апарчатхан ӱчӱн алғызын читірген:
- Сірер чиит тӧлні хазых чуртас апарарға кӧніктірчезер, Ада чир-суубыснаң поғдархирға ӱгретчезер. Ізенчем, сірер спортта пастағы хаалағлар итчеткен оол-хыстарыбыснаң тоғасхан соонаң оларның піреезі, олимп чемпионнарынзар кӧріп, ідӧк спортта пӧзік чидіглерге чидерге пӧгінібізер. Андағ тоғазығлар уғаа тузалығ тіп санапчам.
Олимп чемпионнарының делегациязы «Олимп матырлары - Россияның олғаннарына, чииттеріне паза олған спортына» тиксі Россиядағы полызығлығ программа хоостыра Хакасиязар ікінҷі хати килді. 2016 чылда олар Ағбанда, Саяногорскта, Харатаста паза Алтай аймаанда чиит улуснаң тоғасханнар. Наталья Боярскаяның таниинаң, ол тоғазығлар спортсменнернің сағыстарында тирең іс артысханнар. Аннаңар пӱӱл олар Хакасиязар ачых-чарых кӧңніліг чорыхха сыхханнар.
Амды олар 19 мартха теере пістің республикада ааллирлар. Олимп чемпионнары Абазадағы, Саяногорсктағы, Сорығдағы, Ағбан пилтіріндегі, Асхыстағы спортнаң айғасчатхан чииттернең, олаңай ӱгренҷілернең тоғазығлар иртірерлер. Ідӧк олар ааллаан спорт школаларына аймах спорт тиріглерін, оборудование паза спорт кип-азаан сыйлап пирерге пӧгінчелер.
Хазнабыстағы спортты тилідеріне чарыдылған полызығлығ программа алты чыл тоғын парир. Халғанҷы тустарда олғаннарнаң спорты улуғ хайығда тудылча. Олимп ойыннарының матырларына 59 регионда, 422 городта пол киліп, полған на ааллаан орында тренерлерге палаларны спортсар тартып алар ӱчӱн, кӧп аймах сидіксіністі тобырарға килісчеткені кӧріндіре полған. Аннаңар пӱӱл Елена паза Геннадий Тимченконың полызығлығ фонды, тиксі Россиядағы полызығлығ программаа хабазып, алты регионға олған спортын тилідеріне пірер миллион салковай пирерге чаратхан. Улуғ ӧрініске Хакасия ол санда пол парған. Амды Абазадағы, Асхыстағы, Сорығдағы, Ағбан пилтіріндегі спорт школаларына ахчалығ хабазығ читірілер.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде