ЧЫЛ ПАЗЫНДА ТЫНАНАРБЫС ПА?
05.09.2017
Хабарлар
Пістің чон хас-хаҷаннаң сығара ибіркі чир-чайааннаң ынағ, ағаа ӱрег-хорадығ ағылбин чуртирға харасчаң. Хаңдағ чахсы кибір-чозахтарға тудынҷаңнар ӧбекелерібіс. Олар Ӧӧркі чайааннарға, суғ, тағ, тайға ээлеріне пазырҷаңнар, Чир инезінең амыр, иптіг чуртаҷаңнар. Аннаңар даа халын тайғалығ, аймах аң-хустығ полҷаңнар. Нинҷе им кӧллер артыс салғаннар піске.
Че хорылыстығ алызығлар пастапыбысханда, анзы прай ундудылған, чіт парған. Я, нинҷе-нинҷе тӧл, ӧзіп, сын чирзер парыбысхан. Олар чуртасха нааҷыли кирілчеткен пайрам-ӱлӱкуннерні кӧрбин халғаннар, кибір-чозахтарны аастаң аасха ла артызып одырғаннар.
Улуғ алғызым читірерге сағынчам Валентина Татароваа, Галина Казачиноваа паза пасхазына даа, илбек учёнайыбыс Николай Фёдорович Катановтың, пасха даа ӱгредігліг кізілерібістің істезігліг тоғыстарынаң танызып, чоныбыстың пайрам-ӱлӱкӱннерін, кибір-чозахтарын аиландырарға харасчатханы ӱчӱн. Ол санда Чыл пазы ӱлӱкӱнні адирҷыхпын. Аны піс чибіргі чыл артиинаң иртір парирбыс. Амды ол чуртазыбыста пик орных парды.
Хаҷан аны таныхтирға тимненчеткенде, піреезі пістің чонның андағ ӱлӱкӱн чох полған, аны кем-де сағын таап алған тіп суулаанох. Амды оларох, кӧксілерін кӱрдейте тудып, ӧрініс чӧрчелер: «Хайдағ чахсы ӱлӱкӱнні чуртасха киріп алдыбыс!»
Амды Чыл пазы хоостыра ікінҷі сурығ ілезіне сых килче. Ол ӱлӱкӱн пістің чонның Наа чылы. Позын улуғлапчатхан хайдағ даа ӱлгӱ Наа чылны тынағ кӱні тіп санапча. Пістің не чирде анзы андағ нимес. Пірдең, 22 март кӧс чӧрчеткен кӱн, сыбыра ла тынағ кӱніне киліспинче. Ноға пістің республикада Чыл пазын тынағ кӱні тіп чарлабызарға чарабас? Хонҷых Тувада мындағ чарадығ хаҷанох алыл парған.
Пістің газетада пу сурығ мының алнында даа пірее-пірее кӧдіріл турған. Амды, хаҷан Хакасияның пазы Виктор Зимин чоннаң кӧні палғалыс апар сыхханда, арса, пу сурыға хайығ айландырылар.
Автор :
Нина БУРНАКОВА Таштып аал
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде