ӰЛГӰ ПРАЙЗЫНА АЗЫХ ПОЛЗЫН
06.02.2019
Хабарлар
Чуртағӌыларнаң тоғазығ. Хакасияның пазы Валентин Коновалов ирткен неделяда Боград аймааның чуртағӌыларынаң тоғасхан
ЧЫЫЛЫҒ АЛНЫНДА
Боград аймааның Культура туразында чон тығылысчатхан, одырҷыхтар читпеен кізілер коридорда азах узында турғаннар. Хайди за, республиканың иң пӧзік устаа чуртағҷыларнаң олаңай ла чоох алызарға, сурығларын истіп аларға пеер пастағызын на килді нооза. Хакасияның пазы пу тоғазыға позынаң хада республика правительствозының прай министерство-ведомстволар устағҷыларын ағылған.
Сценада турғызылған столларда изере табличкалар хызылых: хазых хайраллаҷаң министр Владимир Костюш, ӱгредіг паза наука министрі Лариса Гимазутина, финанстар министрі Ирина Войнова, Хакасия пазының орынҷызы Татьяна Курбатова, Хакасияның пазы Валентин Коновалов, Боград аймаа муниципальнай пӱдістің пазы Сергей Чернышов, пӱдіріг паза ЖКХ министрінің тоғызын толдырчатхан Илья Кононенко. Иң кӧп сурығ оларға пирілер тіп, оларны андар одыртчалар таң? Пасха министрлер залда пастағы рядта одырғаннар.
Хакасия пазының полысчылары чуртағҷыларға сурығлар пирҷең чаҷыннар таратханнар, микрофоннар тимнеп салғаннар. Чон Валентин Коновалов килерін чидікпин сағаан. Ол министрлерінең хада залзар кіргенде, чуртағҷылар, тура хонып, оларны айа сабызынаң удурлааннар.
ТОҒАЗЫҒЛАР ТӦРЕМІЛ ИРТІРІЛЕР
Валентин Коновалов, сценазар иртіп, чыылған чонға алғызын читірген. Аның чооғынаң, мындағ тоғазығлар полған на муниципальнай пӱдісте тӧреміл иртіріл турарлар. Ікі тоғазығ иртіріл парған - Харатаста паза Ағбан пилтірі аймаанда. Амды теес Боград аймаана читті. Чуртағҷыларға, сурығларын чаҷында пазып, сценазар пирібісчедерге кирек полар, нандырығ чох пір дее сурығ халбас. Ідӧк залдаң даа микрофон пастыра сурығ пирерге чарир.
- Прайзына, табығларда аралазып, ӱннерің пирген ӱчӱн улуғ алғыс читірчем. Амды ӱлгӱ прайзына азых полар. Піс, регион паза муниципалитеттер синінде прай сидіксіністіг сурығларны кӧдіріп, оларны ӱзӱріп, чарадар оңдайлар табарға кирекпіс. Удур-тӧдір истіп пілерге кирекпіс, іди, хада-пірге тудынып, прай сурығларны пӧгербіс. Чуртағҷыларға сығысчатхан сурығларны пӧгерінде ӧткін аралазарға кирек. Республика чуртазында сірер чапчаң аралазыңар. Мин позым сірерге прай саринаң хабазарға тимдебін. Телевидениеҷе пістің чуртазыбыстаңар аймах хабарлар таратчалар. Піс республика бюджедінің ахчазын ӱзӱрлеп пастапчабыс. Хай пірее министерстволарны правительство туразынзар кӧзіріп, аренда тӧлеглерінӌе 10 миллион азыра салковай ӱзӱрлеп аларбыс. Хара тас аныпчатхан предприятиелер устағҷыларынаң налогтар тӧлирінҷе чоохтазығлар апарчабыс. Пу сурығны чарадарынҷа олар тоғысчы ӧме тӧстеп алғаннар. Ам сірернің сурығларыңны истіп, оларны пӧгерге кӱстенербіс, - теен Валентин Коновалов.
Чооғын тоозып, Хакасияның пазы сан пиріс тударға Боград аймааның пазы Сергей Чернышовха сӧс пирген.
АЙМАХТЫҢ ТИЛИР ОҢДАЙЛАРЫ ПАР
Сергей Чернышовтың чооғынаң, Боград аймаанда 10 аал чӧбі тоғынча, 28 аал саналча. Демография саринаң кӧрзе, аймахта 14600 кізі чуртапча, ортымах чал ахчазы 28183 салковайға тиңнелче (мындағ санны истіп, залдағы чон суулаза тӱскен. - Авт.). Аймахтың тилир паза инвестициялар кирер чахсы оңдайлары пар. Туризмні, маллар тудар тоғысты тилідерге чарир. Чирнің ис-пайы кӧп. Аны анып, экономиканы тилідер ідӧк чахсы оңдайлар пар.
Аймахта канализация сетьтері саңай иргілен парған, кӧп тураа, оборудованиее тиксі тыхтағ киректелче. Мының алнында «Туманный» санаторий Боград аймаана кірҷең, ам ол городха пиріл парған прай налогтарынаң хада. «Бородино» совхозтың чирлерін, федеральнай собственностьтаң алып, аймахха пир салза, чахсы полар.
Боград аймааның пазы сан пиріс тударға хынминчатханы іле кӧрінген. Хайди ол таныхтаан, мин чонның алнында ла нандырығлығбын, хайзы мині аймах пазына, ӱнін пиріп, турғысхан.
Валентин Коновалов, аны трибуна кистінде турарға артызып, чуртағҷыларның сурығларына нандырарға тимде поларға чахығ пирген.
СУРЫҒЛАР, ЧАХЫҒЛАР...
Анаң сурығлар пирер тус читкен. Чахында пазылған сурығларны Хакасия пазына пирчеткеннер. Валентин Олегович, оларны хығырып, сурығ хайдағ министерство тоғызына теелче, аның министріне сурыға нандырарға чахыпча. Сурығлар уғаа кӧп полған - чоллар тыхтирынаң паза орамаларны чарыдарынаң пастап, аймах кінінҷе ээлері кӧрбинчеткен інектер паза адайлар чӧрчеткеніне теере.
Іди Пушной аалдағы котельнайның кочегарларына хаҷаннаң чал ахчазын тӧлебинчеттірлер. Алымнар 50 - 100 муң салковайға чит парған. Котельнай муниципальнай полча, че муниципалитеттің ахчазы чоғыл. Хакасияның пазы республиканың істеніс паза тоғыс тапчаң министрі Ирина Ахметоваа істеніс инспекциязынаң паза прокуратуранаң хада пу сурығны табырах пӧк саларға чахаан.
«Боградтаң Знаменказар автомобильліг чӧрҷең оңдай чоғыл, чолда оймах-соғыллар толдыра» сурығ полған. Хайди таныхтаан Хакасияның транспорт паза чол хонии министрінің тоғызын толдырчатхан Иван Белоус, ол чолда асфальт чоғыл, че сай урылған. Анда грейдер чолны удаа иптепче.
Владимир Костюшха хаҷан аймах кініндегі имнег туразында рентген иртчең кабинет полар тіп сурығ пирілген. «Пӱӱл», - нандырған Костюш. Имнег киреенҷе сурығлар кӧп полған. Іди специалист имҷілер чидіспинче. Чиит имҷілер, киліп, нинҷе-де чыл тоғынып, миллион салковай полызығ алып, тоғыстаң парыбысчалар. Пу сурығ аймахти ла нимес, регионни даа нимес, прай хазнани полар.
Прай сурығлардаңар пазарға кӧп чаҷын кирек полар. Валентин Коновалов, прайзына пазох алғызын читіріп, нандырығ албаан полған на сурыға хайди даа нандырығ полар тіп ізендірген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде