ПРОЕКТТЕРІН ЧУРТАСХА КИРЧЕЛЕР
06.03.2019
Хабарлар
Форум. Ирткен неделяда коммерческай нимес организацияларның «Ӱлгӱнің, бизнестің паза чонның пірге тоғынчаң амғы оңдайлары» форумы ирткен.
Форум араласчылары
Форумның тӧстегҷізі Хакасияның Халыхтар палатазы полча. Ирткен чылда Халыхтар палатазына 10 чыл толған, форум даа пӱӱл пайрамни 10-ҷы хати ирткен.
Коммерческай нимес организацияларның форумы азылғанында Хакасияның пазы Валентин Коновалов араласчыларны пу танығлығ кӱннең алғыстаан паза алғыстас пічіктерін читірген.
- Форумға 10 чыл толча, тӧстегҷілерні паза араласчыларны пайрамнығ чылнаң алғыстапчам паза пасха даа пайрамнығ чылларны таныхтирбыс тіп ізенчем. Сірерге наа сағыстарны, проекттерні чуртасха кирерге алғапчам, - теен Валентин Коновалов.
«Чон сабланызы» марығның «Откін пастағҷы ӱчӱн» номинациязында 19 проект араласхан. Асхыс аймаандағы Пилтірдегі Мария Ильящукка «Арығ ойыннар. Арығ суғ» проекті ӱчӱн, Харатастағы тренер, «Дружина» клубтың тӧстегҷізі Евгений Концеренкоға, «Хакас Республиканың волонтерлары паза имҷілері» тиксі Россияның халых чӧрімінің тӧстегҷізі Мария Луцикке Хакасия правительствозының алғыстас пічіктері читірілген. Пу номинацияның чиңісчізі Мария Ильящук полыбысхан. Аның проектінде 800 азыра кізі араласхан, хайзы Ағбан суғ хазын, Калининдегі тулғорны паза Хызылчардағы талайны 15 тонна сӧп-саптаң арығлабысхан.
Мария Луцик волонтерларның паза имҷілернің чӧріміне 120 кізі тартып алған, оларның полызиинаң Ағбанда «Хазых рейді», «Хызамдых чалама» паза даа пасха чӧрімнер чуртасха кирілчелер.
«Хакасфильм» киностудияның режиссеры Юрий Курочка «Чон сабланызы» марығның ӧнетін сыйиина турысхан.
«Социальнай СМИ» номинацияның чиңісчілері полыбысханнар «Іҷемні сағыпчам» рубриканың авторы, РТС телекомпанияның хабарҷызы Ольга Камзалакова, «Черногорский рабочий» газетаның хабарҷызы Валентина Корзунова, «Саянские ведомости» газетаның редакторы Лидия Шмакова.
Президент гранттары мариинда сыбыра араласчатхан коммерческай нимес организацияларны алғыстас пічіктерінең таныхтааннар. Оларның санында «Россия пенсионерлерінің пірігізі», «Сӧбіре академиязы», «Ағбанның палалары», «Юный ратник» пірігістер. 2018 чылда Хакасияда коммерческай нимес организацияларның 47 проекті чуртасха кирілген.
Форумда араласчылар пис ӱзӱріг площадказында экологияда бизнестің тузазын, чоннар аразындағы хайызығларны, социальнай киректе коммерческай нимес организацияларның тузазын ӱзӱргеннер.
«Чоннар аразындағы чӧпсініс - национальнай сағыстың ӧӧні» площадкада Ағбан пилтірі поселоктағы «САМУР» халых пірігізінің кізізі Анастасия Степанова пылтыр чуртасха кирілген «Тӧӧй ниместернің пірігізі» проекттеңер уғаа хынығ чоохтап пирген. Проектті чуртасха киреріне Хакасияның национальнай паза территориальнай политика министерствозы 180 муң салковайға грант пирген. 2018 чылның апрельінең октябрьға теере пірігістің кізілері Ағбан пилтірі аймаандағы чииттерге аймах мероприятиелер иртіргеннер.
«САМУР» ідӧк мындағох аттығ ікі кӱнніг слет иртірген. Пу мероприятиеде Ағбан пилтірі аймааның 80 чиит чуртағҷызы араласхан. Араласчылар постарының кип-азаанаң, ас-тамаанаң, кибірлерінең таныстырғаннар. Ікінҷі кӱнінде аймах нациялығ чииттер чон теелбектерін кӧзіткеннер. Пуох слетта араласчылар пӧрік тігерінҷе, ас-тамах тимнирінҷе, теелбектенерінҷе мастер-класстар иртіргеннер.
Проекттің халғанҷы мероприятиезі «Кибір - тіріг чіп» фестиваль полған. Пу фестивальға Ағбан пилтірі аймаа аалларынаң килген командалар пос ас-тамаанаң таныстырғаннар. Пуох проектче чииттернің «САМУР» халых организациязы Томыҷахтар аалындағы улуғ частығ чуртағҷыларнаң тоғазығ иртірген.
«Чоннар аразындағы чӧпсініс - национальнай сағыстың ӧӧні» площадкада чон узы, идінҷек, Алтай аймаандағы халыхтар палатазының кізізі Ефросинья Сагалакова араласхан. Ол истең аймах ниме-ноолар тимнепче. Школада, кружок апарып, пу усха олғаннарны ӱгретче.
«Востоковедтернің пірігізі» организацияның кізізі, филология наукаларының кандидады Раиса Абдина хакас чонның кип-азаан тікчеткен ус полча. «Хакас чонның кип-азаан тігерінҷе кибірліг узанысты хайраллиры» проектті чуртасха киреріне президент грантын алған. Проект хоостыра хакас чон кип-азааның тархыны ӱгренілер, аны тігерінҷе мастер-класстар иртірілер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде