ЧИҢІСТІ ЧАҒЫННАТХАН МАТЫРЛАРНАҢ ТОҒАЗЫҒ
14.05.2019
Хабарлар
Ағбан город администрациязында ветераннарнаң тоғазығда
Илбек Чиңіс. 8 майда Ағбан городтың устағ-пастааның туразында Илбек Ада чаа ветераннарынаң, тыл істенҷілерінең, чаа палаларынаң тоғазығ ирткен.
Мындағ тоғазығ чыл сай иртче. Ол кибірге кір парған тізе, саба полбас. Ағбан городтың пазы Николай Булакин, Илбек Ада чаа ветераннарынаң тоғазып, оларның амғы чуртазынаңар чоохтасхан паза оларны сағыссыратчатхан сурығларға нандырған.
Пӱӱлгі тоғазыға 18 ветеран килерге кирек полған, че 14 ле кізі килген. Оларның санында Илбек Ада чааның 8 араласчызы: Пётр Иванович Буринов, Надежда Григорьевна Антипина, Иван Егорович Шмаков, Анатолий Александрович Марьясов, Михаил Николаевич Михайлов, Мария Павловна Семенюк, Елена Ивановна Сушкова, Иван Егорович Чернов; Ленинград хурчааның ікі чуртағҷызы Людмила Константиновна Соколова паза Галина Владимировна Фёдорова; тыл істенҷілері Елизавета Анисимовна Антонович, Аза Михайловна Побирашко, Алексей Дмитриевич Грушевский; фашист лагерьлерінде чобатхан Адам Андреевич Зозуля. Николай Булакин тоғазыға килген чонны чағдапчатхан Илбек Чиңіс кӱнінің 74 чылынаң алғыстаан.
- Сірер - пістің матырларыбыс. Таңдағы чиңіс пайрамы - сірернің чиңізіңер. Чиңіс кӱні - пістің хазнада уғаа танығлығ ӱлӱкӱн. Оӧн ӱлӱкӱн тиирге чарир. Пу кӱн - чаадаңар, Илбек Ада чаа матырларынаңар, тыл істенҷілерінеңер, Чиңіс кӱніне читіре чуртап полбаан кізілердеңер хумартхы. Аннаңар Чиңіс кӱні алнында піс кибірли тоғасчабыс, - теен Н.Г.Булакин.
Анаң ветераннар город пазына аймах сурығлар пиргеннер паза алғыстар читіргеннер. Михаил Михайлов одыңны тикке алчатхан ӱчӱн алғызын читірген.
- Кӧп чахсы кирек ӱчӱн городтың устағ-пастаана, Сірерге, Николай Генрихович, улуғ алғызым читірчем. Ікінҷі чылы мағаа одың тикке пирілген. Аның ӱчӱн сірерге алғыс! - таныхтаан Михаил Николаевич.
Анаң Илбек Ада чаа ветераны саннығ телевидение паза национальнай проекттер ниме полчалар тіп сурығ пирген. Николай Булакиннін нандырии хоостыра ветераннар саннығ, кабель телевидениезінеңер піліп алғаннар. Национальнай проекттердеңер город пазы толдыразынаң чоохтап пирген. Ол проекттер хоостыра Ағбанда улуғ школа пӱдірілче. Май ай тоозылчатса, андағох ікінҷі школаның пӱдірии пасталар. Национальнай проекттер полызиинаң ідӧк олған садтары, спорт объекттері, парктар, скверлер пӱдірілчелер, чоллар тыхталчалар паза пасха даа кӧп тоғыс толдырылча. Аны хоостыра федеральнай бюджеттең ахча пирілче. Мындағ нандырыға ветераннар чапсааннар.
Елизавета Анисимовна Антонович - Ағбандағы Индіркі Согра микрорайонның чуртағҷызы. Андағы чуртағҷыларның сурынызынаң ол мындағ сурығнаң айланған: «Индіркі Согразар троллейбус чӧргісчең оңдай полар ба?» Халғанҷы чылларда пу микрорайонда чурт кӧп пӱдірілче, чуртағҷыларның саны тың ӧс парған. Че иирде автобустар асхынах чӧрчеткеннеңер, чонға ибзер чидіп аларға сидік.
Орайға теере тоғынчатханнарға ибзер таксиліг парарға килісче.
- Кӧні чоохтаза, пу пӧгінні толдырарға сидік. Пылтыр пістің городха пис электробус алылған. Индіркі Согразар электробус чӧргізер оңдайны санға алза, анзы уғаа аарлыға тур парар. Пір электробус 11 миллион салковайға турча. Согразар линия азарға итсе, тӧртче электробус аларға кирек. Ахча саринаң киректер алысса, арса, линия азарбыс таа. Амды сірернің «наа Согра» ӧсче, туралар пӱдірілче. Анда хоза олған сады киректелче. Оңдай полза, национальная проект хоостыра пӱдірербіс, - таныхтаан Николай Генрихович.
Елизавета Анисимовна Николай Булакинге наа клуб ӱчӱн алғызын читірген:
- Піске, Индіркі Сограның чуртағӌыларына, уғаа чахсы клуб пӱдір пиргеннерің ӱчӱн алғызыбыс читірчебіс. Амды ӱлӱкӱннерде чииттер дее, улуғлар даа андар хынып чӧрчелер. Клубта чон тығырыма полча. Правительстваа паза Ағбан город устағ-пастаана улуғ алғыс! Анаң «Звоны» Ағбан городтың муниципальнай ансамбльы хынығ концерт кӧзіткен. «Синий платочек», «Катюша», «Смуглянка» паза пасха даа сарыннар толдырылғаннар.
Тоғазығда ідӧк Ағбан городтағы ветераннар чӧбінің кізілері полғаннар. Оларның пірсі - Евдокия Яковлевна Ильинец. Ол 1939 чылда тӧреен. Чаа тоозылчатханда, ағаа 6 час полған. Кічіг дее полған полза, ол чаа чылларын чахсы оңнапча.
- Чаа тузында чонға, уламох кічіг палаларға, уғаа аар полған. Мин, пасха олғаннар чіли, тың ағырғам. Ол туста Ағбан пасха полған. Чаа тоозылғанда, городта суғ турған. Суғ кӧп полған. Тротуарлар паза хай пірее чоллар чардыларнаң тӧзелгеннер. Чаа соонаң Ағбанның кӧрімі кӧместең алыс сыххан. Мин, сала теен парғанымда, Чиңіс паркында паза Харатас город саринзар ағастар одыртарға чӧрчеңмін. Чаа соонаң Ағбан городха тӧӧй кӧрімніг пол сыххан. Амды ол саңай пасха, - сағыстарынаң ӱлескен чаа палазы Евдокия Яковлевна Ильинец.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде