ӰР САҒААН ШКОЛАНЫҢ ПӰДІРИИ ПАСТАЛЫБЫСТЫ
13.10.2021
Хабарлар
«Ӱгредіг» нацпроект. Ағбанның 9-чы микрорайонында наа школаның пӱдірии пасталыбысты. Аның пастағы ӧзегін Хакасия пазы Валентин Коновалов паза Ағбан город пазы Алексей Лёмин сапханнар
ГОРОДТЫҢ ХЫЗЫЛ АҒБАН МИКРОРАЙОНЫ ХАҶАНОХ АЛҒЫДЫЛ СЫХХАН. 70 ЧЫЛЛАРДОХ АНДА НАА ШКОЛА ПӰДІРЕР СУРЫҒ ТУРҒАН, ЧИР ДЕЕ ТАБЫЛ ПАРҒАН, ЧЕ АЙМАХ СЫЛТАҒЛАР ӰЧӰН ОЛ ПӰДІРІЛБЕЕН. АНДАҒЫ ІКІ ХАДЫЛЛЫҒ 23№ ШКОЛАЗАР ОЛҒАННАР СЫЫСПИНЫБЫСХАННАР НООЗА. ЧЕ ХАЛҒАНҶЫ ЧЫЛЛАРДА, ТІЗЕҢ, СУРЫҒ УЛАМОХ ХАТЫҒ ТУРЫБЫСХАН.
Класстар кічіг, потолоктар чабыс, ӱгретчілер полған на пос орыннаң тузаланчалар. Уроктарны, кабинеттердең пасха, библиотекада даа иртірерге килісче. Олғаннар ікі сменанаң ӱгренчелер. Андағ даа полза, орын прайзына чидіспинче. Аннаңар іӌе-пабаларның кӧбізі палаларын пасха школаларзар пирче. Ӧӧнінде город істіндегі ӱгредіг организацияларынзар. Паланы кӱннің сай аар-пеер тарт чӧрерге кӧп тус кирек, хорадығлары, тізең, андағох, аннаңар наа школаны пу микрорайонның чуртағӌылары матап сахтапчалар. Тиктең нимес, школа пӱдіриинің пастағы ӧргезі сабылчатханын кӧрерге орындағы чуртағӌылар кӧп чыылыс парған.
- Пос хараамнаң кӧріп албаанда, наа школаның пӱдірии пасталыбысханына киртінмеспін! - ӧрінгенін чазырбинча чуртағӌы Евгения Анжиганова.
- Піс аны хаҷанох сахтапчабыс. Минің улуғ палам тӧртінҷі класста ӱгренче, анҷох тус піс аны кӱннің сай школаа тарт чӧрчебіс. Иртен город орамаларында машиналар тығылысча, аннаңар майың парарға килісче. Пірееде пастағы урокка орайлат салчабыс. Килчеткен чылда, тізең, кічии пастағы классха парар, андада піске улам сидік полар. Піди піс ле ирееленминчебіс, кӧбізі палаларын пасха школазар тарт чӧріп майыхча. Аннаңар пу наа школа піске уғаа кирек.
Наа объект «Ӱгредіг» национальнай проекттің «Хакасияның амғы тустағы школазы» регион проекті хоостыра пӱдірілче. Ол 250 орынға кӧріл парған. Республикада пу проектче ол пастағы школа нимес. Ӱр ниместе мындағ проекттіг школалар Шира аймаандағы Наа чир паза Ағбан пилтірі аймаандағы Чапаев аалларда азылғаннар. Ідӧк Асхыс аймаандағы Пирікчул аалда пу проектче школа пӱдірілче.
Хызыл Ағбанда пӱдірілчеткен школа городта ӱзінҷі ӱгредіг организациязы, хайзы «Ӱгредіг» национальнай проектче пӱдірілче. Город сыбыра алғыдылча, чуртағӌыларның саны ідӧк ӧсче. Чыл сай олғаннарның саны пір муңа хозылча. Пу ӱгредіг чылында городтың школаларында 25 муң азыра пала ӱгренче. 2018 чылда, тізең, 20 муң полған. Наа микрорайоннарда - 9-ӌы, 10-ӌы паза «Арбан» - школалар тың кирек.
- Піс хаҷан даа социальнай сурығларға алынҷа хайығ айландырчабыс. Уламох наа школалар, олған садтарын пӱдіреріне. Республика кінінде чуртағҷылар саны ӧсчеткенде, ӧӧн хайығ ағаа салылча. Хызыл Ағбандағы школа пӱдіріл парза, ол ідӧк сіліг, чарых полар, анда прай наа оборудование турғызылар. Пу школа городта паза тиксі республикада халғанҷызы полбас, піс аннаң андар ӱгредіг организацияларын пӱдірербіс, - теен Хакасия пазы Валентин Коновалов.
Хакасия пазы паза город пазы наа школа пӱдіриинің пастағы ӧзегін чирзер кире сапхан соонаң, аар техника тоғызын пастаан. Пу чағында подряд организациязы фундамент тимнир тоғысты апарар.
Хызыл Ағбандағы школа ӱс хадыллығ полар. Аның улии 6 муң азыра квадрат метрге тиңнелер. Ол ӱс чардыхтаң тӧстелер. Пастағызында 84 орыннығ столовай полар, ікінӌізінде - улуғ спортзал паза халғанӌызында - ӱгредіг кабинеттері. Пӱдіріг тоғыстарынаң «МЖФ» пӱдіріг компаниязы айғасча. Наа школа пӱдіриине ахчаның ӧӧн чардығын федеральнай кін позытча - ол 200 миллион азыра салковай, пасхазын республика паза город хозар. Чӧптезіг хоостыра пір чыл пір ай пазынаң наа школа тимге сых парарға кирек.
Хайди искірче Хакасияның ӱгредіг паза наука министерствозы, 2018 чылдаң сығара Хакасияда 10 школа паза 17 олған сады пӱдіріл парған. Мынынаң ӱгредіг организацияларының пӱдірии тохтадылбас.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы