ААЛ ХОНИИНА ХАБАЗЫҒ КИРЕК
12.04.2019
Хабарлар
Ӧӧркі Чӧп. Президиум чыылиинда депутаттар алынҷа законнарзар алызығлар кирерінең, федеральнай закон проекттеріне ӱндезерінең палғалыстығ сурығларны кӧрібіскеннер. Алынҷа хайығ часхы таарығ суриина салылған.
Хакасияның Ӧӧркі Чӧп кнезі Владимир Штыгашев 10 апрельде президиум чыылиин иртірген. Пастағы сурығлар санында «Хакас Республиканың хазна гражданскай службазы должностьтарының реестрінеңер» республика законынзар алызығлар кирчеткен закон проекті полған. Кирілчеткен алызығлар республика правительствозына тоғызын апарарға полысчаң управление чох иділгенінең палғалыстығ. Управление апарған тоғыстың чардығы Хакасия пазының администрациязына артыл парған. Аннаңар хайзы должностьтар (Хакасия пазының полысчызы, пастағы орынҷызының полысчызы) администрациядағы хазна службазы должностьтары санынзар кирілген.
Аннаң пасха, президиумдағылар «Хакас Республика чирінде муниципальнай чир сыныхтаан апарҷаң оңдайдаңар» паза «Хакас Республикадағы муниципальнай службадаңар» республика законнарынзар алызығлар кирчеткен закон проекттерін ӱзӱрібіскеннер. Алызығлар пістің законнарны федеральнайларға килістіре тӱптестірер пӧгіннең кирілче. Пастағы закон проекті чир тузаланызынаң палғалыстығ сыныхтағларны хаҷан паза хайдағ сылтағларнаң иртірерін тӱптестірче. Чарыда чоохтаза, андағ сыныхтағларның теезін орталатча. Ікінҷізі муниципалитеттердегі сыныхтағ органнарында кемнерге тоғынарға чарабас полчатханын чарытча. Іди орындағы сыныхтағсананыс органнарында муниципальнай пӱдістің пазына, депутаттар чӧбі пазына, орындағы администрация пазына, муниципалитет чирінде орныхчатхан чарғы паза право хайраллаҷаң органнарның устағҷыларына чағын туған полчатханнарға тоғынарға чарабас.
Федеральнай закон проекттеріне ӱндезер сурығлар аразында «Чир алтындағы ис-пайдаңар» федеральнай законзар паза Россия Федерациязының алынҷа законодательнай акттарынзар алызығлар кирердеңер» закон проекті хайығ тартхан. Закон проектін Россия правительствозы тимнептір. Иң пастағызын закон проекті хоостыра федеральнай законзар амды наа сӧс кирілче - «чир алтындағы ис-пайнаң тузаланғанының артхан-халған ниме-ноолары» («отходы недропользования»). Чарыда чоохтаза, наа закон чир алтындағы ис-пайны аныпчатханнарны ол артхан-халған ниме-нооларнаң хати тузаланарға кӧӧктірер. Анзына артхан-халған ниме-нооларнаң хати тузаланчатханнарға 2020 чылның 1 январьынаң сығара, ибіркі чир-чайаанға ӱрег итчеткен тӧлегні санапчатса, 0 коэффициент турғызылар. Ӧӧркі Чӧп кнезі Владимир Штыгашев пу закон проектіне хабазарға киректелчеткенін таныхтаан.
- Халғанӌы 100 чыл аразына Россияда андағ артхан-халған ниме-ноолар 100 миллиардча тонна чыыл парған, - искірген ол. - Ол артхан-халған ниме-нооларда Менделеевтің чарым таблицазы чатча.
Президиумдағылар, чаразып, Россия правительствозы тимнеен закон проектіне хабазарға чаратханнар.
Ідӧк депутаттар чағынғы сессияны иртірҷең кӱнні чарадыға алғаннар. Сессия 30 апрельде ир-тер тіп кӧріл парған.
Чыылығны тоозып, Ӧӧркі Чӧп кнезі алынҷа хайығ салған часхы таарығ суриина.
- Піске Хакасия пазынзар, аал хонии министрінзер хати айланыснаң сығарға килізер, неке, - таныхтаан Владимир Штыгашев. - ГСМ паза ӱреннер паалары ӧс парғаны хоостыра аал хонииндағыларға хабасчаң оңдай кӧр саларға кирек. Амғы тусха республикада фермерлернің пірдеезі андағ полызығ алғалах. Часхы пӱӱл ирте пасталыбысхан, таарығ тузы ідӧк ирте пасталар. Аннаңар пу сурығӌа чапчаң тоғынарға кирек. Ундубаңар: «Часхының пір кӱні чыл тооза азырапча».
Аал хонии политиказынча комитет кнезі Пётр Воронин президиумдағыларға таарығ тузына ахчалығ полызығ пирҷең оңдай тимнел парған тіп искірген. Че республиканың аал хонии паза финанстар министерстволары ахча сині хоостыра пір чӧпке кил полбинчалар осхас. Аннаңар Хакасия правительствозы синінде чарадығ ам даа алылғалах, че пу чағында ол сурығ пӧгіл парарына ізеніс пар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде