ЧИҢІСТЕРГЕ ПАЙ ЧОРЫХ
07.02.2020
Хабарлар
Меспектіг хоккей. Ағбаңдағы «Саяны», теестегі тоғазығларын пасха командаларның айғыларында иртіріп, ибзер айлан килді. Олар хайди ирткеннеңер пӱӱнгі искіріг
Ибдең сығып, пістіңнер пастап Иркутск городта тохтааннар. Анда орвида «Байкал-Энергия-2» команданаң ойнирға кирек полған. Пастағы тоғазығ 5:2 саннаң тоозылған, чир-суғҷыларыбыс чиңіс тутханнар. Пістіңнернің санынаң Михаил Селедков ӱс гол, Руслан Гавричков ікі гол кирібіскеннер.
Ікінҷі ойын хынығ, че хазыр оңдайда ирткенін прайзы даа таныхтаан. Тоғазығ пасталғаннаң 15 минута ирт парған, че пір дее команда гол киргелек. Хоккеисттер тынаға парчатханда, 2:1 саннаң пістіңнер алнында полғаннар. Тоғазығның ікінҷі чардығында чир-суғҷыларыбыс устарын маңат кӧзіткеннер. Ойын 8:2 саннаң тоозылған. Пістіңнернің санынаң Руслан Гавричков ікі гол, Михаил Селедков, Иван Касаткин, Константин Жаданов, Илья Деревцов, Фёдор Розвезев, Кирилл Бутенко пірер гол кирібіскеннер. Ікі ойында чиңіс тудып, пістіңнер 6 сан «тоғынып» алғаннар. Маңат кӧзідім тиирге чарир.
Иркутсктаң сығара Хабаровсксар читкеннер. Анда «СКА-Нефтяник-2» команданаң ойнааннар. Пістіңнер айғаа сығар алнында Фёдор Розвезевті матап иргіскеннер. Хабаровск - аның тӧреен-ӧскен городы нооза. Анзы ідӧк ойын пазында хаңалҷостанып нандыр турған. Че тоғазығ тузында айғы ээлерінің хаалхазына пастағы голны ол кире сабысхан. Таныхтирға кирек, халғанҷы голны ідӧк Фёдор Розвезев кирібіскен. Тоғазығ, тізең, 10:2 саннаң тоозылған, чир-суғҷыларыбыс утханнар. Пістіңнер санынаң Руслан Гавричков, Александр Захваткин паза Фёдор Розвезев ікілер, Иван Касаткин, Евгений Ткачук, Илья Деревцов паза Николай Верещагин пірер гол кирібіскеннер. Ікінҷі тоғазығ 10:5 саннаң тоозылған, чир-суғҷыларыбыс чиңіс тутханнар.
Хабаровсктаң сығара «Саяны» команданың чолы Приморскай крайдағы Арсеньев городсар арланған. Пістіңнерні анда орындағы «Восток» команда сағыпчатхан. Чир-суғҷыларыбысха пу хайдағ-да изі чох «ыырҷы». Нинҷе хати тоғас парирлар, ойын хайди тоозыларын пірдеезі азынада ухаанҷылирға тідінминче. Итсе, «Восток» пістіңнернең не іди сағыбаан оңдайнаң ойнабинча. Пірее хати иң алнында парчатхан команданы оой ла утып алча, анаң соондағы уйан командаа чиңдірібісче. Аннаңар Ыраххы Востоктағы хоккеисттернің ӧмезін пілдізі чох командаа санапчалар.
Арсеньевте пастағы тоғазығ 3:2 саннаң тоозылған. Пістіңнернің санынаң Руслан Гавричков ікі гол, Михаил Селедков пір гол киргеннер. Айғы ээлері санынаң Дмитрий Барашков паза Семён Карташов пірер гол киргеннер.
Ікінҷі ойынның пастағы чардығы 2:1 саннаң тоозылған, чир-суғҷыларыбыс алнында полғаннар. Хомзынысха сылтағ чох таа полған тиирге чарир. Айғы ээзі Павел Корев саннарны тиңнестірібіскенде дее, чиңіс тударына ізеніс чітпинчеткен. Олох хоккеист «Востокты» алнына сығарғанда, Александр Захваткин саннарны тиңнестірібісче. Тоғазығның 81-ӌі минутазында Никита Никитин марығ ээлерін алнына сығарча. 82-ӌі минутада, тізең, Семён Карташовнаң Андрей Савчук пірсі пірсінің соонҷа пірер гол кирібісчелер. Ойын 6:3 саннаң тоозылған, «Восток» чиңіс тутхан.
Амды пістіңнернің 20 ойын соонаң 45 сан, «Саяны» прайзының алнында. Ікінҷі орында «Кузбасс-2» команда, аның 28 сан, че ол 16 ла ойын иртірген. 18 ойын соонаң «Енисей-2» команда 27 саннығ, ӱзінҷі орында. Арсеньевтегі «Восток» 16 ойын соонаң 27 саннығ, тӧртінңі орында.
Піди кӧр килзе, пу чағында пістіңнерге читчең команда чоғылға тӧӧй. «Саяны» команда Ағбанзар айланды. Позының айғызында ол 20-21 февральда Иркутсктағы «Байкал-Энергия-2» команданаң тоғазар. Че аның алнында 15-16 февральда Хызылчардағы «Енисей-2» команданаң аның айғызында ойнир.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы