ЧОН СИДІКСІНІСТЕРІ ӰЛГӰ ХАЙИИНДА
20.03.2020
Хабарлар
Тоғыс чорығы. 18 мартта Хакасия пазы Валентин Коновалов Пии аймаанзар тоғыс чорығынаң чӧрген. Анда ол национальнай проекттерҷе пӱдірілчеткен объекттерні сыныхтаан паза чуртағҷыларнаң тоғасхан
ШКОЛА НААӋЫЛИРЫН САХТАПЧА
Хакасия пазы, Пии аймаанзар тоғыс чорығынаң сығып, пастап Новотроицкай аалдағы школазар чол тутхан. Анда орындағы 9 чыллығ школаны сыныхтаан. Ол 1962 чылда пӱдірілген. 1987-1988 чылларда школаа хоза ікі хадыллығ пӧлік пӱдіріп пастааннар. Че пӱдіріг тоғыстары, читіре иділбин, тастал парғаннар. Ол пӧлік пӱдіріг тоғыстары аннаң андар узарадыларын амға теере «сахтапча». Ағаа хоза, школаның оразынзар чир алтынаң сыхчатхан суғлар кіріп, андағы кірпис пес изел сыххан. Аннаңар ікі чыл мының алнында хазна экспертизазы ӱгредіг учреждениезінің ора ӱстӱндегі чардығында уроктар апарарға чаратпиныбысхан. Амды 87 ӱгренҷі оларның чуртазына хорғыс ағылбинчатхан чардығында ікі сменанаң ӱгренче.
Школа директоры Михаил Васаловтың таниинаң, тыхтағ тоғыстарына федеральнай бюджеттең 37 миллион салковай позыдылча.
Ол тоғыстар «Россияның ӱгредиин тилідері» программа хоостыра апарылар. Пічіктер тимнел парза, тыхтағ тоғыстарын апарар фирма марығ пастыра табылар. Амды ӱгретчілер паза олғаннар уроктар апарылчатхан чардыхта паза читіре пӱдірілбеен пӧліктерде пӱдірігҷілер хайынып пастирын чидікпин сахтапчалар. Ідӧк школада ӱгренҷілерге чылығ туалет турғызары кӧрілче.
Пастап Михаил Васалов Валентин Коноваловха орада суғ турчатханын кӧзіткен. Соонаң олар 2009 чылда пӱдірілген столовайзар чол тутханнар. Кічіг пӧлікте алты стол турған. Анда Хакасия пазы школа устағңызынаң хайдағ тоғыстар апарыларынаңар чоохтасхан. Валентин Олегович Хакасияның пӱдіріг паза чурт-коммунальнай хоных министерствозына Новотроицкай аалдағы школада пӱдіріг тоғыстары хайди апарылчатханын хайығда тударға чахығ пирген.
Ідӧк республика пазы пастағы паза ікінҷі хадылындағы класстарда ирткен чылда апарылған тыхтағ тоғыстарын паалаан. Валентин Коновалов, потолокты ӱс бруснаң тіреп салғанын кӧріп, пӱӱл школа хайди даа нааңылал парарға кирек тіп таныхтаан.
ОЛҒАН САДЫ ПӰДІРІЛЧЕ
Новотроицкай аалда полған соонаң Хакасия пазы Новокурсксар читкен. Анда 80 орыннығ олған садының пӱдірии хыызында парча. Пӱдірігҷілер киҷее ле ағылған кірпистерні тазыпчатханнар. Наа олған садын «Ӱгредіг» нацпроект хоостыра Хызылчар крайындағы «Строй-сектор» ООО ирткен чылда пӱдіріп пастаан. Наа олған сады ізиин иркеҷектерге чыл тоозылчатса азарға кирек.
Валентин Коновалов компанияның устағҷызы Илья Тарасовтаң тимнелген графиктең халчазар ба тіп сурған. Ол тоғысты аннаң андар узарадарға харығ полчатхан киректердеңер чазырбин кӧні чоохтап пирген. Сидіксіністер ӧӧнінде олған садының проектіне теелгеннер. Олған садының проекті пӱӱнгі кӱндегі СанПиНге килістіре нимес осхас. Аннаңар андар алызығлар кирерге кирек тіп таныхтаан Илья Иванович. Валентин Олегович, андағ хабарны истіп, Хакасияның пӱдіріг паза чурт-коммунальнай хоных министерствозына ол читпестерні табырах тӱзедібізерге чахығ пирген. Паза ол подряд организациязының устағҷызына, тоғысчыларның санын хозып, пӱдірігні сала табырах апарарға чахығ пирген.
ЗАВЕТНАЙ ААЛ ПОЛАР НИ?
Ӱзінҷі тохтағ Саяногорсктаң ырах нимес орныхчатхан Заветнай аалда полған. Пу аалдаңар республиканың чуртағҷылары кӧп хати искен поларлар. 11 чыл мының алнында Саяногорсктың чуртағҷылары городтаң ырах нимес орныхчатхан аал хонии чирлерінде туралар пӱдірінгеннер. Соонаң олар чурттарын пічікке киріп пастаанда, закон хоостыра ол чирлерде пӱдірінерге чарадылбинчатханы ілезіне сығыс килген. Аал орныхчатхан орын Пии аймааның чирлеріне кірче. 10 чыл артиинаң андағы чуртағҷылар оларның туралары орныхчатхан чирлерні городха даа, алынҷа аал даа идіп пічікке кир полбин ирееленчелер.
Орындағы чуртағҷылар, чыылызып, Валентин Коноваловты, Пии аймааның пазы Иннокентий Стряпковты, Саяногорск пазы Михаил Валовты чидікпин сахтааннар. Устағ-пастаандағылар тоғазыға килгенде, чон матап суум-саам кӧдірген. Пастап чоох пирілген Пии аймааның пазына. Ол сидіксіністерні пӧкчең оңдайлардаңар чарыда чоохтаан. Че чуртағҷылар аның сӧстеріне чӧпсінмееннер. Андада чоох алған Михаил Валов. Ол республика пазынаң Заветнай аалны Саяногорскха хозыбызарға сурынған. 1 сентябрьға теере Пии аймаа пу сурығны пӧк полбаза, Заветнай аал городха піріктірілер тіп чӧптес салғаннар. Амды чуртағҷылар кӱскее теере чуртас чахсы саринзар айланарын сахтирлар.
«ТАСТАР» СКВЕР
Хакасия пазының тоғыс чорығының халғанҷы тохтаа Саяногорскта полған. Анда город пазы Валентин Коноваловха «Тастар» тоғысчы аттығ наа сквер пӱдірілер орынны кӧзіткен. Аның орнын город чуртағҷылары ӱн пиріп таллап алғаннар. Амды городтың устағ-пастаа скверні «Городта истіг оңдайлар тӧстирі» программаҷа, Саяногорсктың 75 чылына чарыдып, пӱдірер.
Наа скверні аймах рудаларнаң чазирға пӧгінчелер. Чоохтирға кирек, андағ сіліг кӧрімніг парк алай сквер Хакасияда чоғыл. Че аны пӱдіреріне 11 миллион салковай киректелче. Городтың пис ле миллион салковай пар. Аннаңар Михаил Анатольевич Хакасия правительствозын ол пӱдіріге ахчанаң хабас пирерге сурынған. Валентин Олегович ол сурығны правительствода ӱзӱр кӧрербіс тіп нандырған.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде