ГРАНТ АХЧАЗЫНА ОЛҒАН ПЛОЩАДКАЗЫ ТУРҒЫЗЫЛҒАН
28.06.2017
Хабарлар
Индіркі Пазазар республиканың национальнай паза территориальнай политика министрі Михаил Анатольевич Побызаков килче тееннерінде, андар чол тутхам, аал чӧбі пу аалда орныхча. Килгенде, министрнің хай пірее тоғыстар хайди толдырылғанын сыныхтирға килчеткені ілезіне сығысхан. Наа Культура туразының хыринда олғаннарға ойнаҷаң площадка турғызылған, аны кӧрерге килчеткен одыр.
Культура туразының пір пӧлиинде библиотека орныхча. Мында олғаннар толдыра. Олар полған на улуғ кізінең изеннесчеткеннерін кӧрерге чапсых таа полған. Пісті олған туста ідӧк ӱгретчең полғаннар: улуғларнаң изеннезерге. Аал пазы Светлана Васильевна Майнагашева, пастыхтар аал чӧбінің туразынзар килерлер тіп, андар чӧрібіскен, олғаннар, тізең, площадказар парыбысханнар. Библиотека тоғынҷызы Снежана Святославовна Ивандаева оларнаңох хада парча. Ол арада аннаң чоохтас парчабыс.
- Олғаннар пастап площадкада ойнапчалар, - тіпче ол. - Кӱн ізідібіссе, библиотеказар килчелер. Пістің оларға аймах-пасха ойыннар пар: викториналар, шашка, шахмат.
Обедте ибде хапланып алып, пазох ойнирға пеер килчеттірлер. Площадкада турниктер, чылҷаң орын, чилеңместер, тураҷахтар, пір кораблик, кічиҷек карусель парох. Мидееліг оолағастар турникте паза холнаң сілбектеніп иртчең нимеде (олар аны рукоход тіпчелер), кічіглері, чылып, карусельде ойнапчалар. Хайзылары, тураҷахтарда одырып, пос алынҷа чоо хабарлас парчалар.
Михаил Анатольевич килгенде, олғаннар улуғ ойында полғаннар. Піснең изеннезіп, нимее килгенін чоохтап пирген. Ирткен чылларда Паза аал чӧбі грант ахчазын утхан полтыр. Министр грант ахчазы хайди тузаланылғанын сыныхтирға килтір. Аның чооғынаң, иділген нимелерні кӧрерге чӧпсіністіг... Аал пазы Светлана Васильевна тоғыстар хайди иділгенін чоохтап пирген. Олған площадказын Таганрогтаң ағылтырлар. Анаң мында турғыстырлар. Амды олғаннарға ойнаҷаң прай орыннарға лицензия киректелчеттір, аннаңар чилеңмес, турниктер ипти иділгені іле кӧрінче.
Автор :
Михаил Идимешев
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы