КЕМ «ОСКАР» АЛАР НИ?
01.07.2022
Хабарлар
Школа тоосхан чииттер
Школа тоосханнарның иирі-2022. 28 июньда Таштып аймаанда школа тоосханнарның иирі ирткен. Школада 11 чыл ӱгрен салған олианнар, пілістерінең сыныхтағларын иртіп, ниик чӱректіг ӱгретчілернең, олған тузынаң анымҷохтасханнар
Кибір хоостыра пайрам Чиңіс паркында пасталған. Анда чыылған улус, Илбек Ада чаада чат халғаннарны хумартхылап, пір минута сым турған. Сомға суурынып, выпускниктер іӌе-пабаларынаң, ӱгретчілерінең Культура туразынзар колоннанаң пар сыхханнар.
Ӱлӱкӱн Голливудтағы «Оскар» кинопремия апарылчатхан оңдайнаң иртірілген. Оол-хыстарны аймах номинацияларӌа таныхтааннар: «Звездный креатив», «К вершине Олимпа», «Будущее села», «Успешный дебют» паза даа пасхазы. Прай аал чӧбінің выпускнигі - 81 кізі - хайдағ-да номинацияӌа таныхтатхан. Пілдістіг, ӧӧн пӧгін - ойын пастыра оларға аттестаттар читір пирері. Аймах пазы Алексей Дьяченко, ӱгредіг управлениезінің устағӌызы Наталья Рыженко, физическай культура паза спорт управлениезінің устағӌызы Сергей Карамашев, культура управлениезінің устағӌызы Елена Цыганкова, республиканың Ӧӧркі Чӧбінің депутады Наталья Кокарева паза Таштып аал чӧбінің пазы Рустам Салимов олғаннарны полған на номинацияӌа алғыстааннар.
Алтын медальлар Таштыптағы 1 № школаның ӱгренӌізі Дарья Рудская паза 2 № школаның выпускнигі Марина Полякова алып алғаннар. Ідӧк Марина Полякова «Хакасияның алтын ізенізі» медальнаң таныхтатхан. Республика синіндегі сыйых ӱгредігде паза школа чуртазындағы пӧзік чидіглерге читкен ӱчӱн пирілче. Сценаа ідӧк хыстарның іӌелерін хығырғаннар, ӧткін палалар ӧскір салған ӱчӱн, оларға Аарластығ пічіктер читірілген. Сағынчам, андағ чӱрексіністіг кӱнде полған на выпускниктің іӌе-пабазы позының палазы ӱчӱн поғдархаан. Олғаннарны школада 11 чыл ӱгредеріне нинӌе кӱс парыбысча, я? Аттестат - ол ӱгренӌінің, іӌе-пабазының паза ӱгретчілері сіренізінің салтары.
Пыдырахтағы школаны пӱӱл пір ле кізі тоосты. Даниил Шейерман ӱгредігде дее, халых чуртаста даа ӧткін аралазарға маңнантыр. Ол - аймах синіндегі «Россия - тӧреен чирім» чайаачы марығның, олимпиадаларның чиңісчізі паза республика синіндегі «Ынархас чолларының» призёры.
Пайрамда школалар устағӌылары «Оскар» осхас алтын статуэткаларнаң сыйыхтатханнар. Класс устағӌылары даа хайығ чох халбааннар. Анзы пілдістіг, школа чылларына олар палаларға ікінӌі іӌе-паба чіли пол парғаннар нооза, чӧптер пиргеннер, хабасханнар, кирек полза, хызааннабыс таа турғаннар.
Школа тоосханнарның иирінде сценадаң выпускниктерге кӧп чылығ сӧс чоохталған, кемнің-де харах чазы даа кӧрін парӌаң. Хомзыныстығ, че чиит улусты хайди даа позыдарға кирек - наа чуртассар, наа чидіглерзер.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде