УЛУҒ МАРЫҒЛАРҒА ТАЛЛАҒ
22.01.2020
Хабарлар
Спорт. Ирткен чечіме кӱнде Ис пилтірінде Асхыс аймаа синіндегі волейболӌа марыға олғаннар командалары аразында таллағ ирткен
Волейбол - иң тарап парған спорт кӧрімнерінің пірсі. Аннаң айғазарына кӧп тиріг кирек чоғыл. Аннаңар волейболнаң улуғ частығлар даа, кічіг олғаннар даа хынып айғасчалар.
Ис пилтіріндегі ортымах школада ӱс піріктірілген команда ааллаан: Истегі ортымах школаның, Пилтірдегі 1 № школаның паза Ӱс Чулдағы школаның. Че Ӱс Чулдағылар оолағастар командазын на ағылғаннар. Ідӧк таллағ мариинда Ис пилтіріндегі школаның оолағастар паза хызыҷахтар командалары араласхан.
Мындағ арға-мӧрійлер олғаннарны паза чииттерні физкультуранаң паза спортнаң айғастырар, хазых чуртасха тартар пӧгіннең иртірілче. Ирткен таллағ мариинда 9 классха теере ӱгренҷілер араласханнар.
Олғаннарның ӧткін тимненчеткені прайзы чиңіс тударына парчан кӱзін саларын кӧзіткен. Полған на ойында араласчылар аймах оңдайларнаң меспекке пос «ачығында» тӱс парарға пирбеске кӱстенгеннер. Араласчыларның ӧӧн пӧгіні меспекті аларында алҷаас итпеске паза «ыырҷының» саринзар аны тың паза кӧйтік оңдайнаң ызыбызары полған.
Пір кӱнге олғаннар тоғыс ойын ойнабысханнар. Оолағастар командалары аразында пастағы ойында Полтахтаң паза Пилтірдең килген ӱгренҷілер тоғасханнар. Пу ойында Пилтірдегі 1 № школа командазының иң ӧткін паза кӱстіг араласчызы іле кӧрінген. Аның сабыстары соонда «ыырхы» командазының араласчыларына меспекті аларға уғаа сидік полған. Іди пилтірдегілер соон сӱрістіре тоғыс саннаң утып алғаннар. Пастағы партияда ойын тиң арах иртчеткен чіли пілдірген полза, ікінҷізінде Пилтірдегі школаның командазы «ыырҷызына» пір дее маң пирбеен. Ойын 15:25 паза 9:25 саннарнаң тоозылған.
Ікінҷі ойында площадка ээлері Ӱс Чулдағы школаның командазынаң тоғасхан. Пу ойынны кӧрерге школаның ӱгретчілері паза ӱгренҷілері чыылысханнар. Оларның «ағырғаны» чир-суғҷыларына полыс пирген. Ис пилтіріндегілер 25:11 паза 25:18 саннарнаң утып алғаннар.
Таныхтирға кирек, полған на ойын уғаа чӱрексіністіг ирткен. Тренерлер, командаларына чӧптер пиріп, залға толдыра хысхыр турғаннар.
Марығ тоозылғанда, Пилтірдегі 1 № школаның иң чахсы спортсменінең чоохтазып алар оңдай табылған.
- Мин Сергей Фролов полчам, - чоохтаан спортсмен. - Пӱӱн мин тӧреен кӱнімні таныхтапчам. Арғыстарымнаң хада позыма чахсы сыйых идіп алдым. Пу таллағда чиңістер тударға оой полған тиирге чарир. Амды аймах синіндегі марығда утып аларға кӱстенербіс. Мин волейболнаң 6-ҷы класстаң айғасчам. Школа соонаң Олимп резервінің училищезінзер кіріп аларға пӧгінчем.
Марығ салтарларынҷа, оолағастар даа, хызыҷахтар даа аразында пастағы орыннарға Пилтірдегі 1 № школаның ӱгренҷілері сыхханнар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде