ЧИИТТЕР НАРКОТИККЕ ТАРТЫЛБАЗЫН
16.07.2021
Хабарлар
Акция. Пу неделяда «Стоп наркотик» чӧрімнің ӧткін чииттері Харатас городтың тураларында пазылған искіріглерні сырнаң сырлааннар
Пу акцияа ідӧк Хакасияның Ӧӧркі Чӧп депутады Валерий Старостин хозылған. Олар, городтың Советскай орамазынңа парып, наркотиктердеңер искіріглерні сырнаң сырлааннар. Пір саринаң, тоғыс улуғ нимес - пазылған нимелерні чох идерге, че аның тузазы улуғ. Наркотиктерні таратчатханнар, мындағ искіріглерні ӧнетін пазып, тоғыс чохтарны паза саарбахтарны наркотик амзирға тартчалар. Чуртағҷыларның пу категориязы иң киртінҷек паза мыннаң мындархы чуртастаңар ырах сағынминча. Аннаңар олар кӱҷӱрлернің «хармахтарына» табырах хаап парчалар. Наркотиктерні амзаан кізі, тізең, аннаң ӱр имнен полбин ирееленче.
- Чииттер наркотиктерге тартылбас ӱчӱн, профилактика тоғызын орта паза иптіг апарарға кирек. Че амғы туста телевидениеде паза Интернетте шоу-бизнес «чылтыстары» наркотиктердеңер уғаа кӧп чоохтапчалар. Саарбахтар, постары даа пілінмин, ағаа тартыл сыхчалар. Минің кӧрізімнең, чииттернің андағ сағыстар полбасха кирек. Аннаңар ӱгренҷілернің паза студенттернің аразында чарыдығлығ тоғыс кӧп апарарға кирек, оларны культураа, спортха, наукаа, халых чуртасха кӧніктірерге кирек, - чооғында таныхтапча Валерий Старостин.
Хакасияның ӱлгӱзі «Стоп наркотик» чӧрімнің волонтёрларына полысчатханы махтағлығ. Наркотиктең тоғыр кӱресчеткен чииттернің пу тузалығ тоғысты апарҷаң кӧңні улам кӧдірілче. Мыннаң мындар чӧрім араласчылары паза Ӧӧркі Чӧп депутады мындағ акцияларны пасха даа муниципалитеттерде иртірерге паза андар чииттерні улам кӧп тартарға чӧптес салғаннар.
Автор :
Оксана ИВАНДАЕВА
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде