ЧАБА ХУҶАХХА ХАБЫЗЫП...
26.12.2018
Хабарлар
Грек-рим курезі. Асхыста С.З.Карамчаковтың адынаң спорткомплексте, Семён Самуилович Мамышевті хумартхылап, грек-рим кӱрезінҷе республика турнирі иртті
Улуғ хырлас айының 21 кӱнінде иртенӧк спорткомплекссер кӱресчілер паза оларның тренерлері чыылызып пастааннар. Спортсменнер, кӧдірініп, кем хайдағ кӧдірімде харбазарын пілгенҷе 11.00 часха чит парған. Кӱресчілер, кибіске сығып, марығны пастааннар. Семён Самуилович Мамышевтің хумартхызына чарыдылған турнир чыл сай иртче. Семён чиитке пу чарыхтаң парыбысхан. Ол, аймах марығларда улуғ чидіглерге чидіп, СССР-ның грек-рим кӱрезінҷе (ол туста классика кӱрезі адалған) спорт узы полыбысхан. СССР первенствозында пастағы орынны холға киріп, ол Хакасияның кӱресчілері аразында андағ чидіге иң пастағызын читкен.
12.00 часта марығ пайрамни азылған. Пастағы сӧс Асхыстағы спорт школазы устағҷызының орынҷызы Андрей Фёдорович Челтыгмашевке пирілген. Ідӧк чоох тутхан Хакасияның грек-рим кӱрезінҷе федерациязынын ӧӧн тренері Николай Сергеевич Ачитаев. Грек-рим кӱрезінҷе Россияның саблығ тренері Геннадий Михайлович Боргояков чооғында таныхтаан:
- Олғаннар, хаӌан-да Семён Самуилович сірерӧк осхас полған. Ол позының чайалған кӱзін, чапчаңын тренировкаларда таптаан. Кӱрестерде аймах «ыырҷыларнаң» тоғазып, оларның микелерін ӱгреніп, пӧзік чидіглерге читкен. Сірер дее ідӧк кӱстенiңeр. Сидіктерні тобырғаны алнынзар парар оңдай пирер.
Марығның пайрамнығ чардығын чапхан турнирнің ӧӧн чарғыҷызы Виталий Григорьевич Чичинин: «Пу турнирге Хакасияның прай даа аймахтарынаң кӱресчілер чыылысханнар. Прай 91 спортсмен. Хомзынысха, Шира кӱресчілері килбееннер - оларның постарының кӱресче марығ иртчеттір». Анаң ол тоғазығ оңдайларын чарлап пирген.
Хайди тидірлер спортсменнер, марығда тоғасчатхан ооллар сах андох алнына сығарға кӱстенчелер. Мында даа полған на кӧдірімде чиңіс тударға сіренгеннер.
Марығда 2002-2003 чылларда тӧреен саарбахтар араласханнар. Оларның кӱресчеткеннерін кӧрерге хынығ
полған. Саңай чаба хуҷахха хабызып, сімерке иртірерге кӱстенгеннер. Пірееде, сімеркені читіре дее тимнеп албин, «ыырҷыны» тастирға сіренгеннер.
Саңай пасха кирек улуғларның аразында. Оларның кӧдірімнері дее аар, постарын даа кӧрзең, оолахтарға ит кірібіскені кӧрінче. Олар, кибіске сығып, хол тудызып алзалар, чаба хуҷахха хабыс полбин илееде парыбысчатханнар. Улуғ марығларда кӱресчілернің, хабыс полбин, хол пыласчатханнарын кӧрче поларзар. Олар пірееде прай даа марығ тузын іди иртірчелер. Че піреезі ле, хол пылазып, ипти чаба хуҷахха хаап алза, кӧгіске алып силче.
Пу даа марығда олар устарын кӧзіткеннер. Чахсы тимненіп, сімерке салып тастазалар, уғаа сіліг. Іди Алексей Пахтаев «ыырҷыларын» тастапчатханын кӧрерге киліскен. «Ол -2018 чылда Сибирьдегі федеральнай округтың чиңісчізі, - чоохтаан Виталий Чичинин. - Пу турнирде пастағы орын алған ооллар Сибирьдегі федеральнай округтың мариинда аралазарлар. Ол февраль айның пастағы кӱннерінде Ағбанда иртер».
Чиңісчілер полыбысханнар:
42 кг кӧдірімде - Олег Тороков, Ағбаннаң.
45 кг кӧдірімде - Андриан Типчигешев, Ӱс чулдаң.
48 кг кӧдірімде - Виктор Сагалаков, Пилтірдең.
51 кг кӧдірімде - Денис Боргояков, Асхыстаң.
55 кг кӧдірімде - Аяс Топоев, Асхыстаң.
60 кг кӧдірімде - Карим Токояков, Ис пилтірінең.
65 кг кӧдірімде - Алексей Пахтаев, Ағбаннаң.
71 кг кӧдірімде -Тимур Кандыков, Пилтірдең.
80 кг кӧдірімде - Антон Пахтаев, Ағбаннаң.
80 кг пӧзік кӧдірімде - Александр Четверик, Ағбаннаң.
Турнирнің ӧӧн чарғыҷызы Виталий Чичининнің чооғынаң, марығ амыр, талас чох ирткен. Олғаннар кинебееннер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде