ТЫХТАҒНЫ СЫНЫХТИРҒА ЧАХЫҒ ПИРІЛГЕН
11.06.2021
Хабарлар
Чоллар. Пу кӱннерде Хакасияның правительство туразында республика чолларындағы тыхтағ тоғыстарына чарыдылған чыылығ ирткен халғанчы туста Хакасия правительствозынзар, транспорт паза чол хонии министерствозынзар хомай чолларға хоптар кӧп кір сыххан. Чуртағҷыларны чоллар паза чоллардағы тыхтағ тоғызы хомай толдырылғаны хомзындырча.
Пу чағында регион пазы Валентин Коновалов Хакасияның транспорт паза чол хонии министрінең, город-аймахтар пастарынаң, подрядчиктернең тоғасхан.
- Чуртағҷылардаң чолларға кӧп хоп кірче. Пу сидіксініс наа нимес. Чылдаң чылға пу пӧгінге кӧптең кӧп ахча киректелчеткенін, чоллар тыхтағ кирексіпчеткенін пілчебіс. Аймах синніг бюджеттердең ахча позыдылча, асхынах нимес ахча пирілче. Подрядчиктер, заказчиктер тоғыстарын нандырығлығ толдырзыннар тіп сағынчабыс. Ачырғасха, узун участоктар тыхталбинчалар алай тузында нимес паза хомай нааҷылалчалар. Чарым, пір чыл пазынаң тыхтағ иртірілген орыннарда оймахтар пол парча. Пылтыр, алындағы чылларда подрядчиктер тыхтағ тоғызының оңдайларын сайбааннар, тоғыстарны тузында толдырарға маңнанминчатханнар, асфальтты наңмыр, хар чаапчатханда салғаннар. Хай пірее муниципалитеттернің устағ-пастаа, мындағ сайбағларға харахтарын чаап паза сыныхтағларға хайығ салбин, тоғыстарын читіре толдырбачаң. Тыхтағ тоғыстары чахсы паза тузында толдырыларына пір дее сари хайбинча тіп сағынчаңмын.
Прай чолларны пір саңай тыхтабызарға киліспезін пілінчебіс. Иң пастап бюджет ахчазы паза кӱс чидіспес. Хай пірее орыннардағы хомай чоллар ахчанаң палғалыстығ нимес. Мында сурығ турыбысча - ахчаны орта хоратханы паза тоғыс тузында толдырылғаны. Чолларны тыхтирына нандырығлығ хайбаза, миллион, миллиард салковай пу сурығны пӧк полбас, - таныхтаан Хакасия пазы Валентин Коновалов.
Хакасияның транспорт паза чол хонии министрі Дмитрий Василиади пӱӱл наачылирға кӧрілген чоллардаңар искірген. Аның чооғынаң, «Хорғыс чох чахсы чоллар» нацпроект паза «Чол палғалызы» регион проекті хоостыра муниципалитеттер аразындағы паза регионның 8 чолында, муниципальнай пӱдістер істіндегі 16 чолда тыхтағ иртірілер. Чолларның тиксі 52 километрі тыхтал парарға кирек, ол санда регион чолларының 34 километрі, орындағы чолларның 18 километрі.
Амғы туста 23 объектче чӧптезіг иділ парған. 27 майда пір чолча аукцион иртірілген. 17 объектте тыхтағ апарылча, 24-інде - тимнегліг тоғыстар. Регионның пу чолларында подрядчиктер тоғынчалар: Ағбан - Саяногорск чолның 19 - 22 километр кизегінде, Шира - Новосёлов чолның 54-56 километр кизегінде. Пу чолларда асфальттың ӱстӱндегі хадылы тӧзелче. Хойбал - Кӧк хайа чолны тыхтағ тоғыстарына тимнепчелер. Ағбанны ибірчеткен чолны график хоостыра нааҷылапчалар.
Ағбан пилтірі - Чарков - Чорба чолда паза Ағбан - Саяногорск чолның 69 - 71 километр кизегінде подрядчик тоғынғалах. 15 июньнаң пу объекттерні тыхтап пастирлар.
Амғы туста Ағбан пилтірі, Боград, Орджоникидзе аймахтарының чолларында оймахтарны чох идерінҷе тоғыстарны толдырыбысханнар. Ағбан - Ах тобырах, Пригорск - Чорба, Ағбан пилтірі - Чарков - Чорба чолларда, Райковтар аалынзар кірчеткен чолда оймахтар тӱзеділче. Таштып - Чоғархы Сир - Матур, Абаза - Арбыт чолларда пу тоғыстарны толдырып пастапча-лар. Асхыс аймаандағы Пирікчул аалдағы чол тыхтағ кирексіпче. Сорығ город чуртағҷыларынаң хомай чолларға илееде хоп кiрген. Валентин Коновалов пу чолларны хайди даа тыхтирға кирек тіп таныхтаан.
Ағбан городта пӱӱл пис объект тыхтиры кӧріл парған. Амғы туста Пушкиннің, Крыловтың, Вяткиннің, Центральнай орамаларда тыхтағ парча. Прай пу чолларда тоғыс тузында толдырылча. Вяткиннің орамазында наачылас тоғызы чахсы парчатса даа, бордюрлар турғызарына илееде тус хорадылча.
Хакасия пазы Валентин Коновалов город-аймахтар пастарына «Хорғыс чох чахсы чоллар» нацпроектче тыхталчатхан чолларны хайығда тударға, тыхтағ хайди парчатханын сыбыра сыныхтирға чахығ пирген.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде