ПӦЗІК ЧИДІГЛЕРЗЕР ПАСТАҒЫ ХААЛАҒЛАР МЫНДА ПАСТАЛЧА
31.03.2020
Хабарлар
Аалдағы спорт. Таштып аймаандағы Аңчул аалда олаңай кӱрес чахсы тиліпче
Тайға-тасхыллар аразында, улуғ чолларның тастыхти иптіг-амыр чуртазын апарчатхан Аңчул аалда пӧзік чидіглерге читкен кізілер кӧп полған, пар, ам даа полар тіп сағынчам. Ол санда спортта сабланчатханнар. Пу аалдаң сананаң чӱгӱрчеткен кустіг спортсменнер, амғы туста шахмат ойнапчатханнар удаа истіле тусчелер. Че иң кӧп сабланысты аалларына ағылчалар куреснең айғасчатханнар. Хайди таныхтапча позының аалына чарыдылған «Аңчул аал» киндезінде Вениамин Шулбаев, кибісте пӧзік чидіглерге читкен чир-суғҷыларының аразында 11 спорт узы. Таныхтирға кирек, Вениамин Прокопьевич позы даа чиит туста самбонаң айғасхан.
Амғы туста даа Аңчулдаң уғаа чахсы кӱресчілер сыхханнар. Чон аразындағы класстығ спорт узы, чииттер аразында Европа марииның чиңісчізі Мария Тюмерекова олаңай кӱреснең айғазарға позының тӧреен аалында пастаан. Аңчулдағы оолағастарны, хызыңағастарны кӱреске кӧніктір парча Юрий Тюмереков. Хаҷан-да позы чахсы харбасхан, спорт узы атха турысхан. Чоохха киліскенде, ол Хакасияның олаңай курезіне кӧп хозым иткен, таланттығ тренер полған Иннокентий Тюмерековтың туңмазы полча.
Мин Аңчулда маңнаныстығ тоғын парчатхан Юрий Тюмерековнаң, тоғазып, чоохтазып аларға хаҷанох сағын чӧрчеткем. Че хайди-да чолларыбыс киліспин турған. Чуртас ағынында килістіре тус учурабинчатхан. Ӱр ниместе, тоғыс хоостыра Таштыпта полғанымда, Юрийнең тоғас парғабыс. Пазох маңзыт аразында даа полза, изеннезіп алып, кӧп нимес чоох-чаахнаң турып алғабыс. Тренер кізінің чахсы хабары пар полтыр. Ӱр ниместе аның ӱгренҷізі Николай Уксеков Сибирьдегі Федеральнай округтың мариинда 1-ғы орын алып алтыр. Марығ Тува Республиканың кінінде, Хызыл городта ирттір. Чоғархы Таштыптағы ортымах школаның 9-ҷы класстағы оол 52 килограмм кӧдірімде прайзын хыра уттыр. Ол марығда Тува Республиканың, Кемеров паза Хызылчар городтарның кічіг алыптары араластыр. Мыны санға алза, кічіг аалдаң парған оолның позын турыстыра кӧзіткеніне морсынарға килісче. Чиит куресчінің чидии ағаа спорт узына кандидат ат аларға оңдай пирче. Пічіктер тимнебізіп, ызыбысхабыс тіпче Юрий Николаевич. Сизінгенде, Аңчулда пазох пір чахсы кӱресчі улуғ спортсар чолын пастапча.
- Колядаң пасха, минің ӱгренҷілерім Алёша Миягашев паза Никита Шулбаев марығда араласханнар, - чоохтапча Юрий Николаевич. - Ол ікӧлеңе оң полбаан. Мындағ синніг марығларға чӧрер ӱчӱн, ам даа кӧп тоғынарға кирек пу оолағастарға. Тимненістері чахсы даа полза, опыттары читпинче.
Аңчулдаң парған ооллар Хакасияның піріктірілген командазына кіртірлер. Ол 27 куресчінің аразында ӱзӧлең 2-ҷі орын алтырлар, пір оол 3-ҷі орынға сыхтыр. Пу салтарларны кӧрзе, кибісте харбазығлар хазыр парған осхас.
Аңчулдағы олаңай кӱреснең айғасчатхан оол-хыстарның чидіглерін санға алза, олар уғаа чахсы спорт залында устарын таптапчалар тіп сағынчазың. Че сынында андағ нимес. Пӱӱнгі кунде Юрий Николаевич Аңчулда паза Чоғархы Таштыпта тоғыс апарча. Харын пу ікі аалның аралары ырах нимес. Аннаңар тренер прай чирде маңнанча. Аңчулдағы олғаннар советтер тузындох пӱдірілген школаның туразында айғасчалар. Чоғархы Таштыптағылар ідӧк иргі турада чыылызып алчалар. Пу тренировка иртірҷең ікі орынны спорт залы тіп полбассың. Матап тирлеп парған соонаң чайыныбызардаңар чоох таа чоғыл. Сағынчам, пасха даа аалларда тың на пасха полбас. Аннаңар пір саринаң олғаннарға айапчазың. Че пасха саринаң олар чуртас сидіксіністеріне маң пирбес поларға кічігдең ала кӧнікчелер.
Аалларда тренер полчатханнарның паза пір ачырғастығ ӱлӱзі пар. Олар олғаннарны кічігдӧк спортха кӧніктірчелер. Школа тоосханҷа оларны ӧскірчелер. Че тузы читсе, ӱгренҷілері пасха орыннарзар парыбысчалар. Піреезі спортта, аннаң андар ӧзіп, саблан сыхча. Ол тустарда пастағы тренерлері хайди-да тастыхти тур халчатханға тӧӧй. Че хайди полар за, пӧзік чидіглерге спортсменнерні аалда тимнеп полбассың. Чииттерге дее хайда-да ӱгренерге кирек нооза. Аннаңар аалларда тоғынчатхан тренерлернің ӱлӱзі кічиҷек хусхаҷахтарны, ханаттарын тыыдыбызып, ӧӧрлендірібізері пол парча. Андағ чуртас.
Сом «Земля таштыпская» газетаның архивінең алылған
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде