АҒЫРЧАТХАННАРҒА ПЦР-ТЕСТ ТИККЕ ИРТІРІЛЧЕ
09.02.2022
Хабарлар
Имнег кирее. Республикада коронавирус наа чуғынҷахха ПЦР-тесттер хайди иртірілчеткеннеңер чарыда чоохтаан Хакасияның хазых хайраллаҷаң министерствозының пресс-службазы
ПӰӰН ХАКАСИЯДА КОРОНАВИРУС ТЫҢ ТАРАПЧАТХАНДА, АНЫ ЧУХТЫРЫП АЛҒАННАРНЫҢ САНЫ УЛАМ КӦПТЕҢ КӦП ЛЕ ПОЛЫП ОДЫРЧА. СУТКАДА АНЫ ПІР МУҢ АЗЫРА КІЗІ ХАПТЫРЫП АЛЧА. АМ «ОМИКРОН» НАА ШТАММ УЛАМ НА ТАБЫРАХ ТАРАПЧА. МЫНДАҒ ЭПИДЕМИОЛОГИЯ САРИНАҢ СИДІК ТУСТА ӦӦНІНДЕ ИМНЕГ КИРЕЕНЕҢ АЙҒАСЧАТХАН УЛУСХА ААР-ЧӰК АРТЫЛЧА. АМДЫ, ОЛАРОХ ЧІЛИ, ХАРАА-КӰНӦРТЕ ТОҒЫН СЫХТЫЛАР КОВИДКЕ ПЦР-ТЕСТТЕРНІ ИРТІРЧЕТКЕН ЛАБОРАТОРИЯЛАР.
Республикада, ПЦР-тесттернең айғазып, коронавирус чуғынӌахты ілезіне сығарарынӌа сыныхтағларны иртірчелер Роспотребнадзорның Хакасияӌа управлениезінің, хазнани нимес клиникалардағы лабораторияларда, ідӧк - республиканың хазых хайраллаӌаң министерствозы устапчатхан 6 лабораторияда. Чоохтирға кирек, пӱӱн ПЦР-тесттернің 90 проценті хазна лабораторияларында иртірілче.
Сағам коронавирус паза кискек ағырығлары тың тарапчатханда, хазна лабораториялары хараа-кӱнӧрте тоғынчалар. Олар норматив хоостыра суткада 100 муң чуртағӌының 300-інең не коронавирусха тест иртірерге киректер. Че пӱӱн лаборатория тоғынӌылары тоғысты нормативтең ікі хати кӧп толдырчалар.
Кӧзідімге, 3 февральға сутка аразына олар 824 тест, 7 февральға 1884 тест (ол санда 1682 тест хазна лабораторияларында) иртіргеннер. Роспотребнадзорның Хакасияӌа управлениезінің танығларынаң, республикада COVID-19 чуғынӌах ағырыға, ПЦР-тест оңдайнаң, кӱннің сай 5,5 муң істезіг иртірілче.
Хакасияның хазых хайраллаӌаң министерствозы устапчатхан лабораториялар мыннаң мындар суткада иң не кӧп 6 муңа теере андағ сыныхтағны иртірерге тимделер. Оларда ідӧк хараа-кӱнӧрте істенерлер. Пістің регионда коронавирустың тарапчатханы тохтабаза, министерство хоза лабораториялар азарға пӧгінче. Хоза оборудование алылза, Ағбандағы имнег туразында паза Ағбан пилтірі аймааның ӧӧн имнег туразында оларны тоғындырарға тимделер.
Кемге ПЦР-тест тикке иртірілче? Регионның имнег учреждениелерінде ковидке тест имӌі чарадиинаң на иртірілче. Коронавирусты чухтырып алған тіп чігленіс пар полза, имӌі пациентті андағ сыныхтағ иртерге ысча. Пациенттерге имнег тураларында пу сыныхтағ тикке иртірілче. Че хаӌан кізі ковидке пос алынӌа сыныхтанарға сағынчатса, ол хазнани нимес ноо даа клиникада пос ахчазына ПЦР-тест ирт полар.
... ПЦР-ТЕСТ ТИККЕ ИРТІРІЛЧЕ
Ағырчатхан кізінең пір чирде полған кізее, тізең, андағ коронавирустың алай кискектің пілдіріглері сығысчатса ла, тест иртіп, ковидке сыныхтанарға киректелче.
Салтарларны нинҷе тус сахтирға кирек? Нормативче, ПЦР-тесттің салтары ікі кӱн аразына (48 час) тимнел парарға кирек. Чоохтирға кирек, палаларның тесттері пасхалалбинча. Олар улуғларни осхас сах андағох ПЦР-тест иртчелер.
Коронавирустың анализін иртерге хайди тимненерге кирек? Андағ анализ алчаастығ салтар кӧзітче бе? Андағ анализке биоматериал кізі тамаанаң, ӧӧс-ахсынаң алылча. SARS-CoV-2 чуғынӌахха кірӌең «хаалхалар» тастындағы тыныс органнары полчалар. Вирус ӧӧс-ахсынзар, тамахсар кір парза, ол андағы эпителиальнай клеткаларда тарап сыхча. Ағырығның пілдіріглері сығып пастапчатхан туста андартын алылған анализ хап-орта поладыр. Че пуруннаң тирең алылбаан анализ коронавирус ағырығны ілезіне сығарарға полыспас таа, неке.
Хакасияның ӧӧн санитарнай имӌізінің чӧптерінең, ПЦР-тестті иртер алнында, ӱс час пір дее ниме чібеске кирек. Суғ ізерге, тіс арығлирға, тамах-ахсын чайарға, саас тайнирға, тамкы тартарға чарабас. Сах ідӧк пурунны чайарға, аны спрейнең, имнең, мазьтарнаң сӱртерге чарабас. Паза ковидке сыныхтанар алнында ікі кӱн ачығ суғ пір дее амзабасха кирек.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде