ОЛАРНЫҢ ТОҒЫЗЫ - ЧОНҒА ТУЗАЛЫҒ
11.06.2019
Хабарлар
Зинаида МАЙНАГАШЕВА алғыстас пічиинең сыйыхтатхан
Социальнай тоғынҷы кӱні. Хазнабыста чыл сай 8 июньда Социальнай тоғынҷы кӱні таныхталча. Ирткен четвергте Ағбанда Ветераннар пансионадында чонға социальнай полызығ пирчеткен улусты алғыстааннар
Ветераннар пансионадынзар кізілер азынадох чыылысханнар. Анда чуртапчатхан аға-ууҷалар, ізіг кӱн сустарынаң чазынып, ағастар тӧзіндегі одырчыхтарда тынанып одырғаннар. Чыылысхан кізілер аразында чонға социальнай полызығ пирчеткен ведомстволарда, организацияларда кӧп чыл тоғын салған ветераннар полған. Ідӧк паарсах чӱректіг тоғынҷыларны республиканың устағ-пастаа алғыстирға килген.
Чоохтирға кирек, пістің республикада 8 июнь алнында социальнай тоғынҷылар марииның чиңісчілеріне ахчалығ сыйыхтар паза Аарластығ пічіктер читірері кибірге кір парған. Пӱӱл Хакасия правительствозының премиязына алты кізі турысхан. Оларға 50-ер муң салковай ахчалығ сыйых читірілген. «Социальнай полызығ пирҷең стационар учреждениезінің иң чахсы устағҷызы» номинацияда чиңісчі Татьяна Чудинова полыбысхан. Ол «Теремок» тура-интернаттың директоры паза «Россияның іҷелері» тиксі Россияның халых чӧрімінің Хакасиядағы пӧлиинің устағҷызы полча.
«Чонға социальнай полызығ пирҷең учреждениезінің иң чахсы социальнай ӱгретчізі» номинацияда Саяногорсктағы реабилитация кінінің тоғынҷызы Татьяна Кромаренконың узын, пілізін пӧзік паалааннар. «Чонға полызығ пирҷең учреждениезінің иң чахсы медсестразы» номинацияда Марина Скорева республика правительствозының премиязына турысхан.
Ідӧк марығда социальнай тоғынҷыларның чайаачы устары алынҷа таныхталған. «Чайаачы узынаң тоғыста тузаланғаны» номинацияда «Теремок» тура-интернаттың ӱгретчізі Любовь Фёдорованың тоғызы пӧзік паалалған. Любовь Витальевна Фёдорова - ачых-чарых, кӱлімзіреес ипчі, кізізер прай чӱреенең хайча. Ол олғаннарынаңар уғаа хынып чоохтапча. Ӱгретчі тура-интернатта чуртапчатхан палаларны теелбектенерге паза аймах ниме-ноо чайирға ӱгретче. Фойеде аның ӱгренҷілерінің тоғыстары кӧзідіге сығарылған. Анда тиксі чыылған чон сарығ, хызыл, кӧк ӧңніг ойнаҷахтарны, тураҷахтарны хынып кӧрглеен. Ӱлӱкӱн пасталчатханда, Любовь Фёдорованың ӱгренҷілері сіліг теелбекнең кӧрігҷілерні ӧріндіргеннер. Ӱгретчі 10 чыл артиинаң олғаннарнаң тоғын парир. Аның тоғызын пӧзік паалааны ол уғаа нандырығлығ тіп таныхтаан ӱгретчі.
«Чонға социальнай полызығ пирҷең службаның иң чахсы чиит специализі» номинацияда Саяногорсктағы олған реабилитация кінінің массаж итчеткен медсестразы Арина Рассказова чиңісчі полыбысхан. «Чуртаста сидіксініске кір парған олғаннарнаң тоғынғаны» номинацияда Харатастағы частары читкелектернің реабилитация кінінің социальнай ӱгретчізі Светлана Тестова Хакасия правительствозының ӧнетін сыйиина турысхан.
Ідӧк ӱлӱкӱнде аймах социальнай учреждениелерде кӧп чыл істен салған улусты алғыстааннар. Оларға Аарластығ паза алғыстас пічіктері читірілген. Ол санда Зинаида Майнагашеваа. Зинаида Михайловна илееде чыллар Кызластағы частары читкелектернің реабилитация кінінде тоғын парир.
Чонға социальнай полызығ пирҷең службаларда істенчеткен улусха алғызын читірген Хакасия пазының орынҷызы Татьяна Курбатова. Аның чылығ, паарсах сӧстері чыылған ипчі-иреннернің чӱреен тибіреткен:
- Социальнай полызығ пирҷең службаларда чағбан чӱректіг, сыдамах, кӱлӱк кізілер істенче. Хатығ чӱректіг кізі чоннаң тоғын полбас. Сірер, тізең, сидік чуртас оңдайына кір парған чонға чӧлег полчазар. Пірееде сидіксініске кір парған кізінің хыринда туған-чағыннары даа чох пол парча. Андада полызыға сірер килчезер.
Пӱӱнгі кӱнде республикада социальнай полызығ пирҷең 13 управление, тоғыс стационар учреждениезі, социальнай полызығ пирҷең коммерческай нимес читі организация саналча. Анда тиксі 2 муң азыра кізі істенче. Оларның сидік паза нандырығлығ тоғызын пӧзік паалап, чыл сай июнь айның пастағы кӱннерінде устағ-пастағдағылар паза олаңай чуртағҷылар социальнай тоғынҷыларға алғыстарын читірчелер.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде