ХАКАСИЯДАҒЫ СӦБІРЕ ХАЗНА СЫЙИИНА ТУРЫСХАН
13.10.2021
Хабарлар
Сыйыхтас. Хакасия правительствозы туразының улуғ залында республика пазы Валентин Коновалов Анатолий паза Ирина Чехлатовтарға «Іҷе-паба сабланызы» орденнiң медальын читірген
Россия президентінің 2021 чылдағы 413 № чахии хоостыра, пик сӧбіре тӧстеп, палаларны паарсаста, хыныста ӧскіріп, пасхазына кӧзідім полчатхан ӱчӱн мындағ танығлығ сыйыхнаң таныхтатханнар санында Ағбандағы Анатолий паза Ирина Чехлатовтар сӧбірезі. Пістің чир-суғҷыларыбыс марығның чиңісчізі полыбызар ӱчӱн оой нимес таллағны ирткеннер. Тиксі марығда асхынах нимес турыстығ сӧбірелер араласханнар, Чехлатов ирепчі артыхтарның санына кір парған.
Ирина паза Анатолий Чехлатовтар, 30-ҷа чағын чыл ынағлазып, пілізіп чуртапчалар. Олар тӧрт хыс паза ікі оол ӧскір салғаннар. Полғанына ла ортын профессиональнай алай пӧзік ӱгредіг пиргеннер. Кічіглері, Виктор паза Елена, ӱгредиин ам даа тоосхалахтар. Улуғ палалары хоныхтығлар, пос палаларын ӧскірчелер. Че алынҷа сӧбіреліг ползалар даа, харындас-пиҷелер хада-пірге тудынып чуртапчалар. Амды улуғ сӧбіре толдыразынаң удаа чыылыспинча, че чыылысса, пос тусты тузалығ иртірерге кӱстенчелер. Іҷе-пабазына иб аразында полыс пирчелер алай прайзы хада арығзар тынанарға алай кӧлзер сомарға чӧрчелер.
Чехлатов ирепчі палаларны кічігдең сығара пір ӧменең тудынарға паза пілізіп чуртирға ӱгретче. Аннаңар сӧбіренің уғаа чылығ паза паарсастығ тудынчатханы іле кӧрінген. Ағаа хоза Ирина паза Анатолий палаларын кічігдең тоғысха кӧніктіргеннер. Аннаңар палалары тоғысха кӱлӱктер паза тоғынчатхан чирде махтаға сыхчалар.
Хакасия пазы Валентин Коновалов, Ирина паза Анатолий Чехлатовтарны алғыстап, уғаа кӧп чылығ сӧс читірген:
- Пала тӧреені паза аны ӧскірері - ол улуғ ӧрініс. Олох туста ол - улуғ нандырығлығ паза оой нимес тоғыс. Алғыс сірерге палаларны сын, чахсы оңдайнаң чуртирға ӱгреткен ӱчӱн. Пӱӱнгі кӱнде турыстығ тӧл ӧскірері, часкалығ сӧбіре чуртазын хайраллиры прайзына даа кирек. Кӧп палалығ сӧбірелерге хабазары паза оларға чахсы чуртас оңдайларын тӧстирі пістің хазнада даа паза республикада даа ӧӧн пӧгін полча. Аның сылтаанда андағ сӧбірелернің саны хозылча.
Ідӧк тоғазығ тузында Хакасия пазының орынңызы Ольга Пономарева сӧбірее социальнай контракт оңдайларынаңар чарытхан. Сӧбірее хазна хабазиинаң тузаланарға чӧп пирген.
Тоғазығда Хакасия пазы Анатолий паза Ирина Чехлатовтарның пархаларын хайығ чох артыспаан, оларға «Детский мир» садығ туразынаң сертификат, конфеттер паза ручкаларнаң блокнот читірген. Палалар республика пазының сыйиина уғаа ӧрін парғаннар паза кӧңнілері уламох чалахай полыбысхан.
Ирина Чехлатова «Родительская доблесть Хакасии» медальнаң таныхтатхан полған, амды, тізең, уламох танығлығ сыйыхха турысханы поғдархастығ пілдірче тіп чоохтаан Чехлатов ирепчі.
Сыйыхтар читірілген соонаң тоғазығ араласчылары, чоох-чаахнаң одырып, ізіг чей іскеннер. Чахсы таныс таа полбаан ползалар, аймах-пасха нимедеңер чоохтасханнар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде