ООЛ-ХЫСТАРНЫҢ УЛУҒ СПОРТСАР ХААЛАҒЛАРЫ
19.03.2019
Хабарлар
Ағбан город пазы Николай БУЛАКИН баттерфляй оңдайынаң чӱзер марығ чиңiсчілерінең хада. Фёдор КИРГИНЕКОВ (сол саринда) ікінҷі орынға турысхан
Спорт. Ағбаңда 11 - 14 мартта суғҷа чӱзерінҷе Ағбан город пазы сыйыхтарына «Сибирь Кубогы» тиксі Россия марығларының пастағы чардығы ирткен.
Ағбанзар арға-мӧрійге Сибирьнің тоғыс регионынаң 11 - 16 частығ спортсменнер килгеннер. Тиксі 600 артиинаң араласчы полған. 12 мартта марығлар пайрамни азылғаннар.
- Ағбан пазох «Сибирь Кубогының» араласчыларын удурлапча. Спортсменнерібіс пу марығларда постарының рекордтарын ас парыбыссыннар, трeнeрлeрiнiң чахығларын толдырыбызып, «Ағбан» спорткомплекстің табырах суунда чиңіс тутсыннар, - алғаан марығласчатханнарға Николай Булакин.
Ідӧк оол-хыстарны алғыстааннар тиксі Россияның суғҷа чӱзерінҷе федерация президиумының кізізі Сергей Кашников, Хакасияның спорт министрі орынҷызының тоғызын толдырчатхан Виталий Мордакин, Хакасияның суғҷа чӱзерінҷе федерацияның президенті Валерий Левицкий.
«Сибирь Кубогы» суғҷа чӱзерінҷе марығлар чыл сай иртірілчелер. Анда кізі кӧптең кӧп араласча. Олғаннар аразында иртчеткен марығларға полған на регионнаң нинҷе-де команда килче. Пӱӱл пастағызын на мынҷа кӧп спортсмен Хакасияда марығласча.
- «Ағбан» спорткомплекстің бассейнінде 1000 спортсменге дее марығлазар оңдай пар. Ӧӧн сидіксінiс - городтағы гостиницаларда анӌа кӧп кізее чуртаӌаң орын таап алары, - марығлар алнындағы пресс-конференцияда таныхтаан Николай Булакин.
Пӱӱл Хакасияда «Сибирь Кубогы» 26 хати иртірілче. 1993 чылда сидік оңдайларда пу марығ пастағызын иртірілген. Олғаннарға ол туста пасха регионнарзар сығарға сидік полған. Пӱӱнгі кӱнде дее ыраххы чорыхха кӧп ахча киректелче. Амды марығлар кӧп регионда полчалар, че аның чардыхтары Ағбанда паза Барнаулда хайди даа иртірілчелер. Халған чардыхтарын иртірерінҷе регионнар аразында таллағ хазыр парча.
- Алты чыл мының алнында Хакасиязар 300 спортсмен килгенiн сағысха кирчем, - чоохтаан Сергей Кашников. - Амды Ағбанда марығлар сыбыра иртче. Чиит спортсменнер устарын табырах таптапчалар, «Ағбан» спорткомплекс оларға андағ оңдай пирче. Республика спортсмeннерiне чахсы чидіглер алғапчам.
Пістің олғаннарға пасха регионнар спортсменнерінең тоғыр турызарға ам даа сидік. Че республикада чыл сай кӧп пала пу спортсар килче, Хакасия кӱстіг спортсменнерні тимнепче. Иң чахсылары тиксі Россия марығларына сыхча.
«Ағбан» спорткомплекс чох полғанда, Хакасияда марығлар аймах орыннарда иртірілҷеңнер. Андада кӧп кізі араласпаҷаң. Истіг спорткомплекс пӱдіріл парғанда, прайзы анда марығлазарға сағынча. Че полған на командаа нинҷе-де ле спортсменні сығарарға чарадылча. Орындағы наа ла спортнаң айғасчатхан олғаннарға улуғ опыттығлардаң тоғыр турызар оңдай пирілче. Іди Хакасияның суғҷа чӱзерінҷе федерациязы спортсменнерге устарын кӧдірерге хабасча.
Ӱс кӱн аразына араласчылар нинҷе-де кӧрімҷе марығласханнар. Фёдор Киргинеков пастағы кӱнде баттерфляй оңдайынан 100 метр чӱскен. 50 метр чӱс парыбызып, ол прайзын асчатхан, че азах меетке, тізең, ікінҷізі читкен. Пу аның хынчатхан кӧрімі полча. Че «Сибирь Кубогында» ол пасха даа кӧрімнерде араласхан. Ідӧк Валерия Конгарова, 100 метр пилінде чӱзіп, кӱмӱс медальны холға кирген.
- Февраль-март айларда Ағбанда ирткен Сибирь первенствозында марығласханда, мин спорт узына кандидат нормативін толдырыбысхам. Час хоостыра мағаа Россия чемпионадында аралазарға ам даа чарадылбинча.
Пу марығларға Новосибирсктең, Алтай крайынаң кӱстіг спортсменнер килгеннер. Олардаң тоғыр турызарға сыбыра сидік полча, - теен Фёдор.
Иң хазыр кӱрезіглер эстафета марығларында парған. Ағбан городтың ооллар командазы 4*100 м пос оңдайынаң чӱзер эстафетада кӱмӱс медальға турысхан. Ідӧк пасха-пасха оңдайнаң чӱзер эстафетада хызыҷахтар командазы ікінҷі орынға сыххан. Хакасияның оолағастар паза ооллар командалары олох кӧрімде эстафетада ӱзінҷі орыннар утып алғаннар.
Ікі кӧрімніг марығда пістін чир-суғҷыларыбыс чахсы салтарлар кӧзіткеннер. Валерия Конгарова, пилінде чӱзіп, кӱмӱс медальны холға кирген.
- «Ыырӌылар» кӱстіглер. Марығлар хазыр оңдайда иртчетселер дее, «Сибирь Кубогының» ікінҷі чардығына таллағ иртібізерге пӧгінчем. Марығ тузында нинӌе-де алӌаас идібіскем, оларны тӱзедер ӱчӱн, кӧп тоғынарға кирек полар. Піс кӱннің сай ікілер час тренировка иртірчебіс, - чоохтаан Валерия Конгарова.
Фёдор Киргинеков ікі кӧрімніг марығда, баттерфляй оңдайынаң чӱзіп, ікінҷі орынға сыххан. Олох марығда нинҷе-де оңдайнаң чӱзерінде чиңіс тутхан. Че 200 метр чӱскенде, позының рекордынаң пір секундаа халғанына спортсмен тын ачырғанған. Ідӧк чир-суғҷыбыс Софья Степнова баттерфляй оңдайынаң чӱзерінде хола медальны утхан. Пасха даа спортсменнерібіс чахсы салтарлар кӧзіткеннер.
- 200 метрге пасха-пасха оңдайнаң чӱзерінҷе марығласханда, мағаа кӧп кӱс пир саларға киліскен. 400 метр чӱзерге ниик арах пілдірген. Алтын медаль утып алғаным мин спорт узы атха улуғ хаалағ иткенімні таныхтапча, - сағызынаң ӱлескен Фёдор Киргинеков.
- Прай даа эстафеталарда піс сыйыхтығ орыннарға сыххабыс. Медальлар саны хоостыра «Сибирь Кубогында» пістің командаа оң полды, - таныхтаан марығның ӧӧн чарғыҷызы, Ағбан городтағы ДЮСШ-тың тренері Максим Бурмага.
- Минің холымда тимненчеткен Фёдор Киргинеков марығдаң марыға чахсы салтарлар кӧзітче. Ізенчем, мыннаң мындар аны кӧп чиңіс сағыпча.
Хакасия командазы 11 медаль утып алған - пір алтын, алты кӱмӱс паза тӧрт хола. Марығ салтарларынҷа пастағы орынға Новосибирск командазы сыххан. Ідӧк иң чахсы спортсменнер адалғаннар: Дарья Трофимова паза Александр Демченко (ікізі Новосибирсктең).
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде