ИДІНҶЕКТЕРГЕ - ГРАНТ
29.04.2020
Хабарлар
Хазна хабазии. Россия правительствозы идінӌектерге айландырылбас ахчалығ хабазығ пирер оңдайларны чарат салды
Россияның экономика тилізі министерствозы искіриинең, правительство иң улуғ ӱреге кірген экономика кӧстеглеріндегі кічіг паза ортын пос киреенең айғасчатханнарға субсидия пирер оңдайларны чарадыбысхан. Субсидия идінӌектернің коронавирус тарапчатхан туста хосхар-сілкер айлардағы хорадығларының чардығын айландырарға, ол санда тоғыс орыннарын хайраллирға паза чал ахчазын тӧлирге пирілер. Хакасияның правительствозы полызығны аларынӌа чарыдығлығ пічік тимнеп салған.
Кемге бюджеттең ахча пирілер:
- иң пілдірте ӱреге кірген экономика отрасльында тоғынчатхан идінӌекке (ол пічіксер ідӧк ас-тамахтаң пасха ниме-ноо сатчатханнар, музейлер паза зоопарктар кирілгеннер);
- хабазығны хосхар айында аларға пӧгінчеткеннернің, кӧрік айынаң тиңнестірзе, тоғыс орыннарының 90% хайраллап халғаннарын кӧрерлер, сілкер айында хабазығнаң тузаланарға сағынчатханнарның хосхар айында тоғыс орыннарын хайраллааннарын кӧрерлер;
- тоғынӌы чох идінҷектерге, оох предприятиее субсидия сині пір Россиядағы иң тӧбін чал ахчазы синіне (МРОТ) тиңнелер (12130 салковай);
- идінӌектің (юридическай лицоның) 2020 чылның кӧрік айының 1-ғы кӱніне налогтарха паза страховой тӧлеглерӌе ӧдізі 3000 салковайны аспинчатса;
- предприятие пӱдізін алыстырбинчатханы, чох иділбинчеткені паза банкрот полбинчатханы санға алылар.
Грант сині
Аны санап алар ӱчӱн, 12130 салковайны тоғынчатханнар санына хатирға кирек, че оларның саны алындағы айның санын аспазын.
Грантха пічікті хайдар пирерге?
Сурыныс пічии налог службазынзар Интернетче, почтаӌа алай налог тӧлепчеткен идінӌектің (предприятиенің) кабинедінӌе алылча:
- сілкер айында - хосхар айы ӱчӱн субсидияа;
- хандых айында - сілкер айы ӱчӱн субсидияа.
Грантты пирбестеңер чарадығны аларға сылтағ полар: налог органнарының танығларына киліспинчеткен реквизиттер пирілгені. Че ол искірігні тӱзедіп, субсидияны хатап сурарға чарир.
Хайди грант тӧлелер?
Налог службазы сурыныс пічіктерін, пір реестрге чыып, казначействоға пирер. Пазағы кӱнінде ол тӧлеглерні ызар.
Нимее хорадарға чарир грант ахчазын?
Идінӌекке, кічіг паза ортын предприятие ээзіне ахчаны иң кирек хорадығларға позыдарға чарир: чал ахчазына, коммунальнай полызығлар ӱчӱн тӧлеглерге паза пасхазына.
Сурығлар полза, сығдырадарға чарир Федеральнай налог службазының «ізіг линия» номеріне: 8 (800) 222-22-22 алай сайтсар айланарға: nalog.ru.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде