31 МАЙҒА ТЕЕРЕ - ИБДЕҢ СЫХПАСХА
15.05.2020
Хабарлар
Кӱн сурии. Хакасия правительствозы ибдең сыхпас тусты сілкер айы тоозылғанча узарадыбысты
Мындағ чарадыға республика правительствозы, Россияның ӧӧн хазна санитар имчізінің ибдең сыхпас режимні суурарынҷа кирексіністерге тудынып, килген. Ӧӧн сылтағ - регионда ағырчатханнар саны хызырылбинчатханы.
Хакасия правительствозындағы коронавирусты тараттырбазынҷа паза кирдірбезінҷе оперативнай штаб искіриинең, COVlD-19 ағырығнаң тиксі 149 кізі имненіп алған, оларның 17-зі киҷее чазыл парған.
Штаб искіриинең, сілкер айының 13-ҷі кӱнінде ағырығны чухтырып алған 21 кізі ілезіне сығарылған, 14-ҷі кӱнінде - 8. Андағ оңдайнаң республикада тиксі 532 кізінің, ол санда 62 паланың коронавирус табылған. Имҷілер хайиинда 2030 кізі саналча, ол санда обсерваторда - 43 кізі, 383 кізі имнег иртче. Чоохтирға кирек, Хакасияҷа Роспотребнадзор управлениезі искіриинең, ағырығны ӧӧнінде сӧбіреде паза тоғыста чухтырып алчалар, имнег тураларында тарапча паза халғанҷы туста, тыморабызып, имнег туразынзар айланғаннарның коронавирус табылча.
Чуртапчатхан орыннарын кӧрзе, сілкер айының 14-ҷі кӱніне Ағбанда 288 кізі COVID-19 ағырығны чухтырған, Алтай аймаанда - 95, Ағбан пилтірі аймаанда - 36, Саяногорскта - 35, Харатаста - 31, Шира аймаанда -12, Боград аймаанда - 12, Асхыс аймаанда - 9, Абазада - 3, Пии аймаанда - 2, Таштып аймаанда - 1, Орджоникидзе аймаанда - 1. Аннаң пасха, Тываның ӱс чуртағҷызы, Хызылчар крайының ӱстӱнзархы чардығының ӱс чуртағчызы паза Новосибирск облазының пір чуртағчызы ағырчатханнар аразында саналча.
Хакасияның хазых хайраллаҷаң министерствозы искіриинең, пӱӱнгі кӱнде республикада наа чуғынҷах ағырығнаң ағырчатханнарға 330 орын тимнелген: республикадағы чуғынҷах ағырығлар имнег туразында, Саяногорсктағы, Харатастағы имнег тураларында паза Харатастағы пала тапчаң турада. Че министерство коронавируснаң ағырчатханнар саны кинетін ӧс сығарына тимде полар ӱчӱн, хоза имнег орыннарын тимнирге пӧгін тутча. Пу неделя тоозылғанҷа 200 орын ӱс имнег туразында тимнелер: Ағбандағы имнег туразында, республикадағы офтальмологияда паза Саяногорсктағы имнег туразында. Пу орыннарға COVlD-19 ағырығ пілдіртпин алай ниик иртчеткеннерні чатырарлар.
Хакасияда коронавирусның тарапчатханынаң палғалыстығ искіріглернең танызып аларға чарир стопкоронавирус.хакасия.рф региондағы сайтта.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде