САЙБАҒҶЫЛАРНЫ ХАТЫҒЛИРҒА КИРЕК
13.03.2019
Хабарлар
Чыылығ. Хакасияның пазы Валентин Коновалов правительство кізілерінең экологияны хайраллир паза ӧрттер сығарбас сурығларҷа чыылығ иртірген.
Чыылығда Хакасия пазының орынҷызы Юрий Курлаев, чир-чайаан ис-пайы паза экология министрінің тоғызын толдырчатхан Сергей Арехов, Росприроднадзорның Хакасияҷа управление устағҷызының тоғызын толдырчатхан Григорий Рипский паза республиканың гражданскай арачыланысча, сағыбаан саайларҷа паза ӧрттердең хорғыс полдыртпазынҷа управление пастығы Николай Старков араласханнар.
Чыылығны азып, Валентин Коновалов таныхтаан:
- Республикада экологияны хайраллирына паза ӧрттер сығарбазына алынҷа хайығ саларға кирек. Піс ӱр ниместе экологияны хайраллир сурығны Ӧӧркі Чӧпте ӱзӱргебіс. Ол сурығ прай чуртағҷыларны сағыссыратча. Кии, суғлар кірлелче. Андағ киректі тӱзедерге халых пірігістерінең хада тоғынарға кирек. Сайбағҷыларны хатығлирға, нандырыға тартарға киректелче. Чир-чайаанны хайраллир пӧгіннең хайдағ тоғыс апарарын ӱзӱрербіс.
Хайди искірген Григорий Рипский, кізілер сӧп-сапты чарадылбинчатхан орыннарда тӧкчеткен сылтаанда экология сайбалча. Ӧӧнінде ӧнетін полигоннар чох чирлерде андағ сайбағлар таныхталча. Суғларны ЖКХ предприятиелері кірлепчелер. Пригорскта, Ширада суғны арығлаҷаң системалар иргілен парғаннар, оларны нааҷылирға ахча чидіспинче. Киині Ағбанда паза Харатаста ағас туралардағы пестер, алынҷа котельнайлар, автотранспорт кірлепчелер. Городтар чабыс орында турчалар, чил чох кӱннерде оларның ӱстӱнде ыс ӱр тудылча. «Аршановский» разрез сыныхталғанда, анда илееде сайбағ ілезіне сығарылған. Аның устаана административнай киректер азылған. Ікі ай аразына сайбағларны тӱзет саларлар.
Хакасияның пазы ӧрттер сығарбас сурығны кӧдірген. Аның чооғынаң, хуруғ от уғаа оой тамыл парыбысча. Ирткен чыллардағы осхас ӧрттер полдыртпазына улуғ хайығ айландырарға кирек. Чуртағҷылар ам тынанарға арығларзар парчалар, анда от тамысчалар.
Николай Старковтың искіриинең, пӱӱл арығларда 14 ӧрт сыххан. Ӧрттер сығарбас сағыбаан саайларҷа комиссияның чыылиинда ӱзӱрілген. Арығларда патрульлар дежурство апарчалар, ідӧк пу тоғысха пос кӧңнінең полысчатхан дружиналар тартылчалар. Амды ӧрттердең тоғыр режим кирерге кирек. Андағ режимні пӱӱл ирте кирзе, чахсы полар. Чуртағҷыларнаң профилактика тоғызы апарылча.
Чыылығда ідӧк суғлар чайылар сурығны ӱзӱргеннер. Юрий Курлаевтің чооғынаң, Ағбан суғдағы пус Хубачар аал хыринда чара чачырадылар. Хорғыстығ орыннарда пус харадылча. Гидротехническай пӱдіріглер суғлар кӧдірілеріне тимделер. Аалларда чуртағҷыларнаң чоохтазығлар апарылча. Тағларда, тайғаларда пӱӱл харның сині пылтырғызынаң асхынах, суғлар чайыларынаң хорғыс улуғ полбасха кирек.
Чыылығны тоозып, Валентин Коновалов прайзының хайиин чахсы тоғынарына айландырған, прай хорғыстарға азынада тимде поларға чахаан.
Сайбағҷыларны хайди даа хатығлирға кирек полчатханын алынҷа таныхтаан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде