«ОЙЫНҶЫЛАР» ЧУРТАСХА ӰГРЕТЧЕ
06.05.2022
Хабарлар
Сомда: кӱҷӱрлер талған паза пызылах амзапчалар
Культура. А.М.Топановтың адынаң Хакас драма театрының артисттері Н.В.Гогольның «Ойынҷылар» пьесазынӌа кӱлкістіг спектакль кӧзіттілер.
Хакас драма театры хынығ ойын турғысчатханы азынада пілдістіг полған. Аның тимненістерінің сомнары паза кизек видеолары социальнай сетьтердегі театрның группаларында сых пар турӌаңнар, анзынаң чуртағӌыларны уламох «хыӌыхтандырғаннар».
Хайхастығ, че спектакльны Ильшат аттығ ӱс ус тимнеен: режиссёр-постановщик Ильшат Мухутдинов (Уфа), хоосчы-постановщик Ильшат Вильданов (Санкт-Петербург) паза чарытхыӌа хоосчы Ильшат Саяхов (Альметьевск). Кӧгнең Ильшат Мухутдиновох айғасхан. Теелбектерні Уфадаң килген хореограф Алина Мустаева турғысхан. Таныхтирға кирек, национальнай театрлар «Кічіг чир-суубыстың культуразы» федеральнай проект хоостыра хада-пірге тоғынчалар.
Ойын артисттернің хынығ теелбегінең пасталған, анзы кӧрігӌілернің кӧңнін улам кӧдірген. Спектакльда саңай иреннер ойнааннар. Кирек пір трактирде полча. Аның істі полководецтернің бюсттерінең чазалған. Ортызында узун ағас стол паза одырчыхтар турча. Ӧӧн матырларның пірсі кӱӌӱр Ихарев (артист Александр Асочаков), карт ойнап, 80 муң салковай утып алча. Аның ӱчӱн позына тың морсынча, анаң чалӌызы Гаврюшканаң (артист Анат Быдышев) трактирзер кірчелер. Оларны андағы тоғынӌы Алексей (артист Николай Бельтереков) удурлапча. Ихарев, Алексейдең трактирзер кем кил парыбысчатханын сурастырғлап, кем карт ойнапчатханын піліп алча. Полған на наа искірігнің ӱчӱн ол трактир тоғынӌызына, адайахха чіли, пірер салковайах тастап пирче.
Гаврюшка, чалӌы полза даа, кӧйтігінең ээзінең халбинча. Ол трактир тоғынӌызының ізебінең чаӌын ахча суура тартып алча, анаң анзына піди ӧрінче:
- Кӱннің сай ахчаҷах ізепке тӱс парча. Піди сағынза, чуртас хайдағ чахсы! Я-я, хайдар хынчам, андар парчам. Хызылда эрістіг полза, Хызылчарзар ойлатчам. Хызылчарда хынығ полбаза, Харатассар хаалапчам. Харатаста хынығ полбаза, Ағбанзар сегірчем.
Итсе, Н.В.Гогольның пьесазында Гаврюшка Смоленск, Рязань, Казань, Ярославль городтарны адағлапча. Че спектакль улам хынығ полар ӱчӱн, режиссер Ильшат Мухутдинов оларны Хакас чиріндегі городтар аттарына алыстырыбыстыр.
Анаң трактирзер Пётр Петрович Швохнев (артист Виктор Сагалаков), полковник Кругель (артист Валентин Ульчугачев) паза Степан Иванович Утешительный (артист Андрей Тюкпиеков) кір килчелер. Олар Ихарев ӱр ниместе 80 муң салковай утып алғанын пілчелер, аннаңар, аны хаңыртып, ахчазын алып аларға пӧгінчелер.
Азарттығ ойынға хынчатхан иреннер трактир тоғынӌызы Алексейге пызылах паза талған ағыл пирерге чахыпчалар. Олар хакас ас-тамаан амзапчатхан арада трактир тоғынӌызы Алексей, залзар тӱзіп, кӧрігӌілерні ідӧк пызылахнаң паза талғаннаң сыйлаан.
Сценада Ихарев ӱс нанӌаа аның танығлығ карт колодазы пар тіп махтаныбысча. Аны «Аделаида Ивановна» адап салтыр. Мында спектакльның иң хынии пасталыбысча. Кӧрігӌілер кӱлкістіг ойынны харах албин кӧргеннер. Кӱӌӱрлернің хайзы пайып парарын, хайзы хуруғ халарын пілерге хынығ нооза. Таныхтирға кирек, «Ойынӌылар» - олаңай ла кӱлкістіг ойын нимес, ол кізіні чуртасха ӱгретче.
Спектакльда ідӧк Хакасияның саблығ артизі Максим Султреков араласхан. Ол помещик Михаил Александрович Гловты хынығ ойнаан. Артист Сергей Чебодаев спектакльда Александр Михалыч Глов полған. Чиновник Псой Стахич Замухрышкинні артист Михаил Карачаков хынығ ойнаан. Таныхтирға кирек, артисттернің маскалары кӧрігӌілернің хайиин тартхан. Андағ маскаларнаң Япониядағы кабуки театр тузаланча.
Ойын хакас тілінең апарылған, аннаңар республикадағы ікінӌі хазна тілін пілбинчеткен кӧрігӌілер, наушниктер кизіп, тілбестегнең тузаланғаннар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде