ИҢ КӦП КІЗІ ОҒЫРЛАС ӰЧӰН ЧАРҒЫЛАТЧА
03.03.2020
Хабарлар
Пресс-конференция. Хакасияның Ӧӧркі чарғызында республика чарғыларының ирткен чылдағы тоғыс салтарларынҷа пресс-конференция ирткен
Пресс-конференцияны иртіргеннер Хакасияның Ӧӧркі чарғызының кнезі Виктор Носов, Ӧӧркі чарғы кнезінің гражданскай киректерҷе орынҷызы Сергей Доможаков, Ӧӧркі чарғының уголовнай киректерде чарғы коллегиязының кнезі Виктор Нуртынов. Виктор Носовтың чооғынаң, республика чарғыларының ирткен чылдағы тоғыс салтарларын ӱзӱрер пресс-конференция чыл сай иртірері кибірге кір парған. Прай чарғылар гражданскай паза уголовнай киректерні кӧрерінде улуғ тоғыс апарғаннар. Хакасияда присяжнайлар араласчатхан чарғылар тоғынып пастааннар, че ноға-да чарғылатчатхан кізілер присяжнайларнаң тузаланарға тың кӱстенминчелер. Амды прай аймахтардағы чарғыларда аралазар присяжнайлар списоктары тимнел парған.
Пресс-конференцияда республика чарғыларының ирткен чылдағы тоғыс салтарларынаңар хысхаҷахти мындағ саннар пирілген. Іди 2019 чылда Хакасияның федеральнай паза мировой чарғыҷылары, прай 163219 кирек кӧріп, чарадығ алғаннар, ол санда 4907 уголовнай кирекче, 128630 гражданскай паза административнай кирекче, 29682 административнай сайбағлардаңар киректерде. Прай кӧрілген киректер саны 4,2 % ӧс парған.
Пылтыр аймах хатығластарға 4155 кізі чарғылатхан, анзы 2018 чылдағызынаң 10,4% асхынах. Иң кӧп кізі (1306) пасха кізінің собственнозынаң тоғыр сайбағ иткен ӱчӱн чарғылатхан, ӧӧнінде оғырлас иткен ӱчӱн - 957 кізі. Наркотиктернең палғалыстығ сайбағлар иткен ӱчӱн чарғылатханнарның саны хызырылча. Іди 2018 чылда 739 кізі чарғылатхан полза, пылтыр андағ сайбағ ӱчӱн 661 кізі хатығлатхан.
Кізі чуртазынаң паза хазиинаң тоғыр сайбағлар иткен ӱчӱн кӧп кізі чарғаа тартылған. Пылтыр андағ сайбағлар ӱчӱн 258 кізі чарғылатхан, анзы 2018 чылдағызынаң 3,4 % асхынах.
Чолларда хорғыс чох чӧрер паза транспортнаң тузаланар сферада иділчеткен сайбағлар саны хызырылчатханы таныхталча. 2018 чылда андағ сайбағлар ӱчӱн 883 кізі чарғылатхан полза, пылтыр ол сан 798-ке тиңнелген.
Коррупциянаң палғалыстығ статьяларда пылтыр читі кізі чарғылатхан, 2018 чылда - 17 кізі. Мында коррупциядаң тоғыр кӱрезіг республикада чахсы апарылча тиирге чарабас. Право хайраллаҷаң органнар пу сферада уйан тоғынча поларлар алай андағ киректерде істезіг ам даа апарылча.
Чарғылатхан чазы читкелектер саны ідӧк хызырылча. 2018 чылда 79 чазы читкелек чарғылатхан полза, пылтыр ол сан 55 кізее тиңнелген. Чарғылатхан чазы читкелектернің 32,7% пір дее чирде тоғынминчатхан паза ӱгренминчеткен. 2018 чылда андағ сан 35,4 % полған.
Республикада пылтыр харибде одырарға 1294 кізі чарғылатхан (2018 чылда - 1397 кізі). Прай халған чуртазын харибде одырарға пылтыр ікі кізі чарғылатхан (Россияда - 63 кізі). Условнай оңдайнаң харибде одырар хатығлас пылтыр 1184 кізее пирілген, тӱзедігліг тоғыстарға 257 кізі чарғылатхан, хайди даа толдырҷаң тоғыстарға - 990 кізі.
Хайди Виктор Нуртынов таныхтаан, амды кізіні ахтапчатхан чарадығлар алылчатханы хазнада гражданскай общество тиліпчеткенін таныхтапча. Андағ чарадығларнаң апелляция инстанциязы удаа чараспинча. Андағ киректер пастағы инстанцияда хати кӧрілчелер. Халғанҷы туста хайди даа толдырҷаң тоғыстарға кӧп кізі чарғылатхан, ідӧк чарғыҷылар тӱзедігліг тоғыстарға чарғылир хатығласнаң удаа тузаланчалар.
Прай халған чуртазын харибде одырарға чарғылатхан ікі кізідеңер чоохтаза, пірсі - таксист Лебедь, хайзы, кӱл салып, тӧрт кізінің чуртазын ӱскен. Ікінҷі кізі - пис кізіні турада ӧртеп, чох ит салған.
Амды чарғыдыларның тоғызын нииктир пӧгіннең, чарғы істезігҷілері институдын тӧстир сурығ ӱзӱрілче. Ағаа Россияның Ӧӧркі чарғызының кнезі Вячеслав Лебедев чӧпсінче. Ол сурығ ам даа ӱзӱрігде.
Сергей Доможаковтың чооғынаң, гражданскай паза административнай киректер кӧп кізее теелче. Чарғызар кірген андағ прай материаллар тузында кӧрілчелер. Оларны чарадарға оой нимес. Кӧп кирек істеніс, банктарда кредит алған сфераа теелче. Ідӧк чоллардағы саайлардаңар кӧп кирек кӧрілче. Руль кистіне ізілік одырарға чарабас, ол хайди даа чобаға ағылар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде