ОЛ ПОЗЫНАҢАР САҒЫНМААН
24.07.2019
Хабарлар
Пістің махачыларыбыс. Пу кирек хаҷанох полған, че аны ундударға чарабас
Пӱӱнгі олғаннарнаң махачы киректеңер чоох апар сыхсаң, олар сах андох кинолардағы матырларны талластыр сыхчалар. Че, сынында, сын матырлар пістің арабысталар. Піди кӧрзе, олар - олаңай чуртағдыар, че сидік алай хорғыстығ туста, пос хазии-наңар сағынмин, пасхазына полызарға маңзырапчалар. Андағларның санына кірче Асхыс аймаандағы Индіркі Паза аал чуртағҷызы Сергей Чертыков.
Ол Индіркі Пазада ӱгретчілер сӧбірезінде тӧреен. 8 класс соонда национальнай школада ӱгренген. Анаң институтсар кіріп алған, че ӱгренер кӧңні чох полғаннаңар армияа парған. Службазы тоозылғанда, Пилтірдегі автохозяйствода істенген. Соонаң, 1987 чылда, Хызылчардағы политехническай институтта инженер-механикке ӱгреніп алып, Ағбандағы 1260 № Автоколоннада механик полып тоғынған. Ана ол туста пу хорғыстығ кирек пол парған.
- Иирде сменада полғам. Тоғыстағы арғызым Саша Ленковнаң столовайдаң сыххабыс. Кӧрчебіс, хайдаң-да хара ыс пурлапча. Аар-пеер хайбағынчабыс, че хайда ниме кӧйчеткенін піл полбинчабыс. Сиден азыра кӧрзебіс, чол кизіре бензин тартчатхан КамАЗ турча, кистіндегі тегiлегі, тізең, кӧйче, - сағысха кирген ирткен чылларны ирен.
Сах андох Сергей Анатольевич, пір дее нимедеңер сағынмин, кӧйчеткен машиназар ойлаан. Кӧрзе, кабина ізии паза кӧзенее азых, че клӱс чоғыл. Хайди поларға? Пасхазы, арса, пу туста тис парыбызардых, че Сергей, ізебінең 10 ахча сығарып, машинаны аннаң тырладыбысхан. Ол арғызына ӧрт ӱзірҷеңнерні хығыртарға чахирға ла маңнанған, дамба саринзар ойлатхан. Ӧӧн пӧгін полған кӧйчеткен цистернаны город тастынзар сығарыбызарға.
- Ол туста хайдағ сағыстар полған?
- Маң чох полған сағынарға. Пастап пір ле тегілек кӧйген полза, соонаң, атылып, от ікінҷізінзер сегірген. Че Мир орамазында ойлатчатханда, прицептің прай тегілектері отха хабылғаннар. Андада чочып пастаам, газ ла пазарға киліскен, - тіпче ирен. - Че дамбаа читіре кӧп халбаан. Іди КамАЗ-ты кӧйчеткен прицебінең суға кире пастырыбысхам. Сах андох ӧрт ӱзірҷеңнер, имнег полызиин пирҷең специалисттер чиде салғаннар.
Хайди Сергей Чертыков таныхтапча, андада ағаа оң полған. КамАЗ-тың цистерназына толдыра бензин полтыр. Хуруғ полған полза, цистерна ізіге сах андох чарыл парардых. Андада матыр чир-суғҷыбыс анзынаңар сағынмаан даа. Ол туста хорғыс пілбес кізі, позына айабин, пасхазынаңар сағынған. Бензинніг цистерна кӧйіп пастаан полза, ибіркідегі тураларны прай ӧртебізердік нооза. Аннаңар нинҷе кізі тынын ол ал халғаннаңар чоохтирға сидік. Пілдістіг, ол уғаа хорғыстығ саайны тохтатхан.
Мындағ махачы кирек соонда хайди даа алғыстар читіріледір, че ноға-да ол туста нимес. КамАЗ-тың ээзі дее, ол тоғынчатхан пірігістің устағ-пастаа даа Сергей Чертыковсар пастырбааннар. Итсе-де, пӧлік устағдызы ағаа алғызын читірген паза сыйыхнаң таныхтаан тіпче ирен.
Соонаң махачы ирен Хызылчарзар кӧзібіскен. Ол махтағны сағыбаан, че анзы поларға кирек полған. Андағох сағыс аның чир-суғҷызы Александр Пашенныхтың. Ол матыр кізее сыйых читірер пӧгіннең илееде тус хайын чӧрген. Че хайда-да «ӱстӱнде» кирек тохтадылған. Ирен Хызылчарда чуртапча, андох сыйыхтар алзын тіп нандырығ полған. Че саайны ол Хакасияда тохтатхан нооза!..
Сах андох сағысха кірче ирткен чылдағы мероприятие. Ағбанда «Россияның Тирігліг кӱстерінде контрактча чаады службазын таллап ал!» акция ирткен. Андар хазнабыстың «Соколы России» иң пӧзік пилотаж ӧмезі хығыртылған. Чоох чоғыл, истребительлернің кӧзідии прайзын чапсытхан. Андағ айдас кӧзідігні пістің чоныбыс хайда кӧрер. Салтарында, авиация ӧмезі «За заслуги перед Хакасией» орденнер алып ибзер айланған. Че ноға-да олар хайда чуртапчатханы пірдеезіне харығ полбаан...
Минің кӧрізімнең, аарластығ сыйых тӱзімніг алай махачы киректер ӱчӱн пирілерге кирек. Паза аннаң пеер нинде тус ирт парғанын санға албасха. Чахсы кирек хаҷан даа ундудылбазын паза полған на сыйых позының матырын тапсын.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде