ТАҢДАҒЫЗЫНЗАР - ІЗЕСТІГ КӦРІСНЕҢ
16.01.2019
Хабарлар
Аал хонии. Шира аймаандағы Наа чир аалның чуртағҷызы Виталий Котюшев 2015 чылдаң сығара фермер полча.
ВИТАЛИЙ КОТЮШЕВ НАА ЧИР ААЛДА ТӦРЕЕН-ӦСКЕН, АНДОХ ОРТЫМАХ ШКОЛА ТООСХАН. ААЛ ХОНИИ ТОҒЫЗЫ АҒАА КІЧІГДЕҢӦК ТАНЫС - ІҶЕ-ПАБАЗЫ ХАҶАН ДАА МАЛ-ХУС КӦП ТУТХАННАР ПАЗА ТЫНАҒА СЫХХАНҶА СОВХОЗТА ІСТЕНГЕННЕР. ВИТАЛИЙНІҢ ІҶЕЗІ РАИСА ИВАНОВНА СОВХОЗТА МАЛ ИМҶІЗІ ПОЛҒАН, ПАБАЗЫ ВЛАДИМИР МАКСИМОВИЧ -ТРАКТОРИСТ. 1999 ЧЫЛДА ШКОЛА ТООЗЫБЫСХАНДА, ВИТАЛИЙ АҒБАНДАҒЫ 5 № ПРОФЕССИОНАЛЬНАЙ УЧИЛИЩЕЗЕР РАДИОМАСТЕРГЕ ӰГРЕНЕРГЕ КІРІБІСКЕН.
Пу специальностьха ӱгреніп алған даа полза, тоғыс таппаан. Аннаңар ол В, С, Д, Е категориялығ водительге ӱгреніп алған. Анаң армияда 2 чыл служба апарған. 2002 чылда армиядаң айланғанда, «Целинное» ООО-зар водитель тоғызына кірібіскен. Олох туста ол пос хониинаң айғасхан: сосхалар, інектер, хойлар тутхан.
- Сосха кӧп ӧскірҷеңмін. Ол чылларда кізілер сосха идін чахсы алҷаңнар, ит тее паазы ниик ле полбаан. Сосха азии, тізең, сала ниик арах турған. Чыл сай часхыда паза кӱскӱде 50-ер пас сосха садыбысчаңмын. Сосха хазааларын аалдаң 10 азыра километр оортах пӱдір салғам. Андох маллар, хойлар полҷаңнар. Амғы туста сосха идін хомай алчалар, аннаңар оларны тутпиныбысхам. Азых таа паазы тың ӧс парған, - теен Виталий Котюшев.
Мал саны ӧс парғанда, Виталийнің пос хониин хызырыбызарға алай тоғыстаң саназыбызарға сурығ турыбысхан. Малнаң айғазарға тус чидіспинібіскенде, ол тоғызынаң саназыбызарға чаратхан.
Амғы туста Виталий Котюшев сӧбіреліг. Аның ікі пала ӧсче: Дарья 6 класста ӱгренче, Антон - 1-ғы класста. Ипчізі Ольга садығҷы полча.
2015 чылда, пістің республикада ӧрттер полып, Виталийнің турлаа прай кӧй парған. Ӱрегнің сині - 80 пас ине хой, 10 сосха паза хазаалар. Хорадығлар ӱчӱн компенсация аларға киліспеен. Анзы Виталий фермер полбинчатханынаң палғалыстығ. Олох чыл ол фермер чіли пічікке тур салған.
- Фермерлерге хазна хабазиин (субсидия, грант) алып алар оңдай парынаңар пілгем, аннаңар фермер полыбызарға паза хонииим тилідерге сағыныбысхам, - сағыстарынаң ӱлесче Виталий Владимирович.
ТАҢДАҒЫЗЫНЗАР - ІЗЕСТІГ КӦРІСНЕҢ
2016 чылда ол, наа ла тоғынып пастапчатхан фермерлернің мариинда аралазып, 1 млн 200 муң салковай грант утып алған. Ол ахчаа фермер погрузчиктіг «Беларусь» трактор садызып алған. Наа трактордаң пасха аның ідӧк ӱс иргі трактор паза пресс пар.
Виталий Котюшев маңнаныстығ фермерлернің санында тізе, саба полбас. Пӱӱнгі кӱнге аның 123 пас інек, 800 пас хой пар. Симментал тӧлліг інектерні фермер итке тутча. Хойлары аймах тӧлліг. Хониин тилідерге Виталийге пабазы чахсы полысча. Владимир Максимович совхозта тракторист полып ӱр істенген, аннаңар мал азиин хайди табырах тимнебізерге, тракторны тыхтабызарға чахсы пілче. Ол Виталийге чӧпнең дее, нинҷе пар кӱзінең дее чахсы полысча. Чайғыда фермернің уғаа маң чох тус. Малларға от читкіҷе тимнеп саларға кирек, олох туста інектер, хойлар хадарарға. Аннаңар полысчы холлар чох кирек киліспес. Виталийге іҷе-пабазы чахсы хабасчалар: пабазы - от тоғызында, іҷезі ағырыбысхан малларны имнирге полысча.
Фермернің хаҷан даа кӧп хорадығ полча. Виталий малларны отнаң на азырапча, хойларға оттаң пасха сула пирче. Суланы садызып алча. Ачырғасха, турлағ покостардаң 30 километр оортах орныхча, аннаңар от тартарына илееде хорадынарға килісче. Виталий Котюшевтің турлаа ибіре муниципальнай чирлер. Чағын арах чир садызып аларға сағам аның киліспинче.
Виталий таңдағызынзар ізеніснең кӧрче, кӧп пӧгін турғысча: мал санын ӧскірерге, хоза чир алып аларға паза кошараны читіре пӱдірібізерге. Фермер поларға сағынчатхан кізілерге ол мындағ чӧп пирче:
- Аалда чуртабаан паза мал тутпаан кізі фермер ӱр пол полбас, хониин тиліт полбас. Кізінің ідӧк пу тоғыснаң айғазар кӧңні поларға кирек. Мал ӧскірері минің кӧңніме кiрче. Амғы туста парыс кӧп тее полбаза, мин прай ахчамны хониим тилізіне хоратчам. Ам кошара пӱдірчем. Хоза чир алып аларға сағынчам. Че сағам чир сатчатхан кізі табылбаан.
Амғы туста чииттер аалдаң городсар парыбызарға кӱстенчелер. Анзы пілдістіг - тоғыс чоғыл. Че чирде тоғынар кӧңніліг кізілерге тоғыс табылча. Оларның пірсі - Виталий Котюшев. Хазна аал хониинаң айғасчатханнарға хабазығ пирчеткені ӧріндірче. Андағ хабазығнаң тузаланып, чиит фермер пос хониин тилідіп алған.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы