«ГРЕКТЕР» СІЛІГ КӰРЕСКЕННЕР, ОЙДА-ТӰҢДЕРЕ ТАСТАСХАННАР
05.02.2019
Хабарлар
Кибісте - чииттер. 1-2 февральда «Ағбан» спорткомплексте грек-рим кӱрезінҷе Сибирьдегі федеральнай округтың первенствозы ирткен. Анда сыйыхтығ орыннар ӱчӱн хазыр харбасханнар
СПОРТ ПАЙРАМЫ
Чӱрекке ӧрініс толча - хайдағ айдас алып-кӱлӱктер пістің чирзер чиде салдылар. Пірсі пірсінең артых пілдірче, уғаа ізестіг пастырыс чӧрчелер. Аннаңар даа кӧрігҷілер аразында хынығ чоох-чаах ӱр нимеске дее тохтабинча. «Тігі оолны кӧрчезер бе?.. У-у, хайдағ хандыра табан - Европа чемпионы!.. Кӱрес сілиине ӧкерсінерге сағынчатсар, аннаң харах албаңар... Че-е, пістің дее ооллар хомай ниместер чи. Василий Топоев прайзын оой ла чатырғлап салар», - ӱлесчелер сағыстарынаң.
Ӱр ниместе улуғлар аразында Россия чемпионадында харбазып, ӱзінҷі орын утып алған Василий Топоевті іди тың махтапчатхан иренге сах андох хатхырыс сыхханнар, мында 16 - 18 частығлар кӱресчелер тіпчелер. Анзы, ачырған парып, ибзер парарға тимненібістір. Пеер Василий хайди сіліг харбасчатханын, пасхаларын кӧксі азыра махалығ учухтырчатханын кӧрерге килтір.
- Одыр, одыр, ир табан! Чииттерібіс тее Василийдең халбинчалар, ідӧк сіліг харбасчалар. Паза хаҷан кӧрерге килізер мындағ спорт пайрамын, - тохтатчалар аны хости одырчатханнар.
Марығның ікінҷі кӱнінде кӱрес кӧрерге килген Хакасияның пазы Валентин Коновалов, ағаа сӧс пирілгенде, Ағбанда, тиксі республикада хайдағ улуғ спорт пайрамы иртчеткенін, кибістегі тоғазығлар чииттерні пик сындырлығ поларға, сидіктер алнында тӧдір пазынмасха кӧніктірчеткенін таныхтаан.
Спорт пайрамынаңар чоох парыбысханда, грек-рим кӱрезінҷе Ағбанда СФО марии халғанҷызын хаҷан ирткенін сағысха кирерге сидік пілдірген. Арға-мӧрійде 2000 - 2002 чылларда тӧреен чииттер араласханнар. Сибирьдегі 9 регионнаң 234 кӱресчі чыылысханы искірілген. Оларның аразында СФО, Россия, Европа марығларының араласчылары, сыйыхтығ орыннарға сыххан кӱресчілер парлар. Пістің чирзер киліп, Ағбандағы кибісте сіліг кӱрес кӧзідерге, кӧрігҷілерге ӧрініс сыйлирға тимде полғаннар.
ӦРІНІС ПАЗА ХОМЗЫНЫС
- Пістің кӱресчілерібіс санынаң ӱс кізі финалда, читі кізі хола медаль ӱчӱн харбазар. Піреезі чиңіс тударға кирек, - ӱлескен позының сағыстарынаң Хакасияның чииттер командазының улуғ тренері, грек-рим кӱрезінҷе спорт узы Виталий Чичинин.
Постарының кӧдірімнерінде Олег Тороков Омск облазынаң килген Даян Нигматовнаң, Руслан Палтушев Новосибирск облазы ӱчӱн харбасчатхан Беркут Жакыповнаң, Антон Пахтаев Новосибирск облазынаң килген Максим Метаевнең алтын медаль ӱчӱн тоғасханнар. Мына хайда кӧрігҷілерге орныларынзар одырарға даа киліспин турған - прайзы даа азах узында. Хакасия пазы Валентин Коновалов, спорт министрі Владимир Кретов паза пасхалары даа харахтарын кибістең албинчатханнар - кем не утып алар ни?
Пістің улуғ ӧрінізібіске, Антон Пахтаев алтын медальнаң, Олег Тороковнаң Руслан Палтушев кӱмӱс медальларнаң, Леон Аткнин, Максим Тумояков, Вячеслав Сагалаков, Алексей Пахтаев, Тимур Кандыков хола медальларнаң таныхталғаннар. Иң хазыр оңдайда ирткен Антон Пахтаевтің алтын медаль ӱчӱн харбазии. Ағаа Новосибирск облазынаң килген Максим Метаевнең тоғазарға киліскен. Чир-суғҷыбыс спорт узына кандидат полза, аалҷы оол пастағы разрядтығ кӱресчі. Че постарының кӧдірімінде финалға сығып алғаны хайзының даа чахсы тимненізін кӧзіткен. Тоғазығның пастағы чардығы 3:1 саннаң тоозылған. Аалҷы алнында. Прайзыбыс пір ӱннең хысхырысчабыс: «Антон, алнынзар!.. Чиңіс кирек!»
Ура-а, чиңіс пісти! Кӧрігҷілер, чӱректерін пазын полбин, сегірісклеп турчалар, матап алғыстасчалар. Ибде харбасчатханда, пірее чемпион хайди даа поларға кирек. Андағ атха турысты Антон Пахтаев.
ХАЗЫР ХАРБАЗЫҒ
Кӧрігҷілернің хайзы даа сабланысха сыххалах кӱресчі ӱчӱн «ағырарға» тимде поладыр. Уламох хазыр суулас-хысхырыс пасталыбысча, хахан кибісте Европа мариинда кӱмӱс медаль утхан оол позының «ыырҷызына» сыдан полбинчатса. Мында кӱресчілер хайдаң килгеніне хайығ айландырбинчазың. Иң ӧӧні - кӱресчі ооллар постарына сала даа айабинчатханы, парчан кӱсті чиңіске салчатханы. Андағ тоғазығны кӧрерге махалығ.
Іди Омск облазынаң килген Данил Заносьев Новосибирск облазы ӱчӱн турысчатхан Эльмир Исмаиловнаң тоғасханда, кізілер суулазы ӱр нимеске дее тохтабинчатхан. Европа мариинда араласхан, кӱмӱс медаль утхан Эльмир Исмаилов, кӱрес пасталғандох, Данилні 2 санға махалығ учухтырыбысхан, сах андох «накат» идібіскен. Маңат тимненіс кӧзітчеткен Эльмир 4:0 саннаң алнында парча.
«Синің кӱзіңні кӧрдім, амды минің сӱмемні кӧр хал», - піди сағынған осхас Данил, «ыырҷызын» кӧксі азыра оңнығ сіліг учухтырыбысхан туста. Марығ чарғыҷызы ағаа 4 сан пирче. Хайдағ суулас кӧдіріл килді кізілер аразында. «Кӧрдің ме, Европа чемпионы хайди махалығ учуға халды?!. Ир полза, Данил осхас поларға кирек», - ӧрінісчеткеннерін чазырбинчалар кӱрес кӧрчеткеннер.
Ол туста алып-кӱлӱктер пазох ла хабыза-тартыза халдылар. Эльмир тиктең не Европа мариинда сыйыхтығ орынға турыспаанын кӧзіт пирерге харасча, Новосибирсктең килген оолны кибіссер силібісче, сах андох «накат» итче - ағаа 2, анаң пазох 2 сан пирілче. Амды ол 8:4 саннаң алнында парча.
Мин дее минӧкпін, минде дее сӱме парох теен чіли, Данил табырах хайынып пастабысхан, Эльмирге тудынҷаң-хабынчаң оңдай пір дее пирбинібіскен. Анаң, оңдай киліскенде, мике салып, пазох ла кӧксі азыра уғаа махалығ учухтырыбысхан - 4 сан алған.
Данил, тізең, пу чидігде тохтирға сағынминча, сала даа тӧдір пазынминча, уламох алнынзар сыынча. Хосханах-а, пазох ла кӧксі азыра учухтырыбысты. Амды марығ чарғыҷызы ағаа 2 ле сан пирче. Че анзын чиңіс санына санирға чарир. Эльмир хайди даа силерге харасса, Данил аны турыстығ удурлапча, піліп арачыланча. Іди сіліг харбазып, пістің махабысты хандырған Омсктаң килген кӱресчі оол.
Антон ПАХТАЕВ чиңіс тутты
ОҢ ПОЛЗЫН ПІСТІҢНЕРГЕ
Прайзыбысха спорт пайрамын сыйлаан паза сіліг кӱреснең ӧрініс ағылған СФО марии тоозыл парғанда, Хакасияның чииттер командазының улуғ тренері Виталий Чичининнең чоохтасчабыс. Виталий Григорьевичтің ӧрінізін оңарарға чарир. Арға-мӧрійнің салтарлары андағ ла хомай нимес. Тиңнестіріге алза, Иркутск, Томск областьтарының, Алтай Республиканың пір дее чемпион чоғыл, сыйыхтығ орыннарға сыххан кӱресчілер дее саны андағ ла кӧп нимес.
- Хызылчар паза Омск городтарда Кӱрес академиялары хаҷаннаң тоғынча. Иркутск, Томск, Новосибирск осхас килкім городтарнаң піске тиңнезерге ідӧк сидік. Че 2018 чылның кӧзідімнерінең тиңнестірзе, амғы ӧзіс харахха кӧріндіре, - ӱлесче позының сағыстарынаң Виталий Чичинин.
- Пістің ооллар аразында чахсы кӱресчілер парлар. Улуғ марығларда аралазарға опыттары читпинчеткені пілдірче. Сағынчам, Россия первенствозында піреезі хайди даа сыйыхтығ орынға сығып аларға кирек. Чиңіс тутсалар, уламох ӧріністіг поларҷых, - чоохха хозылча грек-рим кӱрезінҷе чоннар аразындағы класстығ спорт узы, улуғлар аразында Россия чемпионы полған Валерий Боргояков.
Тӧреен чирібісті махтаға сығар турған кӱресчінің алғас сӧстері ухаанҷыластығ ползын тіп алғирға халча. Оң ползын Россия первенствозында пістің чир-суғҷыларыбысха.
ИҢ АРТЫХТАРЫ
Амды, СФО мариинда аралазып, хайдағ алып-кӱлӱктер постарының кӧдірімнерінде сыйыхтығ орыннарға сығып алғанын кӧзітчебіс.
42 кг -
1 орын - Даян Нигматов, Омск облазы;
2 орын - Олег Тороков;
3 орын - Леон Аткнин паза Максим Тумояков, прайзы Хакасия;
45 кг -
1 орын - Дмитрий Долженко, Алтай крайы;
2 орын - Павел Уколов, Иркутск облазы;
3 орын - Хожиакбар Кулдашев, Хызылчар крайы, паза Мухаматазиз Маткаримов, Новосибирск облазы;
48 кг -
1 орын - Алибек Амиров, Омск облазы;
2 орын - Хаджиму-рад Камалов, Хызылчар крайы;
3 орын - Андрей Лобанов паза Айан Артушев, ікізі Алтай Республика;
51 кг -
1 орын - Беркут Жакыпов, Новосибирск облазы;
2 орын - Руслан Палтушев, Хакасия;
3 орын - Вячеслав Сагалаков, Хакасия, паза Арсений Ермолович, Новосибирск облазы;
55 кг-
1 орын - Данил Заносьев, Омск облазы;
2 орын - Эльмир Исмаилов, Новосибирск облазы;
3 орын - Илларион Туприн, Хызылчар крайы, паза Максим Жижин, Иркутск облазы;
60 кг -
1 орын - Руслан Хамзин, Омск облазы;
2 орын - Мухаммад Ахмедов, Новосибирск облазы;
3 орын - Осман Ахмедов, Хызылчар крайы, паза Алексей Пахтаев, Хакасия;
65 кг -
1 орын - Андрей Денисов, Хызылчар крайы;
2 орын - Ян Карабцов, Новосибирск облазы;
3 орын - Виктор Филиппов, Омск облазы, паза Владимир Стариков, Хызылчар крайы;
71 кг -
1 орын - Антон Пахтаев, Хакасия;
2 орын -Максим Метаев, Новосибирск облазы;
3 орын - Вадим Степанов, Иркутск облазы, паза Тимур Кандыков, Хакасия;
80 кг -
1 орын - Дмитрий Баборыко, Хызылчар крайы;
2 орын - Михаил Воликов, Новосибирск облазы;
3 орын - Семён Евдокимов, Новосибирск облазы, паза Артур Демурчян, Хызылчар крайы;
92 кг -
1 орын - Никита Терехов, Хызылчар крайы;
2 орын - Егор Сотников, Алтай крайы;
3 орын - Тимофей Шувалов, Томск облазы, паза Никита Швец, Алтай крайы;
110 кг -
1 орын - Никита Шкода, Кемеров облазы;
2 орын - Александр Мелехов, Новосибирск облазы;
3 орын - Данил Дьячков, Новосибирск облазы, паза Матвей Черниговский, Иркутск облазы;
120 кг -
1 орын - Аркадий Бояринцев, Новосибирск облазы;
2 орын -Лев Левин, Алтай Республика;
3 орын - Андрей Горожанкин, Алтай крайы, паза Денис Сурмач, Хызылчар крайы.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде