ӦӦН ПӦГӀН - РУДНИКТІҢ ТОҒЫЗЫН ТОХТАТПАСХА
25.01.2019
Хабарлар
Кӱн сурии. Хакасия пазы Валентин Коновалов Абазадағы рудниктің директоры Александр Жуковнаң, Абазаның пазы Валентина Филимонованаң, Хакасияӌа налог службазының устағҷызы Светлана Диденконаң чыылығ иртірген. Чоох предприятиенің хазнаа алымнарынаңар парған.
Хакасияның Арбитраж чарғызы, Абазадағы рудниктің сарин алып, федеральнай налог инспекциязының искінең чараспаан. Предприятиені холда тутчатхан Хакасияның правительствозы налог органынаң ікізіне чарас чарадығны, стол кистінде чоохтазығлар апарып, тілирге чаратханнар. Пу андағ пастағы тоғазығ полған.
- Чоох Абаза городтың мыннаң мындархы чуртазынаңар парар. Аның тилізі паза чуртағҷыларының чахсы чуртазы городты тутчатхан предприятиенің тоғызынаң палғалысча. Анда 700-че кізі тоғынча. Піске предприятиенің тоғызын тохтадарға чарабас, - чооғын пастаан регион пазы.
Прай саринаң кӧрістер сын пілдірче. Рудниктің менеджерлері предприятие, сидік тее полза, тиліс кӧзітчеткеннеңер искірчелер. Руданы аниры ӧсче, товар садылча. Пӱӱл парыс полары кӧрілбинче, хорадығларны ла чабары планда тудылча. Тӱзімніг тоғысха наа оборудование киректелче, ол, тізең, наа хорадығлар полар. Производствоны ӧскірерге хайдағ-да тус кирек.
- Мин аннаңар чарғыда чоохтаам, ам даа чоохтапчам, піс хоратхан ахча ӱчӱн сан пиріс тударға тимдебіс. Предприятие тохтап парза, хазнаа ол улам сидік сурығ пол парар, - таныхтаан Александр Жуков.
Дирекцияның чооғынаң, предприятиенің тоғызын ноо даа туста тохтадыбызарға чарир: энергетиктерге тӧлебезе - тохтап парар, налогтарны тӧлебезе, счёттарға арест салылар, тоғыс турыбызар. Предприятиені тохтадыбысса, аның консервациязына кӧп миллиард салковай хорадарға килізер. Ідӧк компенсациялар тӧлирге, городты хорғыс чох тударға кирек. Ол прай хазнаның хорадығлары полар. Ідӧк рудниктің устаа НДФЛ паза НДС прай тӧлелчеткеннеңер искірген. Налог инспекциязы Пенсия фондынзар паза социальнай страхование фондынзар алымнарны хысча.
Предприятиенің налогтары (НДФЛ) городха уғаа кирек. Город хара таснаң, топливонаң сидіксіністер пілбинче, рудник ол сурығларны чаапча. Городтың тӧреміл чахсы чуртазы предприятиенің тоғызынаң палғалыстығ, - чоохтаан Абазаның пазы Валентина Филимонова.
Налог инспекциязының кӧрізін ідӧк сынға санирға кирек - бюджетсер ахча толдыразынаң кір турзын. Істеніс ӧмезінің кирексіністерін хыза пазарға чарабинча, налог инспекциязы оларны арачылапча. Федеральнай налог службазы прайзына чарас чарадығлар аларға тимде, че предприятиенің устаа прай тӧлеглерні тузында чаап турардаңар молңағ пирерге кирек.
Мыннаң мындар пу чоохтазығларны тоғыс тузында узарадарға чӧптезіп алғаннар.
Автор :
Тимнеен Николай Султреков
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде