«ПІСТЕҢ ПАСХА, ПІРДЕЕЗІ!»
06.08.2019
Хабарлар
Кии-десант войсколарының кӱні. 2 августта Ағбаңда Чиңіс паркындағы Успас от хыринда Россияның Кии-десант войсколары кӱніне чарыдылған мероприятие ирткен
Aғбандағы Чиңіс паркынзар иртеннең чааҷы кип-азаан кискен, тельняшкалығ, кӧгілбей пӧріктіг, Кии-десант войсколарының флагын тудынған ветераннар чыылысханнар. Кӧбізі сӧбірелерінең хада, палаларын чидініп парған. Чыл сай 2 августта Успас от хыринда Россияның Кии-десант войсколарының кӱніне чарыдылған пайрамнығ мероприятие иртче.
Чааҷы-десантник полған ветераннар Успас от алнында стройға турыбысхан соонда, Кии-десант войсколары тӧстелгеннең 89 чыл толчатханына чарыдылған митинг азылған. Россияның паза Хакасияның гимннері толдырылған. Ветераннарзар тиксі Россиядағы «Боевое братство» ВДВ ветераннарының халых пірігізінің региондағы пӧлиинің кнезі Владимир Медвецкий айланған:
- Россияның Кии-десант войсколарының аарлығ ветераннары! 89 чыл аразына Кии-десант войсколарын пӧзік тее кӧдіргеннер, тӧбін дее тӱзіргеннер, аймах киректер полған, че десантниктер постарының матыр, махачы хылиин тӧбін пір дее тӱзiрбееннер. Кизек чаалазығларда аралазып, кӧп чааҷы-десантник чуртазын пир салған, оларны піс хаӌан даа ундутпаспыс. Амды хазна пістің войсколарыбысха хайығ сал сыхты, анзы уғаа чахсы. Ниме дее полза, Кии-десант войсколарының кибірлерібіснең хада халар. «Пістең пасха, пірдеезі!» - хыйғынаң тоосхан ол чооғын.
Республиканың Ветераннар чӧбі кнезінің орынҷызы, Халыхтар палатазының ветераннарнаң тоғыс апарчатхан комиссия кнезі Юрий Седых чыылған чонзар Хакасияның Ветераннар чӧбі адынаң айланған. Ол чааҷы-десантниктерні чииттер аразында патриотизмҷе тоғыс апарчатхан ӱчӱн алғыстаан, Кии-десант войсколары Россияның Тирігліг кӱстерінің элитазы полчатханын таныхтаан. Мыннаң мындар десантниктер Ада чир-суубысты ізестіг арачылирына ізенізін читірген, ідӧк, хормачыланып, фонтаннарзар тың кірбеске сурынған. «Сірерзер чиит тӧл кӧрче, олар сірернең тиңнезерге кӱстенчелер», - теен ол.
Десантниктер алнында ідӧк чоох тутхан Россия ДОСААФ-ының региондағы пӧлиинің кнезі Михаил Куимов. Аның чооғынаң, чааҷы-десантниктер, срочнай, контрактча чааҷы службазын иртіп, сағыстарында хаҷанға даа десантник полып халчалар. Оларнаң поғдархирға ла халча. Десантниктер чииттерге чахсы кӧзідім полчалар.
Чииттернең патриот тоғызын тӱзімніг апарчатхан ӱчӱн, Михаил Куимов пис ветеранға ДОСААФ-тың алғыстас пічиин читірген.
Десантниктерні ӱлӱкӱннең алғыстаан Хакасияның чааҷылар комиссары Виктор Максимчук. Хайди ол таныхтаан, пу кӱнде прай хазна Кии-десант войсколарының кӱнін таныхтапча. Десантниктер Россияның Тирігліг кӱстерінің элитазы полча, пу войсколар ӧнетін пӧгіннерні толдырарға тӧстелгеннер. Кӧп чиит оол ВДВ-да служба иртерге сурынча, че андар иң артыхтар ла таллалчалар. Піс ВДВ-ның 9-ҷы ротазы Афганистанда, 6-ҷы ротаның Аргундағы ойымда хайди махачы чааласханнарын чахсы пілчебіс.
Митинг тоозылғанда, Успас от хыринзар чахайахтар салылған, піснең хада чохтарны сағысха киріп, пір минута сым турған соонда, десантниктер стройнаң Чааҷылар сабланызы хумартхы тас ибіре хаалааннар.
Мин 1988-1989 чылларда ВДВ-да служба ирткен Марат Кичеевнең чоох алысхам. Ол ам Россияның саблығ тренері, ипчілер кӱрезінҷе Хакасияның улуғ тренері полча. Ідӧк ол - национальнай паза олаңай кӱресче спорт узы, кӧп марығда чиңіс тутхан. Марат Семёнович чааҷы службазын Амур облазындағы Магдагачи посёлокта 13-ҷі десантно-штурмовой бригадада ирткен. Парашютнаң читі хати, хараазын ікі хати, сегірген, снайпер полған. Бригада Хыдат хырығларынаң 42 км оортах турған, пограничниктерге полызарға сыбыра тимде полған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы