ИНФРАСТРУКТУРА КРЕДИДІ
20.10.2021
Хабарлар
Чорых салтарлары. Хакасия пазы Валентин Коновалов ирткен неделяда Москвазар тоғыс чорығынаң чӧрген. Ол федеральнай бюджеттең инфраструктура кредидін аларынңа сурынысты маңнаныстығ арачылаан
Хакасия пазы Валентин Коновалов Москвазар тоғыс чорығынаң чарыс айының 13-14-ӌі кӱннерінде чӧрген. Тоғыс чорығының ӧӧн салтары - Хакасияа коммунальнай хоныхты нааӌылирына паза тыхтирына 191,5 миллион салковай бюджеттің инфраструктура кредиді пирілері.
Регионнар проекттерін арачылирына регионнар тилізінӌе правительство комиссиязының президиумы чыылии чарыдылған. Аны чарыс айының 14-ӌі кӱнінде вице-премьер Марат Хуснуллин иртірген. Хакасия пазы Валентин Коновалов федеральнай бюджеттең инфраструктура кредидін аларынӌа сурынысты арачылаан. Сурыныста региондағы нинӌе-де проекттің чуртасха кирілері таныхталған. Салтарында президиум Хакасияа бюджеттің инфраструктура кредидін пирерге чаратхан. Республика 191,5 миллион азыра салковай алар. Ол ахчаа Хубачарда 1,4 Гкал/ч кӱстіг наа котельнай паза 1,4 километр чылығ сеть пӱдірілер, ідӧк Расцветте, Тепличнайда паза Зеленайда чылығ пирӌең сетьтер нааӌылалар: чылығ пирӌең сетьтерні Ағбандағы ТЭЦ-ха хозар пӧгіннең мында ікі ӧӧн чылығ пункттары пӱдірілер, 3,4 километр чылығ пирӌең сетьтер тартылар, 30 элеватор узелі турғызылар.
Хакасия пазы Валентин Коноваловтың таниинаң, инфраструктура кредидінің сині регионның хазна ӧдізінең палғалыстығ, аннаңар республика улуғ ахча алып аларына ізенмеен.
- Сынында Хакасияа пу кредитті пирбесчіктер дее. Хазна ӧдізі пӧзік нооза. Хазна ӧдізі синінҷе Хакасия ікінҷі орында, Мордовия соонда. Аннаңар пу кредитті пиргені - Хакасия алынҷа хайығда полчатханын киречілепче, че чахсы саринаң, - чарытхан пу сурығны республика пазы, «Хакасия» ИА-ның сурығларына нандырып.
Проекттернің тиксі паазы - 383 миллион азыра салковай, киректелчеткен ахчаның халғанын алынӌа инвестор пирер.
- Пу орыннарда коммунальнай инфраструктураны нааҷылааны чуртағҷыларға чылығ читірерін ізестіг идер, киизер сығарылчатхан хомай ниме-ноо синін синдірер, чурт паза социальнай туралар пӱдіриин айныдар, наа тоғыс орыннары тӧстелер, - чарытча Валентин Коновалов.
Регионнарға бюджеттің инфраструктура кредидін пирердеңер Россия президенті Владимир Путин Федеральнай Чыылыға айланызында чоох апарған. Россия правительствозы, ол пастағны чуртасха киріп, пӱӱл от айының 14-ӌі кӱнінде 1189№ паза 1190№ чарадығларын алыбысхан. Пу пічіктерӌе Россияның регионнарына инфраструктураны тилідеріне бюджет кредиді пиріл турар. Федеральнай бюджеттең пирілген ахчаны регионнар ниик оңдайнаң айландырарлар: ахча 15 чылға паза аннаң даа ӱр тусха пирілче, кредит ставказы чылда 3%-ке тиңнелче, че пастағы тӧлеглер ӱзінӌі чылынаң пасталар. Ниик оңдайлар регион бюджеттерінің хорадығларын синдірче.
Федеральнай ахчаны алып алар ӱчӱн, регионнарға проекттерін арачылирға киректелче. Бюджеттің инфраструктура кредидінӌе алған ахчаны коммунальнай, социальнай паза транспорт инфраструктуразын алыстырарына, пӱдіреріне паза ол тоғыстарның проекттерін тимниріне позыдарға чарир. Ідӧк город транспортын аларына паза орыннарны тилідерінең палғалыстығ хай пірее пӧгіннерге хорадарға чарир. Россия правительствозының азынада сананыстарынӌа, 2024 чылға теере регионнарға пу кредитті 500 миллиард салковайға пирері кӧрілче.
Ідӧк Хакасия пазы Валентин Коновалов вице-премьер Виктория Абрамченконаң тоғасхан. Виктория Абрамченко Россия правительствозында Сибирьдегі федеральнай округты хайығда тутча. Регион устағӌызы вице-премьерге Хакасия бюджедінің тиңни нимес тӧстелчеткенінең палғалыстығ сидіксіністерні паза республиканың чуртас-экономика тилізінің оңдайларын читір пирген.
Валентин Коновалов регион правительствозының ахча суриин чахсыландырарынӌа, экономиканың кӱстіг отрасльларын тилідерінӌе чӧптерін алынӌа чарытхан. Салтарында вице-премьер Хакасияның тилізіне костелген чӧптерге паза пӧгіннерге хабазарға тимдезін искірген.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде