ТОҒЫС АРАЗЫНДА ОЛҒАН ПЛОЩАДКАЗЫН ТИМНЕП ПИРГЕН
08.09.2017
Хабарлар
Т0ҒЫС АРАЗЫНДА 0ЛҒАН ПЛОЩАДКАЗЫН ТИМНЕП ПИРГЕН
Алында, Совет тузында, ус холлығ ооллар олған-узахха ойнаҷаң орыннар тимнеҷеңнер, амғы даа туста олған площадкаларын идерге кӱстенчелер. Прай ол хайди-да административнай оңдайнаң парча, чахығларны ӧӧртін тӱзірчелер. Че матыр ооллар парох, ноо даа маң чох ползын, олар сағынған сағыстарын толдырчалар.
Оларның пірсі Асхыстағы идінҷек Геннадий Максимович Чепчигашев полча. Геннадий позы Асхыстаң, мында ӧскен, школаа чӧрген. Армия соонаң Быткомбинатта кип тікчең полып тоғынған, анаң кип-азах пысчаң ус полған. Тоғызон чылларда прай ниме изел пастабысхан. Ол тустаңар Геннадий Максимович позы чоохтапча:
- Ол чылларда Быткомбинатта прай ниме алыс сыххан, ыстан тіктіріп алардаң, материал даа аларға сидік полған. Рынокта, тізең, Хыдаттаң ағылған ыстаннар хай-хай ниик паанаң садылҷаңнар. Ана андада позымның киреен пастаам. Ағас чарҷаңмын, чардылар хурудып, аны-мыны итчеңміс.
Палаларым Максимнең Маша кічіг полғаннар, ибде чӱгӱріс чӧрчелер. Хаҷан ағас хурутчаң цехты чаапчатханда, артхы тастаан тимір швеллер тастына сых парған, узун пол парған. Анаң сағыс кір килген, кизібіссем, тимір аар даа, пеер дее чох халар. Ол сортайчатхан швеллерге ілҷірбелердең чилеңмес идібіскем. Олған одырҷаң орынға иргі автошина хаптыр салғам. Мына пилен чилеңмес. Сағыс аннаң андар ойлапча. Ағастаң, чардылардаң чылҷаң ниме идібіскем. Тасхар минің палаларым чылчалар, хонҷых палалар мындохтар. Школадаң айланчатхан олғаннар ідӧк ойнирға маңнанҷаңнар. Мағаа тыхтирға ла маң чоғыл.
Мағаа, идінҷек кізее, аннаң-мыннаң айғазарға килісче, пір орында турҷаа чоғыл, конкуренттер прай саринаң хысчалар. Спорткомплекс хыринда гостиница турғызыбысхам. Мындох кафе азыбысхам. Хоныхха килген кізілерні азырабысчабыс. Марығларға килген олғаннарны чуртатчабыс, ідӧк азырапчабыс. Оларға чуртаан паза азыранған ӱчӱн пааларны тӱзірерге кӱстенчем. Олғаннар ахча тоғынминчалар нооза.
Тынағ кӱннерінде улуғ улусха иирлер иртірерге килісче, стол салчабыс, тойлар иртірчебіс. Улуғларнаң хада палаҷахтар полыбохча. Олар сууласха майыхчалар. Сағынып алғам олған площадказын турғызарға. Гостиницанаң хости чайғы кафе, аның хыринда кічиҷек каток паза чилеңмес турғызыбысхам.
Пӱӱл Интернетте иргі автошиналардаң кізее тӧӧй ниме иділгенін кӧр салғам. Аны, ідӧк идіп алып, олған площадказы хыринда турғызыбысхабыс, аймах ӧңнернең сырлабысхабыс, ӧрчіліг «кізі» пол парған.
Пӱӱл киинең ӱбӱрткен батут турғызыбысхабыс, олғаннарға улам хынығ. Анда майыхханҷа сегіріп алчалар.
Идінҷек кирее оой нимес, хыймыранарға кирек. Кӧрчезер, Асхыста «Светофор» паза ниик пааҷа ниме-ноо сатчатхан пір магазин азыл парғанда, пістің аалдағы рынокта идінҷектер кічіг садығ тураларын чаапчалар. Андағ даа полза, палаҷахтарға хайығ саларға кирек. Піс олох автошиналардаң ам даа хай пірее нимелер идербіс, олған площадкалары ӧрчіліг кӧрінзін.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде