АЛЫМНАРНЫ ТӦЛИРГЕ УНДУТПАҢАР
03.03.2021
Хабарлар
Чарғы приставтары федеральнай службаның Хакасияҷа управлениенің (УФССП) устағҷызы Алёна Романова чон алымнары хоостыра брифинг иртірген.
Ирткен чылда коронавирус чуғынӌах ағырығ тарапчатханнаңар, чарғы приставтары ӧдістіг кізілерні иблеп чӧрбееннер. Че іди дее полза, Хакасияҷа УФССП 2020 чылны чахсы салтарнаң тоосхан.
Алёна Романованың чооғынаң, халғанҷы туста управлениезер кӧп толдырҷаң производство кірче, ирткен чылда оларның саны 11%-ке ӧс парған. Кӧзідімге, 2018 чылда пір чарғы приставы 2600 толдырчаң производствонаң тоғынған, 2019 чылда — 2900, 2020 чылда — 3900. Тиксі алза, Хакасияха УФССП-зар 468 муң толдырҷаң производство кірген, оларнын 157 муңынҷа алымнар тиксі 3 миллиард салковайға чыылған. Пандемия тузында чарғы приставтарының ӧӧн пӧгіні хазна бюджедіне ахча хозары полған, анзын олар 115%-ке толдырыбысханнар, хазнаның тиксі бюджедіне 1 миллиард 11 миллион салковай ызыбысханнар. Республика бюджедіне 45миллион салковай кірген, Ағбан городтың бюджедіне — 46 миллион салковай. Амғы туста иң улуғ ӧдіс — уголовнай штрафча 25 миллион салковай.
Россия президенті олған тузынын 10 чылын чарлаан сылтаанда, приставтар алимент ахчазын хызарына ӧӧн хайығ айландырғаннар. Че ӱс чыл изере алимент хоостыра толдырҷаң производстволар хызырылча. Пандемия тузында даа приставтар алимент тӧлебинчеткеннернең ӧткін тоғынғаннар. 2019 чылда тоғыс тапчаң кіннерзер 803 кізінін ӧдістері хоостыра толдырчаң производство ызылған полза, 2020 чылда — 2000 артиинаң, олардаң 172 кізее тоғыс табылған. Ирткен чылда алимент ахчазы 37 миллион салковайға кӧп чыылған. Іди чарғы приставтарының тоғызы сылтаанда палаларға 125 миллион салковай ызылған. Алымнығ кізілерге административнай сайбағлардаңар тиксі пір муңңа протокол пазылған. Ідӧк алимент хоостыра алымнығ кізілер уголовнай нандырыға тартылғаннар, тиксі 419 кирек азылған. Таныхтирға кирек, ӧдістіглернің ниме-ноозы арестке алылча паза оларға хырығ озаринзар сығарға чарадылбинча. Андағ оңдайнаң тузаланып, чарғы приставтары 44 миллион салковайха хызып алғаннар. Ідӧк олар алымнығ кізінің автомобильліг чӧрер правозын тохтадар оңдайлығлар. Ирткен чылда ікі муңңа кізінің водитель удостоверениезін алып алғаннар. Андағ оңдайнаң приставтар 13 миллион салковай чыып алғаннар.
Хакасияда даа, тиксі Россияда даа ЖКХ тӧлеглері хоостыра алымнар уғаа ағырсымнығ сурығ полча. Ирткен чылда устапчатхан компанияларға паза ТЭК-тарға алымнығ кізілерден чарғы приставтары 354 миллион салковай хызып алғаннар.
Ӧкістерге чурт пирерінҷе киректер чылдаң чылға хозылча. Ирткен чылда республиканың чарғы приставтары 268 толдырчаң производствоҷа тоғынғаннар. Ӧкістерге квартиралар аларына 287 миллион салковай киректелче, че субвенциялар хоостыра 178 миллион салковай позыдылған. Ирткен чылда паба-іҷезі чох ӧскен 36 чиит кізее чурт пирілген.
Чарғы приставтары службазынзар коллекторлар тоғызы хоостыра кірген айланыстар саны пылтыр 47%- ке хозыл парған, 137 айланыс кірген. Мының алнында республикада пір коллекторлар агентствозы тоғынған, 2020 чылда Хакасияха УФССП хоза пір организацияа тоғынарға чаратхан. Чуртағҷылар айланызы хоостыра, коллекторлар агентстволары, удаа сығдырадып, алымнығ кізілерні чархандырғаннар. Ӧӧнінде айланыстарны кӧрчеткендӧк, андағ киректер тохтадылҷаң, че Хакасияда орныхпинчатхан ӱс организацияа штраф салылған. Коллекторлар агентстволарына паза банктарға алымнығ кізілерге тоғынҷаң кӱннерде 8.00 — 22.00 часта сығдырадарға чарир, тынағ кӱннерінде — 9.00 — 20.00 часта. Ідӧк ӧдістіг кізілернең кӱнде пір хати тоғазарға чарир, неделяда — ікі хати, айда — сигіс хати. Коллекторлар агентстволары кӱнде удаа сығдыратчатсалар, анзы пасха кізінің чуртазына ара кірісчеткені чіли саналча. Коллекторлар сығдырастар алай тоғазығлар хоостыра сайбағлар итчетселер, чарғы приставтарынзар айланарға кирек.
Автор :
Тимнеен Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде