МАРЫҒДА УСТАРЫ ТАПТАЛЧА
12.03.2019
Хабарлар
Кӱрес. Асхыста С.З.Карамчаковтың адынаң спорткомплексте 2007-2009 чылларда тӧреен оолағастар паза хызыӌахтар аразында Асхыс аал чӧбі пазының сыйиина олаңай кӱресче азых турнир ирткен.
Cпорткомплекстiң кӱрес залына чит килзең, андартын олғаннарның ӧтіг табыстары истілче. Хайди пілчезер, палалар сым одыр полбинчалар. Турнир азылар алнында ікі кибісте пастағы хабыстар пасталыбысхан. Анда 10-12 частығ олғаннар араласчалар. Аның сылтаанда оларның хай піреезі сімеркені чахсы пілбинче, че кӱрезерге прай чӱреенең кӱстенче. Ол арада чарғыҷыларның ӧӧнін таап алар сағыс тудыбыстым. Пӱӱн Станислав Майнагашев ӧӧн чарғыҷы полчаттыр. Прай 150 пала марыға килгеннеңер Станислав Фадеевич чоохтап пирген. Ағбан городтаң, Ағбан пилтірі, Алтай, Таштып, Пии паза Асхыс аймахтарынаң кӱресчілер арға-мӧрійде кӱстерін сынапчалар.
Олғаннарның кӱӱлесчеткеніне пірееде чарғыҷы-искірігҷі ниме тіпчеткені истілбин дее парча. Палалар постарын кибіске хығырғаннарын испин халчалар. Че анзы пірееде ле, кӧбізі кибіске сығарын чидікпин сағыпча.
Арға-мӧрій азылчатханнаңар чарлапчалар, кӱресчілер соон сӱрістіре залзар кірчелер. Оларны, тізең, кӧрігҷілер паза марығ азарға килген пастыхтар айа сабызынаң удурлапчалар. Кӱресчілер кибістің пір саринда турыбыстылар, пасха саринда - пастыхтар. Асхыс аал чӧбінің пазы Марина Алексеевна Анжиганова, Хакасияның спорт министрінің орынҷызы Виталий Валерьевич Мордакин, Хакасия Ӧӧркі Чӧбінің депутаттары Геннадий Степанович Канзычаков паза Олег Альбертович Иванов, спорткомплекстің устағҷызы Александр Александрович Челтыгмашев паза чарғыҷылар, ідӧк изере турып, спортсменнерні улуғ марыға алғааннар.
Анаң марығ узарадылған. Наа кӱресчеткен палалар, хайди даа кӱстензелер, олаңай кӱреснең илееде айғас париған палаларға аңдартыбысчатханнар. Іле кӧрінче, «ыырҷыны» аңдара сӧӧртеп тее алза, сас ойда айландыр полбинча. Че кӱресчілернің кӧбізі сімеркелерін кӧзітчеткен.
Мындағ турнир часхызар иртіріледір. Анда тренерлернің ӱгредіг чылының тоғыстары кӧрінче. Паза таныхтирға кирек, палаларны аймах-пасха марығларға ал чӧрзе, оларның устары тапталча.
Кибістегі чарғыҷылар кӱресчілерні матап ситкіп кӧрчелер, тізекке тӱскенҷе парчалар. Хай туста холлары палаларны сала тохтатпинчатханға тӧӧй. Хости одырған чарғыҷы ооллардаң сурғам, ноға іди тудынчалар тіп. Чарыда чоохтап пиргеннер. Кӱресчілер хол-азахтарын изі чох, толғап, тартыбыспазыннар тіп кӧрчелер. Олар хайди ла полза, удур-тӧдір иреес парчалар, сизінмин, кізіні кинет тее саларлар. Аннаңар даа марығ амыр ирткен.
Кӱресчілернің ікі кибісте хабысчатханнарын кӧр халарға тіп, аар-пеер хылчаңнаан аразында, финал харбастары чит килтір.
Орыннарны піди ӱлескеннер. Хызыҷахтардаң пастирбыс.
33 кг -
1 орын - Валерия Косточакова, Асхыс аймаа;
2 орын - Софья Агафонова, Ағбан;
3 орын - Лия Мамышева, Ағбан паза Дарья Субракова, Алтай аймаа;
36 кг -
1 орын - Юлия Позднякова, Таштып аймаа;
2 орын - Дарья Корнилова, Асхыс;
3 орын - Айлана Сагалакова, Таштып паза Виктория Нербышева, Ағбан;
39 кг -
1 орын - Дарья Боргоякова, Асхыс;
42 кг -
1 орын - Ирина Калягина, Ағбан пилтірі;
2 орын - Валерия Ахпашева, Асхыс;
3 орын - Елена Боргоякова, Ағбан паза Дарья Валиулина, Алтай;
46 кг -
1 орын - Лилия Ульянова, Ағбан;
58 кг -
1 орын - Анжелика Карачакова, Асхыс;
2 орын - Софья Сапачева, Алтай аймаа;
3 орын - Любовь Тиникова, Ағбан.
Оолағастар аразында:
24 кг -
1 орын - Виталий Чебокчинов, Алтай;
2 орын - Сергей Иридеков, Асхыс;
3 орын - Илья Боргояков паза Иван Ильев, Асхыстаңнар;
26 кг -
1 орын - Камзар Косточаков, Асхыс;
2 орын - Дмитрий Туртугешев, Таштып;
3 орын - Сенгил Дун, Ағбан паза Тагир Кольчиков, Асхыс;
28 кг -
1 орын - Сергей Досымбаев, Асхыс;
2 орын - Олег Зуев, Асхыс;
3 орын - Кирилл Чанков, Асхыс паза Богдан Итеев, Таштып;
30 кг -
1 орын - Станислав Тюдешев, Асхыс;
2 орын - Илья Щербаков, Таштып;
3 орын - Марк Щербаков, Таштып паза Павел Родик, Алтай;
32 кг -
1 орын - Владимир Боргояков, ЦСКА-Хакасия;
2 орын - Баел Талипов, ЦСКА-Хакасия;
3 орын - Богдан Рехлов, Алтай паза Денис Трушин, Таштып;
35 кг -
1 орын -Кирилл Челтыгмашев, Асхыс;
2 орын - Данил Тюнистеев, Асхыс;
3 орын - Сергей Канадаков, Алтай паза Тимурлан Мамытов, Ағбан;
38 кг -
1 орын - Илья Чаптыков, Асхыс;
2 орын - Михаил Лихачевский, Асхыс;
3 орын - Глеб Креймер, Ағбан паза Максим Боргояков, Асхыс;
41 кг -
1 орын - Ренат Килижеков, Ағбан;
2 орын - Павел Пакачаков, Асхыс;
3 орын - Артур Мишаков, Асхыс паза Тимур Кенжаев, ЦСКА-Хакасия;
44 кг -
1 орын - Владислав Перфилов, Таштып;
2 орын - Степан Зуев, Таштып;
3 орын - Карим Валиулин, Алтай паза Кежик Быштак-оол, ЦСКА-Хакасия;
48 кг -
1 орын - Саид Алиев, Ағбан;
2 орын -Елисей Русак, ЦСКА-Хакасия;
3 орын - Лев Топоев, Асхыс паза Тимир Чебодаев, Ағбан;
52 кг -
1 орын - Егор Майнагашев, Асхыс;
54 кг -
1 орын -Аймир Мамышев, Таштып;
75 кг -
1 орын - Никита Канзычаков, Асхыс;
2 орын - Егор Шевцов, Ағбан;
3 орын -Павел Доможаков, Асхыс.
Чиңісчілерге медальлар, Аарластығ пічіктер пиргеннер. Пастағы ікі орын алғаннарға ахчалығ сыйыхтар читіргеннер. Чахсы кӱстеніп кӱрескеннерге ідӧк ахчалығ сыйыхтар полған. Палалар тың ӧрінчеткеннер. Сыйыхха ахча алза, хайди ӧрінмес, кічігдең сығара пілчелер ахча паазын. Іди иптіг, амыр иртті пу марығ.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде