ИМНЕГ ТОҒЫНҶЫЛАРЫ КӰСТЕРІНЕҢ СПОРТТА СЫНАСХАННАР
14.06.2017
Хабарлар
Ирткен пятницада Ағбандағы «Локомотив» стадионда имнег тоғынҷыларының спартакиадазы ирткен. Кибір хоостыра аны чыл сай имнег киреенде істенчеткеннернің кӱніне чарыдып иртірчелер. Мероприятиені Хакасияның имнег тоғынҷыларының профсоюзы республиканың хазых хайраллаҷаң министерствозы полызиинаң иртірген.
Марығлар сайбағ чох иртерін республиканың саблығ тренерлері, спорт устары хайығда тутханнар. Пӱӱл спартакиадада Хакасияның имнег организацияларының 23 командазы араласхан, тиксі - 575 кізі. Ол санда аймахтардағы, Ағбан, Абаза, Харатас, Саяногорск городтардағы имнег тураларының, Г.Я.Ремишевскаяның адынаң республиканың имнег туразының, онкология, ӧкпе ағырии диспансерлерінің, реабилитация, гигиена паза эпидемиология, хан кіннерінің, Н.М.Одежкиннің адынаң харах имнег туразының, «Ресфармация» учреждениенің, «Теремок» интернаттың тоғынҷылары. Спартакиада араласчылары ГТО нормативтерін толдырарынҷа, волейболҷа, стол теннизінҷе, шахматча, стритболҷа, скакалканаң сегірерінҷе марығласханнар. Ідӧк хай пірее командалар арғамҷы тартысханнар, че аның салтарлары тиксі марығларда санға алылбаан.
Мероприятиені Хакасияның хазых хайраллаҷаң министрі Владимир Костюш асхан. «Піс 16-ҷы чылы пу стадионда тоғасчабыс. Марығларда аралазып, имнег тоғынҷылары республика чуртағҷыларына кӧзідім полчалар паза хазых чуртас оңдайын апарарға, пос хазиина хайарға, спортнаң айғазарға кирек полчатханына кізілернің хайиин айландырчалар. Прайзын профессиональнай ӱлӱкӱннең алғыстапчам. Сірер, позыңарны прай тоғысха пирініп, кізінің чуртазын, хазиин хайраллапчазар. Істенізіңер ӱчӱн улуғ алғыс, пик хазыхтығ, часкалығ полыңар, иң кирек, нандырығлығ профессияны таллап алғаныңарға поғдархаңар», - теен ол. Ідӧк чыылысханнарны Хакасияның профсоюзтар организациязы кнезінің орынҷызы Александр Теппе паза республиканың имнег тоғынҷыларының профсоюз кнезі Тамара Гольнева алғыстааннар.
Мындағ кӧп кізі араласчатхан спартакиада хынығ ирткен. Полған на командаа 20 азыра кізі кирілген. Прай марығ кӧрімнері пір туста иртірілгеннер. Че ӧӧн хайығ волейболға айландырылған тізе, саба полбас. Пу ойыннар ӱр ирткеннер, аннаңар кізілер аймах-пасха марығларда аралазарға маңнанғаннар, анаң волейбол ойнапчатхан орында чыылысханнар. Полғаны ла позының командазы ӱчӱн «ағырған», ойнапчатханнар даа чиңіс тударға кӱстенгеннер. Че пастағы орынны Алтай аймааның имнег туразының командазы холға кирген.
Марығ марығнаң, че спартакиадада командалар аразында иң артыхтарны табары ӧӧні полбаан. Имнег тоғынҷылары, чыылызып, институтты хада тоосхан нанҷыларынаң тоғазып алар оңдай пирілчеткеніне ӧрінгеннер. «Институтты тоозып, хада ӱгренгеннер прай республикаҷа тарас парғабыс. Олаңай кӱннерде учураспинчабыс, мында, тізең, тоғазып, чоохтазып алчабыс. Пір чылда пір хати чыылызып алар оңдай пары прайзын ӧріндірче, - чоохтапча имнег киреенде 30 азыра чыл істен салған табырах имнег полызииның имҷізі Вячеслав Тогочаков. - Спартакиада нинҷе чыл иртче, ол син мында араласчам. Мин волейбол ойнаам, командабыста ветеранға саналчам, амғы туста марығларда араласчатхан чииттерібіс кӧп. Піс пу ойынға уғаа хынчабыс, хада тоғынчатханнарнаң, неделяда ікі-ӱс хати чыылызып, ойнаҷаң орынны арендаа алып ойнапчабыс. Ідӧк пӱӱн аймах ГТО нормативтерін толдырғам».
Паза спартакиадада хынып араласчатханнарның санына кирерге чарир Таштып аймааның имнег туразында ӧӧн медсестра полып тоғынчатхан Татьяна Доронинаны. «Мин имнег киреенде 2002 чылдаң сығара істенчем. Пӱӱнгі спартакиада чахсы иртті, сӧрӧн арах кӱн тур пиргені ӧріндірче, алындағы чылларда ізіглер полған. Командабысха 25 кізі кирілген, марығларның прай кӧрімнерінде араласхабыс. Оӧн имҷібіс Александр Фридман ипчізінең хада килгеннерӧк. Мындағ спартакиада иртірілчеткені тузалығ, таныстарнаң тоғазып аларға уғаа хынығ, чыл сай хынып мында араласчабыс. Таныхтирға кирек, Таштып аймаанда ГТО нормативтерін толдырарынҷа марығлар тӧреміл иртірілче. Чыл сай анда аймахтың прай учреждениелері араласча. Аннаңар піске имнег тоғынҷыларының спартакиадазында аралазарға сидік нимес».
Спартакиаданың тузазын Хакасияның хазых хайраллаҷаң министерствозы ідӧк пӧзік паалапча. Хайди чоохтаан республиканың хазых хайраллаҷаң министрінің полысчызы Михаил Мальгин: «Пӱӱл мында, пасха чылларнаң тиңнестірзе, уғаа кӧп команда араласча. Хакасияның хазых хайраллирының тархынында пу 16-ҷы спартакиадазы полча. Имнег тоғынҷылары, ӱлӱкӱннері алнында чыылызып, спортта кӱстерінең сыназып, хазых чуртас оңдайына тартылчатханнарын кӧзітчелер. Ікінҷі чылы спартакиадада ГТО нормативтері сыныхталча. Мында спортта улуғ чидіглер кӧзітпинчеткеннерге дее аралазарға чарир, хазыхтары ла чахсы ползын. Мының алнында спартакиадада ӧӧнінде чииттерге кӧрілген спорт кӧрімнері полған ползалар, ГТО нормативтері кирілерінең, мында 30 - 39, 40 - 49, 50 азыра частығларға аралазар оңдай пирілче. Аннаңар чылдаң пу спартакиадада араласчатханнарның саны ӧзіп одырча. Имнег тоғынҷыларының мындағ мероприятиезі иртірілчеткеніне ӧрінчебіс. Прайзын чағдапчатхан ӱлӱкӱннең алғыстапчам. Имнег киреенде тоғынчатханнарға пик хазых, тоғыста чахсы чидіглерге чидерге, физкультуранаң айғас турарға алғапчам».
Полған на спорт кӧрімінҷе чиңісчілер адалған, оларға грамоталар паза сыйыхтар читірілген. Ідӧк прай команданаң чахсы салтарлар кӧзіткеннер адалғаннар. Іди Г.Я.Ремишевскаяның адынаң республиканың имнег туразының командазы ӱзінҷі орынға турысхан, ікінҷі орынға - Ағбандағы табырах имнег полызии станциязының командазы, пастағы орынға - Ағбандағы имнег туразының командазы. Сыйыхтығ орынға турысханнар дипломнарнаң, кубоктарнаң таныхтатханнар, пасха командаларға грамоталар, волейбол меспектері читірілген. Арғамҷы тартызарында пастағы орынға турысханнарға ідӧк алынҷа сыйых пирілген.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде