РЕДАКЦИЯНЫҢ ПӰӰНГІ ӦМЕЗІ
02.06.2017
Хабарлар
Хакасияның Правительствозы паза Ӧӧркі Чӧбі «Хабар» газетаның чайаачы ӧмезін паза прай тоғынҷыларын пастағы номер чарыхха сыхханның 90 чылынаң алғыстапчалар!
Газета хығырығҷыларның аарлазынаң, хынызынаң тузаланча. Аның тархыны пістің республика тархынынаң пик палғалыс парған. Ирткен хатығ чыллар, амғы амыр чуртас газетаның страницаларында сығарылча. Пӱӱн дее редакцияның ӧмезі, прай кӱзін салып, хығырығҷыларға тоғынча.
Чуртастаңар сын хабарлар пиріп, газетаның полған на номерін сығарчатхан тоғынҷыларға улуғ алғызыбыс читірчебіс. Газетаның ветераннарын, журналистикаа пирін салған ӱчӱн, пӧзік профессионализмнері ӱчӱн, алынҷа алғыстапчабыс.
Аарлығ нанҷылар, сірерге пик хазых, часка алғапчабыс. Чайаачы кӱзіңер тоозылбазын, алғыстапчатхан хығырығҷыларың кӧп ползын!
В.М.ЗИМИН, В.Н.ШТЫГАШЕВ,
Хакасияның пазы - Хакасияның Хакасияның Ӧӧркі Чӧп кнезі
90 чыл - айдас чидіг!
«Хабар» газета 90 чыл чоннаң хада. Чуртас оңдайы хоостыра тӧрт хати адын алыстырған даа полза, хығырығҷыларының сын паза киртістіг нанҷызы полча, хакас тілін хайраллап халарында улуғ тоғыс апарча.
Хакасияда пастағызын сығып пастаан газетаның страницаларында коллективизация, ханнығ чаа чыллары, кӧлей чирлерні кӧдіргені, хан тигірзер учухханы, илбек пӱдіріглер алғым чарыдыл турғаннар, ам даа чарыдылча. «Хабар» пӱӱнгі кӱннең тиңни хаалапча, чоннаң пик палғалыс тутча.
Ирткен 90 чылның аразына «Хабар» саблығ чол тобырған танығлығ киректерні чахсы чарыт турған, ол тоғысты ам даа тохтатпинча. Мында пӧзік пілістіг, чітіг сағыстығ устар тоғынчалар, тиксі махтаға сыхчалар.
Пайрамнаң, газетаның 90 чылынаң, аарлығ нанҷыларым!
О.В.ШИРКОВЕЦ,
Россияның Журнаписттер пірігізінің Хакасиядағы пӧлиинің кнезі
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде