КИП-ЧООХТАРНАҢ, ОЙЫННАРНАҢ УДУРЛИРҒА
17.03.2017
Хабарлар
Пӱӱл Хакас Республиканың Чыл пазы ӱлӱкӱні 25 мартта Ағбандағы ипподромда алғым таныхталар. Че аның алнында, 24 мартта 18.00 час иирде, ипподромда хара чаламаларны ӧртирлер.
Чыл пазы ӱлӱкӱнні Хакасияның культура министерствозы паза С.П.Кадышевтің адынаң культура кіні иртірче. Часхы ӱлӱкӱн программазының ӧӧн режиссеры, Хакасия культуразының саблығ тоғынҷызы Антонина Тутатчикова полча. Антонина Семёновна пӱӱл пу ӱлӱкӱнге килер аалҷыларны хайдағ чапсых кӧзідіглер паза ойыннар сағыпчатханын искір пирген:
- Чыл пазы ӱлӱкӱн пӱӱл Таңах чылына чарыдылча, ол «Чыл айлары» театрализованнай кӧзідігдең пасталар. Ол айдаңар кип-чоох хоостыра тимнелген. Пастағызын чон алнынзар тӧрт айның матырлары сығарлар. Кип-чоох хоостыра, Чирім хан паза Абахай ирепчінің тӧрт хыс полча. Хыстары ӧс парғанда, пабазы Чирім хан оларны чир ӱстӱн кӧрерге, чирлерге полызығ пирерге тӧрт чара ысча. Паба-іҷезі хыстары ол чирлерні кӧрерге сыдабастар тіп сизінчелер, оларға полызыға 12 айны ысчалар. Сценазар 12 ай сыхча. Полған на айда хакас чон ниме итчең тіп чоохталча. Кӧзідімге, январьда Мылтых ӱлӱкӱн таныхталча, февральда пӱдіріге ағас пилетеҷеңнер. Азығ айында суғлар чир алтынзар тирең парыбысчалар, ағаста суғ асхынах полча. Андағ ағасты хурутпин даа пӱдіріг пастирға чарир. Мартта Чыл пазын таныхтаҷаңнар. Соонаң хыра тоғыстарына тимненіс парча.
Чон алнынзар республика устағҷылары алғыстас сӧстерінең сығарлар. Анаң От Инені азырап пазырарлар. Пу кибірні алғасчы Кирилл Султреков иртірер. Чон Пай хазыңа чаламалар палғир.
Хакасияның Улуғлар чӧбінің «Чыл кізізі», «Чахсы киректер ӱчӱн» сыйыхтары читірілер. Республиканың аймахтарына «Чайааннарның чоллары» кӧзідіг-марыға тимнен килерге чахығ пирілген. Пӱӱл 13 аймах-городтаң пу марыға тимненчелер. Олар кем нимее чайалғанын кӧзідерлер. Иң артыхтарына I, II, III орыннар пирілер, пасхазына араласхан ӱчӱн дипломнар читірілер.
Пӱӱл Хакасияда Чииттер чылы чарлалған. Таныхтирға кирек, амғы хакас чииттер ӧткін хайынчалар. Чыл пазына «Чииттер кӧрізі» программа тимнепчелер. Аны апарарлар Виктор Сагалаковнаң Виктор Шульбереков.
Ӱлӱкӱн тузында спорт марығлары, ойыннар кӧп иртірілер. «Хан, хыйма, мӱн» ачыхта хакас чонның ас-тамааның садии парар. Ідӧк аал хонии ас-тамааның садии полар.
ӰЛӰКӰН ПРОГРАММАЗЫ
24 МАРТТА:
12.00 - 20.00 часта Хакасия аймахтары, ӱлӱкӱнге тимненіп, ибіҷектерін турғызып чазирлар. 18.00 часта хара чаламаларны ӧртирге чонны хығырчалар.
25 МАРТТА, ӦӦН СЦЕНАДА:
11.00 - 12.00 - Радиоконцерт.
12.00 - 12.20 - «Чыл айлары» театрализованнай кӧзідіг.
12.20 - 12.30 - Ӱлӱкӱнні пайрамни азары. Алғыстас сӧстерінең чон алнынзар сығарлар:
- Хакасияның пазы, Хакас Республика правительствозының кнезі В.М.Зимин;
- Хакас чонның Улуғлар чӧбінің кнес орынҷызы П.И.Воронин;
- Республиканың муниципальнай пӱдістерінің пастары.
Алғасчы кибірлер иртірерге устағҷыларны хығырча. От Инені азырирлар, Пай хазыңа чаламалар палғирлар.
12.30 - 12.40 - Хакас чонның Улуғлар чӧбі «Чыл кізізі», «Чахсы киректер ӱчӱн» сыйыхтар читірер.
12.40 - 13.10 - «Чалахай часхы» концерт программазы. Аны В.Г.Чаптыковтың адынаң Хакас филармониязының артисттері тимнепчелер. Россияның паза Хакасияның саблығ артизі Евгений Улугбашев «Ах тасхыллар» кӧгні толдырар. Хакасияның саблығ артисттері Людмила Арыштаева, Мария Янгулова, «Ӱлгер» ӧменің теелбекчілері чон алнынзар сығарлар.
13.10 - 14.40 - Хакасия аал-городтарының «Чайааннарның чоллары» театрализованнай кӧзідии парар. Олар чайаачы кӧңнілерін кӧзідерлер.
14.40 - 15.10 - Республика фестиваль-марығларының чиңісчілерінің «Ирке чирім» ойыны турғызылар. Чон алнынзар Настя Иптышева паза Регина Тоскоракова, Ольга Султрекова, Сергей Толмашов, Минсуғдаң Пётр Тинников, Татьяна Балахчина, Владимир Канзычаков, Виктория Димчикова ырларнаң сығарлар.
15.10 - 15.30 - «Чииттер кӧрізі» чииттер тимнеен программа полар. Этническай мода дизайнері Тарика Казагашеваның кип-азах кӧзідии парар. Владимир Доржу, Игорь Толмашов ырлап пирерлер.
15.20 - 16.00 - Марығлар араласчыларына сыйыхтар читірілер.
«УС ХОЛЛАР» АЧЫХТА:
10.00 - 16.00 - Декоративно-прикладной искусство устарының национальнай сувенирлер кӧзідіг-садии.
ОЛҒАННАР ОЙЫНЫ АЧЫҒЫНДА:
12.40 - 14.40 - М.Ю.Лермонтовтың адынаң орыс драма театрының ӧмезі палаларға ойыннар программазын иртірер.
СПОРТ АЧЫҒЫНДА:
12.30 - 16.00 - Спорт марығлары, ойыннар иртірілер.
«ХАН, ХЫЙМА, МӰН» АЧЫХТА:
11.00 - 16.00 - Хакас чонның ас-тамааның садии парар.
ЯРМАРКА АЧЫҒЫНДА:
10.00 - 16.00 - Аал хонии ас-тамааның садии парар.
Автор :
Тимнеен Елена САГАТАЕВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде