ПАЛЫХ ӦСКІРЧЕТКЕННЕР СИДІКСІНІСТЕРІ
24.03.2020
Хабарлар
Чыылығ. Хакасияның Ӧӧркі Чӧбінде палых ӧскіреріне паза палыхтирына чарыдылған чыылығ ирткен
Анда Ӧӧркі Чӧптің экологияҷа, чир-чайаан ис-пайынҷа паза чир-чайааннаң тузаланарынҷа комитедінің паза профильліг министерстволарының кізілері араласханнар. Амғы туста Хакасияда пір муң азыра кӧл-тулғор саналча. 550 кӧлде палых ӧскірерге оңдайлар пар.
Хакасияның аал хонии паза ас-тамах министрінің орынҷызы Александр Башковтың чооғынаң, 2018-2019 чылларда кӧллерде палых ӧскіреріне 17 сурыныс пічии кірген. Че палыхты ӧскірерге кӧрілген кӧллернің ікізінде андағ тоғыс апарылбинча. Амды 15 кӧлде палыхтар ӧскірчелер, аннаңар оларда палыхтир алнында фермердең чарадығ аларға киректелче.
- Амғы туста палых ӧскірерінде хорадығлар улуғ, аннаңар хай піреезі, сурыныс пічиин пасхан даа полза, пу
кирекнең айғаспинча. Оларның пірсі - Сорығ город хыриндағы Чылығ кӧл. Анда палых ӧскірерге сағынған кізі кӧлзер палых позытпаан, сан пиріс итпеен, аннаңар піс аннаң чӧптезігні чох идібіскебіс, - теен Александр Башков.
Амғы туста палых ӧскірерге сағынчатхан кізее аймахтағы ӱлгӱлердең чарадығ аларға кирек. Палых ӧскірчеткен фермерлер кӧлзер сиирестерні позытчалар, оларны азырапчалар, аннаңар ол кӧллерзер палыхчыларны позытпинчалар. Чон хармахнаң на нимес, ідӧк сетканаң палыхтапча. Палых ӧскірчеткеннернің ідӧк пір сидіксініс - кӧллерзер тынанарға, палыхтирға килген кізілер похсах артысчатханы. Ол сӧп-сапты палыхнаң айғасчатхан фермерлер сығара тартчалар.
Чыылығда Пии аймаандағы кӧллерҷе сурығ кӧп полған. Олар кӧместең соолчалар. Палых ӧскірілчеткен кӧллерзер суғларны кооптардаң ағысчалар. Аннаңар оларда суғ синминче. Че палых ӧскірілбинчеткен кӧллер нинҷе-де чыл пазынаң чіт парарлар.
Ӧӧркі Чӧптің экологияҷа комитедінің депутаттары палых ӧскірерінҷе сағыс-кӧрістерінең ӱлескеннерӧк. Палых ӧскіреріне хорадығларның чардығы республиканың бюджедінең айландырылча. Аннаңар палых ӧскірілчеткен кӧллерде палыхтирына ӧнетін орыннар кӧріл парарға кирек. Ағаа хоза, законодательство хоостыра палых ӧскірчеткен кізінің чарадиинаң анда палыхтир оңдай пар.
Ӧӧркі Чӧптің экологияҷа, чир-чайаан ис-пайынҷа паза чир-чайааннаң тузаланарынҷа комитеттің кнезі Валерий Старостиннің таниинаң, палых ӧскірілчеткен кӧллерде палыхчылар ниме ӱчӱн тӧлепчеткеннерін пілзіннер тіп, палыхчыларға даа, палых ӧскірчеткеннерге дее кирексіністер тимнебізерге кирек.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде