«ЧАТХАННЫҒ ООЛАХ» ХООС - ЧИҢІСЧІ
16.01.2019
Статья
Алина паза Прасковья ТИСПИРЕКОВАЛАР
Марығ салтары
Пістің республиканың «Хабар» газетазы Наа чылға удур олғаннарның аразында «Хайхастығ чир-суум» хоостар мариин чарлаан. Пастағы орынға турысхан хоосты 2019 чылның календарьына сығарардаңар молҷағ полған.
Тиксі 40-ха чағын хоос кірген. Марығда Асхыс аймаандағы школаларның ӱгренҷілері ӧткін араласханнар. Олғаннар Асхыстағы лицей-интернатта, Чоғархы Асхыстағы, Пилтірдегі 2 №, Казановтағы, Ис пилтіріндегі паза Пуланнығ кӧлдегі ортымах школаларда ӱгренчелер. Ідӧк Таштып аймаанаң Пыдырахтағы школаның ӱгренҷілері хоостарын ысханнар.
«Хабар» газетаның жюризі, иң чахсы хоостарны таллап, полған на хоос ӱчӱн ӱн пирген. Іди пастағы орынға Пилтірдегі школаның 6-чы класстағы ӱгренҷізі Алина Тиспирекова «Чатханнығ оолах» хоозынаң сыххан. Амды аның тоғызы 2019 чылның календарьын чазапча. Алинаны прайзыбыс алғыстапчабыс!
Ікінҷі орын Пыдырахтағы 10-ҷы класстың ӱгренҷізі Диана Боргояковаа пирілген. Ӱзінҷі орынға ікі хызыҷах турысхан: Пилтірде чурттығ 5-ӌі класстың ӱгренҷізі Прасковья Тиспирекова паза Чоғархы Асхыс аалның кічіг чуртағҷызы, 3-ӌі класста ӱгренчеткен Олеся Кичеева.
Піс, «Хабар» газетаның тоғынҷылары сыйыхтарны чиңісчілерге читіріп, аалларҷа чӧр килгебіс. Наа чылға тадылығ сыйыхтар паза газета адынаң грамоталар пирілген.
Пӱӱнгі сығарыста хығырығҷыларны Алина паза Прасковья Тиспирековаларнаң таныстырчабыс. Олар хада тӧреен пиҷе-туңма полчалар. Хоостирға хынчатхан хызыҷахтар Пилтірдегі олған искусство школазынзар 1-ғы класстаң чӧрчелер.
Марыға ызар хоостарын пір неделя тимнептірлер. Алина «Чатханнығ оолах» хоозын ӧңніг сырларнаң чайаан полза, Прасковья, гель ручканаң тузаланып, графика оңдайынаң «Аңчы» хоосты хоостаптыр. Хызычахтарға чӧптернең ічелері Наталья Константиновна полыстыр. Пастағызын кічіг хоосчылар хайдағ хоос чайирға сағынып ал ғаннар, анаң на тоғынып пастааннар. Прасковья киикчінні хоостирға сала сидіксінген, че хусты килістіре хоостирға сыданған. Аның хузы киртістіг омалал партыр.
Прасковья «5»-ге ле ӱгренче, Алинаның дневнигінде ікі ле «4» сыххан. Хызыҷахтар хоостирынаң пасха теелбектернең айғасчалар. Пасталығ школадаң сығара ӱгреністе паза чайаачы киректе, пӧзік чидіглерге чидіп, сыйыхтар сыбыра алчалар. Грамоталары илееде пар полтыр. Іди олар аймах, республика паза Россия синінде махтаға сыхчалар.
Алина школа соонаң имҷее ӱгренерге сағыс тутча. Прасковья, тізең, архитектор поларға пӧгінче. Хызыҷахтарның хынған сағыстары толзын, оларға мыннаң мындар уламох пӧзік чидіглер алғапчабыс.
Тимнеен Елена САГАТАЕВА.
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде