ХОНЫХ ЧОХ ЧИИТТЕР КӦП
13.08.2021
Хабарлар
Піске пасчалар. «Хакас чирі» газетаның редакциязынзар Таштып аймаа чуртағҷызы паза газета хығырығҷызы Хызапин пиҷедең (фамилиязын паспаан) пічік кірген
Ол газета пастыра танызарға сағынчатхан хыс-ооллардаңар искіріглер сығарчаң колонка тӧстирге чӧп пирче. Пістің редакция тоғыр нимес, пічіктер пазыңар, піс оларны сығарарбыс. Кізі хысхаҷахти позынаңар (нинҷе час, нименең айғасчатханын) паза хайди аннаң палғалызарын пазып, редакциязар пічік ызыбыссын. Ол искіріглерні газетада сығарарбыс.
Хығырығҷыларның хайиина Хызапин пиҷенің пічиин сығарчабыс.
Изеннер, аарлығ редакция тоғынҷылары! Пасча сірерге Хызапин пиҷе. Мин сірерге кирек хоостыра пазарға сағыныбысхам. Пістің чир-суубыста кӧп абахай, хыйға хакас оол-хыс чуртапча. Оларның кӧбізі институт-университеттерде ӱгренче. Удаа чииттер ӱгредіг аларға пасха регионнарзар чӧрібісчелер. Анда ӱгреніп алып, тоғынып пастапчалар, анаң хоных тӧстең андох чурт салынчалар. Хакас оол-хыстар чон аразында турыстығ тудынчатханы паза чахсы тоғыста істенчеткені махтағлығ. Че пос чирінде тоғыс чох полың олар пасха городтарда сӧбірелерінең халчалар. Аның даа ӱчӱн хыстар пасха чонға ирге парчалар, ооллар пасха чонның хыстарын алып чуртапчалар. Анзы, арса, хомай нимес, че, сизінгенде, чир-суубыста хоных чох чииттер, уламох хыстар, кӧп. Олар, ирге парбиң чалғыс чуртапчалар алай ир чох пала ӧскірчелер, мында оларның пір дее пыролары чоғыл. Пістің чон амыр хылыхтығ, пӧзік культуралығ паза пазымнығ. Хыстар оолларға сыынминчалар, артынминчалар. Олар пастағызын ӱгредіг аларға кӱстенчелер, анаң чахсы тоғыста істенчелер. Соонаң на сизінзелер, постарынаң тиң ооллар ипчі алып чуртапчалар. Сизінгенде, ӧӧнінде ӱгредіг алған хыстар ирге парбин чуртапчалар. Аннаңар пістің чииттерге хоных тӧстирге полызарға кирек тіп сағынчам. Хыстар уйатчыллар нооза. Хайди оларға полызарға?Мындағ чӧп пирерге сағыныбысхам. Пірсінде орыс газетада «Сваха» рубрикалығ искіріглер хығырғам. Анда чалғыс ипчі-иреннер, хыс-ооллар танызарға искіріглер сығарчалар. Мин сағынчам, пістің хакас хыс-оолларға пос газетазында андағ искіріглер сығарза, чахсы поларҷых. Неделяда пір хатап андағ искіріглер сыхса, чидерчік, неке. Андағ тус чит килче, хаҷан кізее саарбах тузындағы чіли танызарға оой полбиныбысча, аннаңар мындағ искіріглер чалғыс чуртапчатхан кізее позының кӧӧленізін таап аларға полызар.
Пастағы туста хыстар-ооллар андағ искіріглер сығарарға уйадарлар, неке, че соонаң кӧнік парыбызарлар тіп сағынчам. Чииттерге танызарға полызып, андағ искіріглер сығар турарға сурынчам.
Автор :
Тимнеен Наталья ТЮКПЕЕВА
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде