ПАСТАҒЫ ХЫНЫЗЫМНАҢ ЧАСТЫХ ХАЛҒАМ
09.06.2017
Хабарлар
Пiстің «Хабар» газетада чонның аймах сағыстарын хығырарға хаӌан даа чапсых. Мин позымның чуртазымда полған киректеңер пас пирерге чараттым.
Мин, школада ӱгренчеткенде, пір оолахха тың кӧӧленгем. Ол ӧткін, ачых-чарых оолах полған, мин, тізең, пазымнығ полҷаңмын. Пірее-пірее ле туста ол миннең хада чоохтазарға маңнанӌаң. Че мин школа тоосханӌа, аның мағаа хынғанын, хынмаанын сизінмеем.
Пірсінде Москвазар экскурсияа парғабыс, ол туста Сатик школа тоозыбысхан полған. Арса, ол мағаа позының чӱреен азынарға кӱстенген дее полар. Іди гостиницада коридорда ікӧлең тоғас парғабыс, ол мағаа теен: «Кір піссер, мағаа синнең чоохтазып аларға кирек». Мин, чалтанып, ынабаам. Саарбах тузымда сағынмаам даа, мындағ оңдай пістің паза хаҷан даа полбас тіп.
19 частығда ол ипчі ал салған, мин школада улуғ класстарда ӱгренчеткем. Че мин ирте ипчі алғанына тарынғанымны чазырбин, ағаа клубта ідӧк ле чоохтаам. Анаң, студент полған туста, ол пістің общежитиеде мағаа тоғас парған. Ол миннең чуртазымнаңар сурған. Пір арғызының телефоны пастыра палғалыс тударға кӱстенгенӧк.
Соонаң пірее чирде тоғас парчаңмыс, че чоох алызарға киліспеен. Ол ипчіліг, ікі пала ӧскірчеткен. Мин дее ол туста сӧбіреліг полғам. Че пірсінде мағаа туғаным хомай тылаас искірген: «Сатик ӱреен». Андағ ачых-чарых кӧңніліг кізі чуртастаң піди ирте парыбызар тіп хаҷан даа сағынмаам. Мин аны халғанҷы чолға ӱдезерге чӧрбеем. Чыллар иртіскеннер. Че нимезі чапсыстығ - ол мағаа удаа тӱске кірҷең. 10 чыл изере Сатик тӱзімде уғаа мӧңіс, мин, тізең, аны кӧр салзам, ӧрінчеңмін, че ол кӱлінмечең дее, уғаа тарынҷах полҷаң. Анаң мағаа пір таныс ипчі чоохтаан: «Син, аның тӧреен чирінзер парып, адын адап, олған-узахха тадылығ ниме читір пир».
Улуғ кізінің чооғын истіп, мин, арғызымның аалынзар чидіп, Сатиктің іҷезінзер кіргем. Ол мині пастағызын на кӧрген, адымны чоохтап, танысхам. Ол, адымны ла истіп, ылғап сыххан. «Я, - тіпче, - Сатик, школада ӱгренчеткенде, синнеңер мағаа удаа чоохтачаң полған». Ана андада ла мин аның мағаа хынғанын сынынаң піліп алғам. Че орай. Сурығлар кӧп полған - ноға ол мағаа позының чӱреен, хынызын азынмаан? Чалтанған ма, андағ оңдай табылбаан ма? Ана іди чуртаста мин пастағы хынызымнаң частых халғам. Сынында, тізең, мин часкалығ кізі полтырбын, минің хынызым тикке иртпеен.
Чииттерге чоохтирға сағынчам, чалтанмаңар постың чӱреен азынарға, хынчатхан кізее сынны читірерге.
Автор :
Антонина БУРНАКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде