ПАСТАҒЫ КЛАССТЫҢ ӰГРЕНӋІЛЕРІНЕ -15 МУҢ САЛКОВАЙ
27.08.2021
Хабарлар
Марығ чарлалча. Хакасияның правительствозы паза республиканың национальнай паза территориальнай политика министерствозы пастағы классха парчатханнарның сӧбірелерін хакас тілін прайзынаң артых пілчеткеннер мариинда аралазарға хығырча. Чыл сай иртірілчеткен марығда ӧткін аралазып, пай пілістеріңні чахсы кӧзідіңер
Хакасияда пастағы классха парчатхан паза тӧреен тілін чахсы пілчеткен ӱгренҷілер аразында марығ чарлалча. Марыға тимнелген пічіктерні Хакасияның национальнай паза территориальнай политика министерствозында 1 сентябрьдаң 10 октябрьға теере аларлар.
Марығның ӧӧн пӧгіні - Хакас Республикада ікінҷі хазна тіліне саналчатхан хакас тілін хайраллап халары паза мыннаң мындар тилідері, хакас чонның культуразының паза ӧбекелерібіс артысхан ис-пайның чидиин чідірбеске, тӧреен тілні сӧбірелерде ӱгренері.
Марығда аралазарға паза хакас тілін хайди пілчеткенінче сыныхтағ иртерге 2021 чылда Хакасиядағы тиксі ӱгредігліг ортымах школаларның пастағы класстарның ӱгренҷілері паза оларның іҷе-пабалары хығыртылчалар.
Сыйыхха пирілчеткен ахчаның ӧӧн фонды - 1,5 млн салковай. Чиңісчілер санында пастағы классха парған 100 ӱгренҷі поларға кирек - оларның полғаны ла 15 муң салковай сыйыхха алар.
Марығда аралазарға мындағ тоғыстар тимнеп саларға паза пічіктер пирерге киректелче:
- марығда аралазардаңар сурыныс пічии;
- паспорттың хобырғаны;
- полған на кізінің лицевой счедының страховой номерінің (СНИЛС) хобырғаны алай индивидуальнай (персонифицированнай) системада санға алылғанын киречілепчеткен пічіктің хобырғаны. Мында электроннай вариант таа чарир;
- сурыныс пічиин пирген кізінің Россия Федерациязының чирінде чуртапчатхан физическай лицо орындағы налог органында санға алылғанын киречілепчеткен пічиинің (ИНН) хобырғаны;
- пастағы классха парған ӱгренчінің тӧрееннеңер киречілепчеткен пічіктің хобырғаны;
- пастағы классха парған пала хайдағ школада ӱгренчеткенін киречілепчеткен пічік;
- хоных хонғаннаңар алай адын алыстырғаннаңар (сынап сурыныс пічиин пасхан кізінің паспортында ады-солазы пастағы
- классха парған ӱгренҷінің свидетельствозынаң пасхалалчатса) пічіктернің хобырғаны;
- пастағы класс ӱгренҷізінің законнай представительінің пічіктерінің хобырғаны (сынап законнай представитель пір ле полбаза);
- кредит организацияларында счет асханнаңар пічіктің хобырғаны.
Марыға ызылған тоғыста іҷе-пабаның піреезі пастағы классха парған ӱгренҷінең хакас тілінең чоохтасханнаңар видеозапись поларға кирек. Аның сині 5 минутадаң артых полбасха паза анда паладаңар, сӧбіредеңер танығлар танысхан оңдайда иртерге кирек; хынчатхан ойнаҷахтарынаңар, кӧңніне кірчеткен ойыннардаңар, нименең айғазарға хынчатханнаңар, Чир-суунаңар искіріглер пирілерге киректелче.
Марыға ызылған видеозапись мындағ оңдайнаң паалалар: хакас тілінең чоохтанғанын ӱгренҷі чахсы оңарчатханы, позы чоохтазығда ӧткін араласчатханы, позының сағыстарын пілдістіг читір полчатханы, сӧстерні орта адапчатханы.
Марыға ызылған тоғыстар паза прай кирек пічіктер пу адресче алылчалар:
655017, Хакас Республика, Ағбан г., Щетинкиннін ор., 18 алай электроннай оңдайда (PDF-файл алай JPG-файл форматта) электроннай почтаа: minnac@r-19.ru.
Пірее сурығлар хоостыра 8 (3902) 239-001, 239-307 телефоннарҷа сығдырадып, піліп аларға чарир.
Марығның тимнегҷілері - Хакас Республиканың Правительствозы паза Хакасияның национальнай паза территориальнай политика министерствозы.
Марығ оңдайларынаңар паза хайдағ пічіктер тимнирге киректелчеткеннеңер Хакас Республиканың хазна ӱлгӱзінің толдырығ органнарының официальнай порталында паза Хакасияның миннацполитика страницазында пу адресче www.ru («Общие сведения» - «Мероприятия в сфере государственной политики» - «Конкурсы»-«2021») піліп аларға чарир.
Автор :
Хакасияның национальнай паза территориальнай политика министерствозы
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде